Schebal carta yuʼun Juan 1:1-13
1 Joʼon te mamalon, ya jtsʼibaybat te carta ini, jaʼat kermanatik ants* te tsabilat sok te awalatake, jaʼex te kʼuxex ta koʼtan ta smelelil —ma joʼukon-nax, jaʼnix jich kʼuxex ta yoʼtan-euk spisil te machʼatik snaʼojikix te smelelil kʼope—
2 ta swenta te smelelil kʼop te ay ta jtojoltik sok te sbajtelkʼinal ya x-ayin ta jtojoltik.
3 Te slekil yoʼtan Dios te ma snujpʼuk ya kichʼtik, te ya snaʼ yoʼbolil jbatik, te lamalkʼinal te talem ta stojol te jTatik Dios sok te Jesucristo, te sNichʼan te Tatile, yame x-ayin ta jtojoltik sok kʼuxul oʼtanil sok smelelil.
4 La yakʼbon bayal stseʼelil koʼtan kʼalal la jnaʼ stojol te ay chaʼoxtul te awalatak te yakik ta beel ta smelelil kʼop, jich te bin-utʼil la kichʼtik albeyel ta mantal yuʼun te Tatile.
5 Jaʼ yuʼun, ta ora ini ya jkʼanbat wokol, kermanatik ants,* te talel kʼaxel kʼuxuk ya kaʼiy jbatik. (Maba ya jtsʼibaybat yachʼil mantalil, jaʼnix te antiguo mantalil te kichʼojtik akʼbeyel ta sjajchibalto tale).
6 Jich ay skʼoplal te kʼuxul oʼtanile: jaʼ te maba ya jkom jbatik ta schʼuunel te mantaliletik yuʼune. Jich te bin-utʼil awaʼiyojik ta sjajchibale, jaʼ te mantalil ini: jaʼ te ma xa akom abaik ta yakʼel ta ilel te kʼux ya awaʼiy abaike.
7 Melel chiknajemix bayal jloʼlaywanejetik ta balumilal, jaʼik te machʼatik ma xyalik ta jamal te xtaluk ta chʼichʼbakʼet te Jesucristoe. Jaʼ ini jaʼ te jloʼlaywanej sok te anticristo.
8 Tsajtayame* abaik yuʼun ma xchʼay awuʼunik te bin aʼtejemotik yuʼune sok jich tsʼakal ya awichʼik te amajtanike.
9 Spisil te machʼa ay bin ya yakʼ ta nopel te ma jichuk la yakʼ ta nopel te Cristoe sok teme maba ya x-ayin ta stojol te nojptesel-abi, maba ay ta yoʼtan te Diose. Te machʼa ya x-ayin ta stojol te nojptesel yuʼun te Cristoe ay ta yoʼtan te Tatil sok te Nichʼanile.
10 Teme ay machʼa ya xtal ta atojolik te ma jichuk ya yakʼ ta nopel ini, mame xa awikʼik ochel ta anaik sok mame xa apatbeyik yoʼtan.
11 Melel te machʼa ya spatbey yoʼtane pajal chopol* yaʼtel ya xkʼot sok.
12 Manchukme bayal te bin ya jkʼan ya jtsʼibaybeyexe, maba ya jkʼan ya jtsʼibay ta jun sok ta tinta, melel jnopoj te ya xbajt jkʼoponex yuʼun jich ya kilbey jba jsitik-a sok jich tsʼakal ya xkʼot te stseʼelil awoʼtanike.
13 Ya stikunbat spatjibal awoʼtan te yalatak awix te tsabile.
Notaetik
^ Jaʼniwan skʼoplal jun congregación.
^ Jaʼniwan skʼoplal jun congregación.
^ O «Ilame».
^ O «ma lek».
