Schebal carta yuʼun Pedro 1:1-21
1 Joʼon Simón Pedroon, te j-abaton sok jpuk-kʼopon yuʼun te Jesucristo, ya jtsʼibaybeyex te carta ini, jaʼex te ay schʼuunel awoʼtanik te mukʼ skʼoplal jich te bin-utʼil te kuʼuntike, te jaʼ ta swenta te toj la yilotik te Dios kuʼuntik sok te Jesucristo te Jkoltaywanej kuʼuntike:
2 Bejbe* toyukxan ta atojolik te slekil yoʼtan Dios te ma snujpʼuk ya kichʼtik sok te lamalkʼinal ta swenta te anaʼojbeyikix sba ta lek te Dios sok te Kajwaltik Jesucristo,
3 melel jaʼnix ta swenta te yuʼel te Dios te yakʼojbotik spisil te bintik ya xtuun kuʼuntik ta jkuxlejaltik sok te ya xjuʼ ya kichʼtik ta mukʼ ta swenta te ya jnaʼbeytikix sba ta lek te machʼa la yikʼotik tal ta stojol ta swenta yutsilal sok slekil yoʼtan.
4 Ta swenta ini yakʼojbotik ta jtojoltik te bintik jamal yaloj Dios te kʼax tʼujbil sok te mukʼ skʼoplale, swenta ya awichʼbeyik te taleliletik yuʼun te Diose, jich te bitʼil lokʼexix tal ta anel ta schopolil te balumilal te chiknajem ta swenta te bin ya smulan spasel te bakʼetalile.
5 Jaʼ swentail te pasaik tulan te bantito kʼalal ya xjuʼ awuʼunik swenta lek te schʼuunel awoʼtanik; teme lek te schʼuunel awoʼtanik, ya skʼan te lek te atalelik; teme lek te atalelik, ya skʼan ay bin ya anaʼik ta lek;
6 teme ay bin ya anaʼik ta lek, ya skʼan ya anaʼik skomel abaik; teme ya anaʼ skomel abaik, ya skʼan ya xkujch awuʼunik; teme ya xkujch awuʼunik, ya skʼan te junuk awoʼtanik ya awichʼik ta mukʼ te Diose;
7 teme jun awoʼtanik ya awichʼik ta mukʼ te Diose, ya skʼan te kʼuxuk ya awaʼiy abaik jich te bin-utʼil kʼux ya yaʼiy sbaik te machʼatik jun-nax smeʼ statik; teme kʼux ya awaʼiy abaik jich te bin-utʼil kʼux ya yaʼiy sbaik te machʼatik jun-nax smeʼ statik, ya skʼan te kʼuxuk ya awaʼiy abaik.
8 Melel teme ay awuʼunik ini sok teme ya xpʼolxan ta awoʼtanike, jaʼme ya skoltayex yuʼun maba ya xchʼajubex o te maba ya xkomex ta spasel te bin lek* ta swenta te ya anaʼbeyik sba ta lek te Kajwaltik Jesucristoe.
9 Melel machʼauk-a te maʼyuk yuʼun spisil ini ma xyil kʼinal, ya smak sit yuʼun ma skʼan ya yil sakal kʼinal,* sok chʼayix ta yoʼtan te la yichʼix pokbeyel lokʼel te smul te la spas ta nailaltoe.
10 Jich yuʼun, kermanotak, pasaikxan tulan yuʼun maba ya achʼayik te bitʼil la awichʼikix ikʼel sok te la awichʼikix tsaele, melel teme ma xa akom abaik ta spasel spisil ini, jichme maʼyuk bin-ora ya xyalex.
11 Ta melel, jichme ya xjambotex jun ochibal te ay yutsilal te banti ay te Wentainel* ta sbajtelkʼinal yuʼun te Kajwaltik Jesucristo te Jkoltaywanej kuʼuntike.
12 Jaʼ yuʼun, spisil-ora ya jkʼan ya jultesbeyex ta awoʼtanik spisil ini, manchukme ya anaʼikix sok te awakʼojix ta awoʼtanik te smelelil kʼop te ay ta atojolike.
13 Pero, stojil ya kil te ya jultesbeyex ta awoʼtanik, yuʼun jich ya jtijbeyex awoʼtanik jich bitʼil te ayonto ta nailpakʼ* ini,
14 melel jnaʼoj te nopolix* ya kichʼ lokʼesel bael ta nailpakʼ* ini, jich te bin-utʼil la yakʼbon jnaʼ-euk te Kajwaltik Jesucristoe.
15 Sok yame jpas tulan ta spisil-ora te bantito kʼalal ya xjuʼ kuʼun, yuʼun jich ya xjuʼ awuʼunik sjultesel ta awoʼtanik spisil ini te kʼalal maba liʼ ayonix-ae.
16 Te kʼalal la kakʼbeyexkotik anopik ta swenta te yuʼel sok te kʼalal liʼ ayix-a* te Kajwaltik Jesucristoe, maba la jlokʼesbeytik tal skʼoplal ta swenta lotil kʼopetik, melel joʼonkotiknix la kilbeytik te yutsilale.
17 Melel toybot skʼoplal sok akʼbot yutsilal yuʼun te jTatik Dios, jaʼ ini kʼot ta pasel te kʼalal jich la yal te Dios te ay yutsilale: «Jaʼ jNichʼan ini te mero kʼux ta koʼtane; kʼax lek koʼtan yuʼun te bin ya spase».
18 Jich, la kaʼiykotik te kʼopetik te tal ta chʼulchan te kʼalal jokinojkotik ta chʼul wits-ae.
19 Jich ya jnaʼtikxan te smelelil te skʼop te j-alwanejetik, lek te ya awichʼik ta wenta jich te bin-utʼil tsumbil kʼajkʼ te ya xtil ta ijkʼal kʼinal (jaʼto te kʼalal ya sakub tal te kʼinal sok te kʼalal ya xlokʼ tal te ekʼ te ya yakʼ xojobil) ta awoʼtanik.
20 Te bin mukʼ skʼoplal jaʼ te anaʼojik te maʼyuk jpʼal albilkʼop ta sJun Dios te lokʼem tal ta yoʼtan jtul ants winik.
21 Melel maʼyuk bin-ora yichʼoj alel jun albilkʼop ta swenta skʼanojel yoʼtan jtul ants winik, jaʼ wentainotik yuʼun te chʼul espíritu* te winiketik te jich kʼopojik ta swenta Dios.
Notaetik
^ O «Xkechkon».
^ O «ta sitinel».
^ O jaʼniwan ya skʼan ya yal «ma xyil kʼinal, ma xyil lek kʼinal».
^ Jaʼ skʼoplal te sbakʼetal liʼ ta balumilal.
^ O «tijilix».
^ Jaʼ skʼoplal te sbakʼetal liʼ ta balumilal.
