Schebal carta ta stojol te Corintioetik 9:1-15
9 Ta swenta te koltayel ya awakʼik ta stojol te machʼatik chʼultesbilike, ma puersa ya jtsʼibaybeyex stukel,
2 melel jnaʼoj te sok sbujtsʼ awoʼtanik ya xkoltaywanexe, kalojbey yutsil akʼoplalik ta stojol te macedonioetik, la kaltiklanbey yaʼiyik te ayix jun jaʼbil te chapalex ta yakʼel koltayel jaʼex te ayex ta Acaya. Jaʼnix jich, ta swenta te sbujtsʼ awoʼtanike jteb ma spisilik stijojbey yoʼtanik ta spasel-euk.
3 Pero ya jtikunbeyex ta atojolik te hermanoetik ini swenta jich chapalexix ta lek-a, jich te bin-utʼil kalojixe, yuʼun jich ma tojoluknax la kaltik te sok sbujtsʼ awoʼtanik ya xkoltaywanexe.
4 Melel te yakuk sjokinonik bael te macedonioetik, pero teme maba chapalexe, joʼonkotikme ya jtatik kʼexlal ta skaj te la kaltik lek akʼoplalik, sok jaʼnixme jich ya ataik kʼexlal yuʼun-euk.
5 Jaʼ yuʼun la jkʼanbey wokol te hermanoetik te yakuk xnailajik te banti ayexe, yuʼun jich ya achajpanik nail te majtaniletik te la awalik te ya awakʼike. Jichme chapalix awuʼunik-a te majtaniletik te ya awakʼik sok slekil awoʼtanik, ma jaʼuk te sujbiluk ya awaʼiy abaik ta yakʼele.
6 Jich te bin-utʼil ya yichʼ alel ini, te machʼa jtebnax ya yaʼiy tsʼunbajel jtebnax te bin ya stsob, yan te machʼa bayal ya yaʼiy tsʼunbajel bayal te bin ya stsobe.
7 Ta jujuntul akʼa yakʼ jaʼ chikan jayeb snopoj ta yoʼtan te ya yakʼe, mame xchebetuk awoʼtan ya awakʼ sok mame sujbiluk ya awaʼiy aba, melel te Dios kʼux ta yoʼtan te machʼa ya yakʼ sok stseʼelil yoʼtan.
8 Ta melel, te Dios ya xjuʼ ya yakʼ pʼoluk ta atojolik te slekil yoʼtan te ma snujpʼuk ya kichʼtike yuʼun jich maʼyuk bin-ora ya spas falta te bin ya xtuun awuʼunike sok aytomexan awuʼunik yuʼun ya apasik lekil aʼteliletik.
9 (Jich te bin-utʼil tsʼibaybil: «Te bintik ay yuʼune ma pʼisbiluk spuktiklanoj sok yakʼojbey te machʼatik pobreetike. Sok sbajtelkʼinal ay te bin stojil ya spase».
10 Te machʼa ya yakʼbey bayal sit awal tsʼunubil te machʼa ya yaʼiy tsʼunbajele sok ya yakʼbey te pan ya sweʼe, jaʼnixme ya yakʼ te sit awal tsʼunubil sok jaʼnixme ya yakʼ xpʼol swenta ya atsʼunik sok jich ya yakʼ xpʼol te sit te bin stojil ya apasike).
11 Te jaʼexe bayal ta chajp yakex ta akʼbeyel akʼulejalik yuʼun jich bayal bin-utʼil ya xjuʼ ya awakʼik ta majtanil-euk, jich ta jwentakotik yame yichʼ albeyel wokol Dios ta swenta te majtaniletik ya awakʼike.
12 Melel te aʼtelil yakotik ta spasele ma jaʼuknax ya jpastik ta stojol te machʼatik chʼultesbilik te kʼalal ay bin bayal ya xtuun yuʼunik, jaʼnix jich te yakuk jnaʼtik yalel wokol ta stojol te Diose.
13 Jichme ya yalbeyik yutsil skʼoplal te Diose, melel te kʼalal ya awakʼik te koltayel* ini, jich ya awakʼik ta ilel te ya achʼuunik te lek yachʼil kʼop ta swenta te Cristo, jich bitʼil la awakʼik ta naʼel ta komonsitil sok te ma pʼisbiluk ya awakʼik te majtaniletik ta stojolik sok ta spisil te yantike.
14 Te kʼalal ya skʼoponik Dios ta atojolike, yame yakʼbeyik snaʼ te Dios te kʼuxex ta yoʼtanik ta skaj te jelawen te slekil yoʼtan Dios te ma snujpʼuk ya kichʼtik te la yakʼbeyex awilike.
15 Kalbeytik wokol Dios yuʼun te majtanil te maʼyuk bin ya spajbey yutsilale.
Notaetik
^ Ta griego: «koltayel ta yorail tulan wokolil».
