Schebal carta ta stojol te Corintioetik 6:1-18
6 Jich bitʼil te joy jbatik ta aʼtel sok te Diose, jaʼnix jich ya jkʼanbeyexkotik te manchuk ya awichʼik te slekil yoʼtan Dios te ma snujpʼuk ya kichʼtik teme patil ya xchʼay ta awoʼtanik te bin swentail te la awichʼike.
2 Melel jich ya yal te Dios: «La kaʼiybat akʼop ta yorail sok la jkoltayat ta skʼajkʼalel kolel». ¡Jaʼ mero yorailix ini! ¡Ta ora ini, jaʼix skʼajkʼalel kolel!
3 Mame ayuk bin yakotik ta spasel yuʼun ya skʼojchin sba kuʼuntik-a te yantike, yuʼun jich maʼyuk machʼa ya yalbey chopol* skʼoplal te kaʼteltike.
4 Te bin ya jkʼantik jaʼ te lekuk jkʼoplaltik te bitʼil j-abatotik yuʼun Dios ta spisil te bin ya jpastike: te kʼalal ya xkujch kuʼuntik bayal pruebaetik, wokoliletik, te kʼalal maʼyuk te bin ya xtuun kuʼuntik, te bintik tulan ya xtal ta jtojoltik,
5 te kʼalal ya kichʼtik majel, chukel, awtayel ta kontrainel yuʼun te ants winiketik, kʼalal tulan aʼtejotik, ay maba wayotik, ay maba weʼotik;
6 maʼyuk bin chopol* yakotik ta spasel, ya jnaʼtik te bin-utʼil ayotik ta kuxinel, lamal koʼtantik sok ay slekil koʼtantik, jaʼ ya kakʼ jbatik ta tojobtesel yuʼun te chʼul espiritue,* smelelil ya kakʼtik ta ilel te skʼuxul koʼtantik,
7 smelelil te bin ya kaltik, jaʼ smukʼulinoj koʼtantik te yuʼel te Dios, jtsakojtik ta jwaʼel kʼabtik sok ta jkʼexam kʼabtik te aʼtejibal yuʼun te bin stojil ta pasele;
8 te kʼalal ya kichʼtik ichʼel ta mukʼ o te kʼalal ma xkichʼtik ichʼel ta mukʼ, te kʼalal lek ya kichʼtik ilel o kʼalal maba lek ya kichʼtik ilel. Ay ya skuyotik ta jloʼlaywanejetik, manchukme jaʼ ya kaltik te bin smelelile;
9 ay ma snaʼbotik jbatik ta skʼopik te ants winiketik, manchukme naʼbil jbatik ta lek; jich ya yilik te yakotik ta lajele, manchukme kuxulotik; jich ya yilik te kichʼojtik castigoe, manchukme maba akʼbilotik ta lajel;
10 jich ya skuyik te ayotik ta mel-oʼtan, manchukme spisil-ora tseʼel koʼtantik; jich ya yilotik te pobreotik, manchukme bayal machʼatik ya kakʼbeytik skʼulejalik; jich ya skuyik te maʼyuk bin ay kuʼuntik, manchukme ay kuʼuntik spisil.
11 Corintioetik, jamalme kʼopojonkotik ta atojolik sok la jam koʼtankotik ta atojolik.
12 Te joʼonkotike ma pʼisbiluknax te skʼuxul koʼtantik ta atojolike, yan te jaʼexe apʼisojik te skʼuxul awoʼtanik ta jtojolkotike.
13 Jaʼ yuʼun —jich ya jkʼoponex te bin-utʼil kal jnichʼnab— akʼaik ta ilel te kʼuxotik ta awoʼtanik, jich te bin-utʼil kʼuxex ta koʼtankotik, jaʼnix jich jama te awoʼtanike.
14 Mame xa achuk abaik ta jun yugo-te’* te maba pajal sok te machʼatik maba jchʼuunjeletike. Melel, ¿pajalbal te bin toj ta pasel sok te bin chopole?* O ¿pajalbal te sakal kʼinal sok te ijkʼal kʼinale?
15 ¿Junbal yoʼtan sba sok Cristo te Satanase?* ¿Junbal yoʼtan te jchʼuunjel* sok te machʼa maba jchʼuunjele?
16 ¿Snujpʼbal te ya x-ayin lokʼombaetik ta templo yuʼun te Diose? Melel joʼotik te templootik yuʼun te kuxul Diose. Jich te bin-utʼil yaloj te Diose: «Joʼon ya xnainon sok ya xbeenon ta yolilik, joʼon Dioson ya xkʼoon yuʼunik, sok jaʼ lum kuʼun ya xkʼotik».
17 «Jaʼ yuʼun lokʼanik ta yolilik sok parte xa awakʼ abaik —xchi te Jehová—* mame xa apikik te bin boloben skʼoplale», «jichme ya kikʼex ta jtojol».
18 «‹Joʼon Tatilon ya xkʼoon awuʼunik, jaʼex achʼix keremex ya xkʼoex kuʼun›, xchi te Jehová,* te Machʼa spisil ya xjuʼ yuʼune».
Notaetik
^ O «ma lek».
^ O «ma lek».
^ Jchʼix teʼ te ya skʼajtanik ta snejkʼelik yuʼun ya skuchik ijkatsil.
^ Ta griego: «skʼaxuntayel te ley». Jaʼ te ya yichʼ pʼajel te leyetik yuʼun te Diose.
^ Ta griego: «Belial». Jaʼ jpʼal kʼop te talem ta hebreo kʼop te ya skʼan ya yal «jkʼaxel ma xtuun».
^ O «te machʼa jun yoʼtan ta stojol Dios».
