Schebal carta ta stojol te Corintioetik 12:1-21
12 Ay bin-a te leknax kʼinal ya kaʼiy yuʼune. Jaʼ ya jkʼan ya kalbeyex awaʼiyik skʼoplal ta swenta najalsitiletik* sok te bintik la yakʼ ta naʼel te Kajwaltike, manchukme maʼyuk bin ya xlokʼ kuʼun-a.
2 Ya jnaʼbey sba jtul winik te jun ay sok te Cristo te ayix 14 jaʼbil te ikʼot moel ta yoxkajal chʼulchan —ma jnaʼ teme sok sbakʼetal o teme ma sokuk sbakʼetale; jaʼnax ya snaʼ stukel te Diose—.
3 Ta melel, ya jnaʼbey sba te winik-abi —ma jnaʼ teme sok sbakʼetal o teme ma sokuk sbakʼetale; jaʼnax ya snaʼ stukel te Diose—
4 te la yichʼ ikʼel bael ta paraíso sok la yaʼiy kʼopetik te ma xjuʼ ta cholbeyel skʼoplal sok maʼyuk jtuluk winik te akʼbil permiso te ya xjuʼ ya yale.
5 Leknax kʼinal ya kaʼiy yuʼun te winik-abi, pero te bin leknax kʼinal ya kaʼiy yuʼun te joʼone jaʼ te banti maʼyuk kipe.
6 Te yakuk jkʼan jtoy jba yuʼune, ma yuʼunuk ya skʼan ya yal te maʼyuk spʼijil koʼtane, melel jaʼ ya kal te bin smelelile. Pero maba ya jkʼan ya jtoy jba yuʼun, jich maʼyuk machʼa ya stoybon jkʼoplal ta swenta te bin ya sta ta ilel ta jtojol o ta swenta te bin ya kale,
7 jaʼnax yuʼun te ay bin jelawen yutsil la kichʼ akʼbeyel jnaʼe.
Swenta jich maʼyuk bin ya jtoy jba yuʼun-a, la kichʼ akʼbeyel chʼix ta jbakʼetal te jich kʼoem te bin-utʼil jtul j-abat yuʼun te Satanás te yak smajbelon yuʼun jich maba ya jtoy jba-a.
8 Oxeb buelta la jkʼanbey wokol te Kajwaltik te yakuk slokʼesbone.
9 Pero, jich la yalbon: «Tikʼat-a te slekil koʼtan te ma snujpʼuk ya awichʼe, yuʼun jich tsʼakal ya xchiknajxan ta ilel te kuʼel te kʼalal maʼyuk awipe». Jich yuʼun tseʼelnax koʼtan ya jtoy jba yuʼun te maʼyuk kipe, yuʼun jich ya x-ayin ta jtojol te yuʼel te Cristo jich te bin-utʼil nailpakʼ.
10 Jich yuʼun tseʼelnax koʼtan yuʼun te maʼyuk kip, te ya kichʼ bolkʼoptayel, te ya xkʼax jwokol yuʼun te maʼyuk bin ay kuʼun, te ya kichʼ kontrainel sok te kʼalal ya xkʼax jwokol ta swenta te Cristo. Melel te kʼalal maʼyuk kip, jaʼ bayalxan kip-a.
11 Jich kʼoemon te bitʼil machʼa maʼyuk spʼijil yoʼtane. Jaʼexnix la asujonik te jich kʼoone, la skʼan te jaʼexnix la awalbonik lek jkʼoplal te jichuke, melel kakʼoj ta ilel te maba pekʼel jkʼoplal ayon ta stojol te machʼatik ya skuy sbaik ta mukʼul jpuk-kʼopetik awuʼunike, manchukme maʼyuk jkʼoplal te joʼone.
12 Ta melel, kakʼojbeyex awilik pruebaetik te yuʼun-nix jpuk-kʼopon-ae, jpasoj milagroetik,* mukʼul aʼteliletik sok aʼteliletik te ay yutsilal.
13 ¿Bin yuʼun te pekʼel akʼoplal ya awaʼiy abaik ta stojol te yantik congregacionetike? ¿Jaʼbal yuʼun te maba ijkatsil kʼoon awuʼunike? Pasbonik perdón yuʼun-abi.
14 Ta ora ini, jaʼix yoxebal buelta te chapalon yuʼun ya xbajt kulaʼtayex, pero maba ya kakʼ te ijkatsil ya xkʼoon ta atojolike. Melel ma jaʼuk yakon ta sleel te bin ay awuʼunike, jaʼ ya jleex te jaʼexe. Melel ma jaʼuk ya stsob stakʼin te alnichʼanetik ta stojol te smeʼ statike, jaʼ ya stsob stakʼin te meʼil tatiletik ta stojol te yal snichʼnabike.
15 Jaʼ yuʼun tseʼel koʼtan ya jlajin spisil te bintik ay kuʼun sok yame jlokʼes jba ta koʼtan ta atojolik. Teme bayal kʼuxex ta koʼtane, ¿snujpʼbal te jtebnax kʼuxon ta awoʼtanike?
16 Anaʼojik te maba ijkatsil kʼoon ta atojolike. Pero, te jaʼexe ya awalik te ay «jpʼijil ta loʼlaywanej» sok te la kakʼbeyex «apejtsʼulike».
17 ¿Yuʼunbal la jloʼlayex ta swenta te machʼatik la jtikun ta atojolike?
18 La jkʼanbey wokol te Tito te yakuk xbajt yulaʼtayexe sok la kakʼbey sjokin bael jtul hermano. ¿Yuʼunbal ay la sloʼlayex te Titoe? ¿Mabal jichuk yoʼtan te bin-utʼil koʼtan te joʼone? ¿Mabal junuknax be jtʼunoj sok?
19 ¿Yuʼunbal ya akuyik te yakotik ta jkoltaybel jba jkʼoplaltik ta atojolik te jayebix tiempo kʼaxem tale? Jaʼ ta stojol Dios te yakotik ta kʼop jich bitʼil jun ayotik sok te Cristoe. Manchukme jich-abi, kermanotak te kʼuxex ta koʼtankotike, spisil te bin ya jpastike jaʼ ta swenta te ya kakʼbeyexkotik yip awoʼtanike.
20 Melel ya jxiʼ teme ma jichuk ya xkʼot jtaex te bin-utʼil ya jkʼane sok teme ma jichuk ya xkʼoon te bin-utʼil ya akʼanik te jaʼexe, ya jxiʼ teme ay jajchem kʼop awuʼunik, te ya awil oʼtantay abaik, ya awilintay abaik, ya atsak abaik ta kʼop, te ya ale abaik ta kʼop, te ya amulanik spukbeyel skʼoplal te bin ya xkʼax ta skuxlejal te yantik, te ya awakʼik ta ilel toybail sok te ya amaj abaike.
21 Te kʼalal ya xtalon yan buelta ta atojolike, yaniwan spejkʼanbon jkʼoplal ta atojolik te Dios kuʼune sok yaniwan jmel koʼtan yuʼun te bayalex ta tul te aleoj amulik ta nailalto sok te maba asujtesoj awoʼtanik yuʼun te bin ilobtik sba ta pasel, te mulwej* sok te maʼyuk akʼexlalik te kʼalal ya akʼaxuntayik te mantale.*
Notaetik
^ Ta griego: «señailetik».
