Schebal carta ta stojol te Corintioetik 3:1-18
3 ¿Yuʼunbal ya skʼan te joʼotiknix te ya xjajch kalbey jbatik lek jkʼoplaltik yan bueltae? O ¿yuʼunbal jaʼ ya jkʼantik te ay machʼa ya yakʼbotik jun carta te banti ya yal te lek jkʼoplaltik jich te bin-utʼil ay machʼatik ya spasike? O ¿yuʼunbal jaʼ ya jkʼantik te ya awakʼbotik jun carta te banti ya yal te lek jkʼoplaltike?
2 Jaʼexnix cartaex kuʼunkotik te tsʼibaybil ta koʼtantik te naʼbil abaik sok ilbil yuʼun spisil te ants winiketik.
3 Melel chikan ta ilel te jaʼex cartaex yuʼun te Cristo te joʼotiknix la jtsʼibaytik te j-abatotik yuʼun te Diose. Ma tsʼibaybiluk ta tinta, jaʼ tsʼibaybil yuʼun te chʼul espíritu* yuʼun te kuxul Dios, jaʼnix jich maba tsʼibaybil ta pejchel tonetik, tsʼibaybil ta koʼtantik.
4 Jaʼ ini jaʼ smukʼul koʼtantik ta stojol Dios ta swenta te Cristoe.
5 Ma xjuʼ ya kaltik te jtukeltiknax la jchajpan jbatik ta spasel te aʼtelil ini, jaʼ wokolayal te Dios te la schajpanotik ta spasele.
6 Jaʼnix la schajpanotik yuʼun j-abat ya xkʼootik ta swenta te yachʼil chapbilkʼope, ma jaʼuk ta swenta te antiguo ley tsʼibaybile, jaʼ ta swenta te chʼul espiritue.* Melel te antiguo ley tsʼibaybile ya yakʼotik ta lajel, yan stukel te chʼul espíritu ya yakʼ kuxlejalil.
7 Te antiguo ley te tsʼibaybil te ya yakʼotik ta lajel la yichʼ tsʼibayel ta pejchel tonetik te bayal yutsilal jul ta stojolik te snichʼnab Israel te jich maba juʼ yuʼunik yilbeyel te sit yelaw te Moisés ta skaj te xlemetnax te yutsilale, te yutsilal-abi la yichʼ lajinel.
8 Teme jich kʼot ta pasel-abi, ¿mabal jaʼuk kʼaxtoxan ay yutsilal te bin-utʼil ya x-aʼtej te chʼul espiritue?*
9 Teme ay yutsilal te antiguo ley te la yichʼ tsʼibayel te ya yakʼotik ta lajele, ¡kʼaxtoxan jich ya skʼan ay yutsilal-a te toj ya x-ilotik yuʼun Dios te ants winiketike!
10 Te bin bayal yutsilal ta nailal, chʼay te yutsilal ta skaj te jaʼ pojbot yuʼun te bin bayalxan yutsilale.
11 Melel, teme ya yichʼ lajinel te bin ay yutsilal jule, ¡kʼaxtoxan jich ya skʼan ay yutsilal-a te bin stalel aye!
12 Te bitʼil jich yakotik ta smaliyel-abi, maʼyuk bin ya smakotik te kʼalal ya xkʼopojotik.
13 Ma jichuk ya jpastik te bin-utʼil la spas te Moisés, te la smuk ta pakʼ te sit yelaw yuʼun jich te snichʼnab Israel maba ya yilik te bitʼil ya yichʼ lajinel te leye.
14 Pero, majkem te snopojibal yuʼunike. Jaʼto ta kʼajkʼal ini, te kʼalal ya yichʼ kʼoponel te antiguo chapbilkʼop, jaʼnix jich mukulto ta pakʼ te sitike, melel jaʼnax ya xjuʼ ta lokʼesel ta swenta te Cristo.
15 Ta melel, jaʼto ta kʼajkʼal ini ta jujun buelta te ya yichʼ kʼoponel te bin la stsʼibay te Moisés, mukul ta pakʼ te yoʼtanike.
16 Pero, te kʼalal ay machʼa ya sujt ta stojol te Jehová,* ya xlokʼ te pakʼe.
17 Jaʼ Espíritu te Jehová,* te banti ay te chʼul espíritu* yuʼun te Jehová* libre ayotik.
18 Jaʼ yuʼun, ta jpisiltik te joʼotike, te kʼalal xlemetnax xojobil kuʼuntik te yutsilal te Jehová* jich te bin-utʼil espejo te maba mukul ta pakʼ te sit kelawtike, jich kʼunkʼun ya xkʼatpʼujotik ta slokʼomba te Dios sok te bejbe* ya kakʼtikxan ta ilel te yutsilale, jich te bin-utʼil ya spas te Jehová* te jaʼ Espiritue.*
