Schebal carta ta stojol te Corintioetik 7:1-16
7 Jich yuʼun, kermanotak te kʼuxex ta koʼtane, ta swenta te bin jamal yalojbotik te Diose, akʼa kijkitaytik jilel spisil te bintik ya sbolobtes te jbakʼetaltik sok te koʼtantike, bejbeukme* ya jchʼultes jbatik ta swenta te xiʼel* te Diose.
2 Kʼuxukme xa awaʼiyotik ta awoʼtanik. Te joʼotik maʼyuk machʼa ay bin chopol* jpasojbeykotik, maʼyuk machʼa kakʼojkotik ta chʼayel sok maʼyuk machʼa jloʼlayojkotik.
3 Ma yuʼunuk ya jlebeyex amulik te bitʼil jich ya kalbeyexe, melel ay la kalbeyexix te ayex ta koʼtankotike, chikan teme pajal ya xlajotik o pajal ya xkuxinotik.
4 Jamal ya xkʼopojon ta atojolik. Kʼax leknax kʼinal ya kaʼiy ta awentaik. Bayal smukʼul kʼinal ya kaʼiy sok kʼax tseʼel koʼtan manchukme bayal jwokoltik.
5 Ta melel, maba xkuxet kʼinal la kaʼiykotik te kʼalal kʼootik ta Macedonia, lananix jtatik bayal jwokoltik-a: ay la jta jwokolkotik yuʼun te jkontrataktik sok ay xiwel ta koliltik.
6 Pero, te Dios te ya smukʼubtesbey kʼinal yaʼiy te machʼatik ayik ta mel-oʼtane, la yakʼbotik smukʼul kʼinal kaʼiytik te kʼalal jul te Titoe.
7 Ma jaʼuknax la yakʼ smukʼul kʼinal te bitʼil jule, jaʼnix jich la awakʼbeyik smukʼul kʼinal yaʼiy-euk. Jaʼ la yalbotik te awoʼtanukik ya akʼan ya awilonik, te bayal ya amel awoʼtanik ta jtojol sok te kʼaxto ya anaʼonike, jaʼ la yakʼbonxan bayal stseʼelil koʼtan-abi.
8 Jaʼ yuʼun, teme la amel awoʼtanik yuʼun te carta te la jtikunbeyexe, maba ya jmel koʼtan yuʼun. Manchukme aynix la jmel koʼtan ta sjajchibal (te kʼalal la kil te la amel awoʼtanik yuʼun te carta, manchukme maba jalaj te mel-oʼtan awuʼunike),
9 ta ora ini tseʼel koʼtan, pero ma jaʼuk yuʼun te la kakʼbeyex amel awoʼtanike, jaʼ tseʼel koʼtan yuʼun te bitʼil la asujtes awoʼtanik ta skaj te la amel awoʼtanike. Te bitʼil la amel awoʼtanike jaʼ te bitʼil lek ya yil te Diose, jich maba la ata awokolik ta jwentatik.
10 Melel te mel-oʼtan te lek ya yil te Diose ya yakʼ sujtes koʼtantik te ya jta jkoleltik yuʼune, jaʼ-abi maʼyuk machʼa ya smel yoʼtan yuʼun, yan stukel te mel-oʼtan ya yaʼiyik te ants winiketik ta balumilal ya yakʼ lajel.
11 ¡Ilawilik te bintik lek lokʼem awuʼunik-a te jich la amel awoʼtanik te bitʼil lek ya yil te Diose! Yakʼoj te jaʼexnix lek akʼoplalik, te ya x-ilinex yuʼun te bin chopol,* te ya xiwex, te ay bin lek ya akʼan ya apasik, te jun awoʼtanik ya awakʼbeyik yipal, te ya atojobtesik te banti chʼayemexe. Ta spisil ini, awakʼojik ta ilel te maʼyuk amulike.
12 Manchukme jich la jtsʼibaybeyex-abi, ma jaʼuk la jtsʼibay ta stojol te machʼa la spas te bin chopol* ni jaʼuk ta stojol te machʼa la yichʼ pasbeyel te bin chopole, jaʼ ta swenta te ya xchiknaj ta ilel ta awolilik sok ta stojol Dios te la achʼuunik spasel te mantal te la kalbeyexkotike.
13 Jaʼ-abi la yakʼbotik smukʼul kʼinal kaʼiytik.
Pero, ma jaʼuknax la jtatik smukʼul kʼinal kaʼiytik, jaʼnix jich la yakʼbotikxan stseʼelil koʼtantik te stseʼelil yoʼtan te Titoe, melel ta apisilik la awakʼbeyik smukʼul yoʼtan.
14 Melel, teme lek akʼoplalik la kalbeyex ta stojol te Tito, maba jtaoj kʼexlal yuʼun. Jichnix te bin-utʼil smelelil spisil te bin la kalbeyexe, jaʼnix jich chiknajem ta ilel te smelelil te bintik la kalbeytik te Tito ta atojolike.
15 Jaʼnix jich, bayaltoxan kʼuxex ta yoʼtan te kʼalal ya xjul ta yoʼtan te la achʼuunik mantal ta apisilik sok te la awichʼik ta mukʼ te kʼalal kʼot ta atojolike.
16 Tseʼel koʼtan yuʼun te ya xjuʼ ya kakʼ smukʼul koʼtan ta atojolik te ya apasik te bin stojil ta pasele.
