Schebal carta ta stojol te Corintioetik 13:1-14
13 Ta ora ini, jaʼix yoxebal buelta te chapalon yuʼun ya xbajt kulaʼtayex. «Spisil te bin ya yichʼ chajpanel ya skʼan te ay chaʼtul o oxtul testigoetik te ya yalik te bin kʼot ta pasele».
2 Manchukme maba tey ayon ta atojolik ta ora ini, jich kʼoem te schebalix buelta yakon ta yulaʼtaybelexe. Jaʼ yuʼun, ta ora ini yame kakʼbeyex anaʼik te yame yichʼik tulan tojobtesel te machʼatik sleoj smulik ta nailal soknix-euk te yantik teme juʼ te ya xbajt kilex-xane.
3 Te jaʼexe yakex ta sleel jun prueba teme yuʼun-nix jaʼ-a te Cristo te yak ta kʼop ta jtojole, melel ma yuʼunuk maʼyuk yip te bin ya spas ta atojolike, ay yuʼel ya x-aʼtej ta atojolik.
4 Melelnix-a te la yichʼ jijpanel ta teʼ te kʼalal maʼyuk yip-ae, pero kuxul ta ora ini ta swenta yuʼel te Diose. Melelnix-a te maʼyuk kiptik jich te bitʼil maʼyuk yip-euk-ae, pero yame xkuxinotik sok ta swenta te yuʼel te Dios te ya x-aʼtej ta atojolike.
5 Tsajtaya* awilik teme tulan te schʼuunel awoʼtanike. Tsajtaya awilik te machʼaexnix ta smelelil-ae. ¿Yuʼunbal ma xa anaʼik te jun ayex sok te Jesucristoe? Pero maba jun ayex sok teme maba lek ilbilexe.
6 Ta melel, ya jkʼan te yakuk anaʼik te yuʼun-nix lek ilbilonkotik-ae.
7 Ya jkʼoponkotik Dios ta atojolik te manchuk ya apasik te bin chopole.* Ma jaʼuk ya jkʼantik yuʼun ta swentanax te lek ilbilonkotik yilele, jaʼ ya jkʼantik te jaʼuk ya apasik te bin leke, manchukme jich yilel te maba lek ilbilonkotike.
8 Melel maʼyuk bin ya xjuʼ ya jpastik ta skontrainel te bin smelelile, jaʼnax ya xjuʼ ya jkoltaybeytik skʼoplal.
9 Ta melel, tseʼelnax koʼtantik yuʼun te kʼalal maʼyuk kiptik te joʼonkotike, pero te ay awipik te jaʼexe. Jich ya jkʼantik ta skʼoponel Dios ta atojolik: jaʼ te yakuk xtojobexe.
10 Jaʼ swentail te jich la jtsʼibaybeyex ini te bitʼil mato tey ayon ta atojolike. Yuʼun jich te kʼalal tey ayonix-ae, maba tulan ya jtuuntes te yip kaʼtel yakʼojbon te Kajwaltike, yuʼun jich ya sta yip awoʼtanik, ma yuʼunuk ya jinex.
11 Te bin slajibal ya jkʼan ya kalbeyex, kermanotak, jaʼ te tseʼelukme awoʼtanik, talel kʼaxel xa atojobtes abaik, akʼbeya abaik smukʼul kʼinal awaʼiyik, junuknax te snopojibal awuʼunik sok lamalukme awoʼtanik ya xkuxinex, jichme ya x-ayin ta atojolik te Dios te kʼuxex ta yoʼtan sok te ya yakʼbeyex lamalkʼinale.
12 Te kʼalal ya apatbey aba awoʼtanik, talel kʼaxel ujtsʼuya* abaik.
13 Ya stikunbeyex spatjibal awoʼtanik spisil te machʼatik chʼultesbilike.
14 Ayukme ta atojolik te slekil yoʼtan te Kajwaltik Jesucristo te ma snujpʼuk ya kichʼtik, te skʼuxul yoʼtan te Dios sok te chʼul espíritu* te apisilik ataoj alekilalik yuʼune.
Notaetik
^ O «Tʼunaik ta lek».
^ O «ma leke».
^ O «bujtsʼia». Te jchʼuunjeletik ya yujtsʼuy sbaik ta schoik te kʼalal ya spatbey sba yoʼtanik-ae.
