Schebal carta ta stojol te Corintioetik 8:1-24
8 Ta ora ini, kermanotak, ya jkʼantik te yakuk anaʼik te la yichʼikix akʼbeyel te congregacionetik te ayik ta Macedonia te slekil yoʼtan Dios te ma snujpʼuk ya kichʼtike.
2 Manchukme kʼax tulan prueba ta stojolik te la sta swokolik yuʼune, kʼax tseʼelnax yoʼtan la yakʼik te bintik ay yuʼunik manchukme kʼax pobreik. Jich chiknaj ta ilel te kʼax jelawen te bin la yakʼike.
3 Joʼon testigoon yuʼun te la yakʼik spisil te bintik ay yuʼunike, kʼaxtoxan jich la yakʼik-a te bin-utʼil juʼ yuʼunik yakʼele,
4 stukel lokʼ ta yoʼtanik te la skʼanbotik bayal wokol te yakuk xjuʼ ya yakʼik-euk te bintik ay yuʼunike, melel jich la yilik te bin-utʼil jun majtanil sok jich ya xkoltaywanik ta aʼtel te kʼalal ya staik tulan wokol te machʼatik chʼultesbilike.
5 Kʼaxto jich la yakʼik te bin-utʼil ma jichuk jmaliyojkotik-ae, melel nail la yakʼ sbaik ta stojol te Kajwaltike, jaʼnix jich la yakʼ sbaik ta jtojoltik-euk ta swenta te skʼanojel yoʼtan te Diose.
6 Jich yuʼun la kalbeytik te Tito te akʼa slajin stsobel te majtaniletik la awakʼik sok slekil awoʼtanik, melel jaʼ la sjach ta awolilik te aʼtelil ini.
7 Jaʼ yuʼun, jich te bin-utʼil ay bayal awuʼunik ta swenta ini —jaʼ te ay bayal schʼuunel awoʼtanik, te ya anaʼik ta lek kʼop, te bayal bin ya anaʼik, te bayal sbujtsʼ awoʼtanik sok te bayal kʼuxex ta koʼtankotike—, jaʼnix jich bayalukme xa awakʼik te majtaniletik te kʼalal ya awakʼik sok slekil awoʼtanike.
8 Ta swenta-abi, mame yuʼunuk ya jpasex ta mantal, jaʼnax ya jkʼan ya anaʼik te sok sbujtsʼ yoʼtanik yakik ta yakʼel te yantike, sok jichme ya xchiknaj teme smelelil te skʼuxul awoʼtanike.
9 Melel anaʼojik te bitʼil ay te slekil yoʼtan te Kajwaltik Jesucristo te ma snujpʼuk ya kichʼtike: manchukme jkʼulej-a, la spas sba ta pobre ta atojolik, yuʼun jich jkʼulej kʼoex ta swenta te pobre la yakʼ sbae.
10 Jaʼ yuʼun ya kalbeyex te bin ya jnop ta swenta ini, melel jaʼ ta swenta alekilalik, ayix jun jaʼbil te jajchex ta spasel te aʼtelil ini; ma jaʼuknax-abi, jaʼnix jich sok sbujtsʼ awoʼtanik la awakʼik ta ilel te la akʼan apasike.
11 Jich yuʼun juʼtesaik te aʼtelil la ajachik, akʼaik te jayeb ya xjuʼ awuʼunik yakʼele, jich ya xchiknaj ta ilel te ya akʼan xkoltaywanexe.
12 Melel teme ay machʼa jich yoʼtan ya yakʼe, leknax ilbil ya xkʼot te bin ya yakʼe, jaʼ chikan te jayeb ya xjuʼ yuʼun yakʼele, ma jaʼuk te bin ma xjuʼ yuʼun yakʼele.
13 Ma jaʼuk ya jkʼan te ay awokolik te jaʼexe sok te maʼyuk swokolik te yantike.
14 Te bin ya jkʼan jaʼ te pajaluk te bin ay awuʼunike: te bin sobrail awuʼunik ta ora ini jaʼ ya awakʼbeyik te yantik ta skoltayel te bin ya spas falta yuʼunike, jich te bin sobrail yuʼunike jaʼ ya yakʼbeyex yuʼun jich ya skoltayex-euk teme ay bin ya spas falta awuʼunike, jichme pajal ay bin ay awuʼunik-a.
15 Jich te bin-utʼil tsʼibaybile: «Te machʼa bayal bin ay yuʼune maʼyuk bin la spas sobra yuʼun, te machʼa jtebnax bin ay yuʼune maʼyuk bin la spas falta yuʼun».
16 Ya kalbeytik wokol te Dios te la yakʼbey ta yoʼtan te Tito te ayex ta yoʼtan ta smelelil, jich te bin-utʼil ayex ta koʼtankotik-euke.
17 Ma jaʼuknax lek la yaʼiy ta swenta te bin la kalbeykotike, jaʼnix jich stukel lokʼ ta yoʼtan te ya skʼan ya xbajt yilexe, tseʼelnax yoʼtan yuʼun.
18 Jaʼ la kakʼtik sjokin bael te hermano te lek albil skʼoplal ta spisil te congregacionetik ta skaj te bin ya spas yuʼun te lek yachʼil kʼope.
19 Ma jaʼuknax-abi, jaʼnix jich la yichʼ tsael yuʼun te congregacionetik yuʼun ya sjokinotik bael te kʼalal ya xbajt jpuktik te majtaniletik te la awakʼik sok slekil awoʼtanik swenta ya yichʼ albeyel yutsil skʼoplal te Kajwaltike, yuʼun jich ya xchiknaj te ya jkʼantik te ya xkoltaywanotike.
20 Yuʼun jich maʼyuk machʼa ya slebotik jmultik ta swenta te bin-utʼil jwentainojkotik te majtaniletike.
21 Melel ya jpastik tulan te stojiluk spisil te bin ya jpastik, ma jaʼuknax ta stojol te Jehová,* jaʼnix jich ta stojol te ants winiketike.
22 Jaʼnix jich ay jtul kermanotik te pajal la jtikuntik sok te hermanoetik, te bayal buelta kilojtikix te jun yoʼtan sok yakʼoj ta ilel te ya yoʼtanin spasel te aʼtelil akʼbile. Pero, ta ora ini kʼaxtoxan ya yoʼtanin spasel te aʼtelile, melel ay smukʼul yoʼtan ta atojolik.
23 Pero, teme ay bin ya akʼan ya anaʼik ta stojol te Titoe, naʼaikme te jaʼ joy ta aʼtel sok te ya x-aʼtej ta swenta alekilalik. O teme ay machʼa xchebet yoʼtan ta swenta te kermanotaktike, naʼaikme te jaʼ jpuk-kʼopetik yuʼun te congregacionetik sok te ya yichʼ albeyel yutsil skʼoplal te Cristo ta swentaik.
24 Jich yuʼun akʼbeya yilik te kʼux ta awoʼtanike sok akʼbeya yilik te congregacionetik te bin yuʼun leknax kʼinal ya kaʼiytik ta atojolike.
