Schebal carta ta stojol te Corintioetik 4:1-18
4 Jich bitʼil te la kichʼtik akʼbeyel te aʼtelil ini ta swenta te la kichʼtik naʼbeyel yoʼbolil jbatike, maba ya xlujbotik.
2 Te bin jpasojtike jaʼ te jilix kuʼuntik te bintik muken ya yichʼ pasel te kʼexlaltik sbae, jaʼnix jich maba ya xloʼlaywanotik sok maba ya jeltik te bin ya yal te skʼop Diose. Te bin ya jpastike jaʼ te ya kakʼtik ta naʼel te smelelil kʼope, jich ya kakʼbeytik snaʼ te ants winiketik te lek jkʼoplaltik ta sit te Diose.
3 Teme mukul ta pakʼ te lek yachʼil kʼop te ya kalbeytik skʼoplale, mukul ta stojol te machʼatik ya xbajtik ta chʼayele,
4 jaʼ te machʼatik maba jchʼuunjeletik, te makbil spensarik yuʼun te dios yuʼun te balumilal ini, yuʼun jich maba ya yilik te xojobil yutsilal te lek yachʼil kʼop ta swenta te Cristoe, te jaʼ slokʼomba te Diose.
5 Melel te joʼotik ma jaʼuk ya kal jkʼoplaltik, jaʼ ya kalbeytik skʼoplal te jaʼ Kajwaltik te Jesucristoe sok te joʼotik j-abatonkotik awuʼunik ta swenta te Jesús.
6 Melel jaʼnix te Dios te jich la yal: «Akʼa sakubuk kʼinal ta yolil ijkʼal kʼinal». Jaʼnix te Dios la yakʼ sakubuk kʼinal ta koʼtantik te kʼalal la yakʼ jnaʼbeytik sba ta swenta te sit yelaw te Cristoe.
7 Pero kichʼojtik te kʼulejalil ini te ay ta vasijaetik te pasbilik ta ajchʼal, yuʼun jich ya xchiknaj ta ilel te talem ta stojol Dios te kiptik te la kichʼtik akʼbeyel te ma jaʼuk kuʼuntike.
8 Bayal bin ya yakʼ jwokoltik, pero maba ya slajinotik te jkʼaxel ma xjuʼ ya jtijix jbatik yuʼune; ma jnaʼ bin ya jpastik, pero ma jaʼuk ya skʼan ya yal te jkʼaxel ma xjuʼ ya xlokʼotik-a te wokolile;*
9 ya kichʼtik kontrainel, pero maba chʼaybilotik ta oʼtanil; ya xchʼojotik ta lum, pero maba ya xlajotik yuʼun.
10 Bayuk ya xbootik, spisil-ora ya xkujch kuʼuntik te wokolil te ya xjuʼ ya yakʼotik ta lajel, jich te bin-utʼil kʼax ta stojol te Jesuse, yuʼun jich ya xchiknaj ta jbakʼetaltik te bin kʼax ta skuxlejal te Jesuse.
11 Te bitʼil kuxulotike, te joʼotik spisil-ora ya jsitintay jbatik sok te lajel ta skaj te Jesús, yuʼun jich ya xchiknaj te skuxlejal te Jesús ta jbakʼetaltik te ya xlaje.
12 Jich yuʼun yak ta aʼtel ta jtojoltik te lajele, yan te jaʼexe yak ta aʼtel ta atojolik te kuxlejalile.
13 Te schʼuunel koʼtantik jaʼ pajal sok te bin tsʼibaybile: «Kʼopojon ta swenta te ay schʼuunel koʼtan», te xchie. Jich yuʼun ya xkʼopojotik ta swenta te ay schʼuunel koʼtantik-euke,
14 melel jnaʼojtik te machʼa la schaʼkuxajtes te Jesús jaʼnix ya schaʼkuxajtesotik-euk yuʼun ya jokintik te Jesús sok pajalme ya kichʼtik tejkʼanel ta stojol.
15 Melel spisil ini jaʼ ta swenta alekilalik, yuʼun jich ya xtoyxan te slekil yoʼtan Dios te ma snujpʼuk ya kichʼtik ta skaj te ay bayal ants winiketik te yakik ta yalel wokol ta swenta te yutsilal te Diose.
16 Jaʼ yuʼun maba ya xlujbotik. Manchukme yak ta lajel yip te jbakʼetaltike, yan stukel te koʼtantike bejbe* yak ta yichʼel yip ta jujun kʼajkʼal.
17 Manchukme ma tulan sok jkʼaxelnax ay te jwokoltike, jaʼ ya yakʼ kutsilaltik te kʼax mukʼ te bejbe* yak ta mukʼubelxane, jaʼ te kutsilaltik ta sbajtelkʼinal,
18 melel ma jaʼuk ya jtʼojan jsitik-a te bintik chikanik ta ilele, jaʼ ya jtʼojan jsitik-a te bintik ma chikanuk ta ilele. Melel jkʼaxelnax ay te bintik chikanik ta ilele, yan stukel te bintik ma chikanuk ta ilele sbajtelkʼinal ay.
Notaetik
^ O jaʼniwan ya skʼan ya yal «te jkʼaxel ma jnaʼtikix te bin ya jpastike».
^ O «xkechkon».
^ O «xkechkon».
