Schebal carta yuʼun Pedro 3:1-18
-
Te jlabanwanejetik maba ya yichʼik ta mukʼ te nopolix te lajinele (1-7)
-
Ma yuʼunuk yak ta jalajel te Jehová (8-10)
-
Jnoptik te bin yilel ya skʼan ya kakʼtik ta ilel te jtaleltike (11-16)
-
Yachʼil chʼulchan sok yachʼil balumilal (13)
-
-
Ya skʼan wikʼiluk jsitik ta spisil-ora yuʼun jich maba ya kichʼtik loʼlayel (17, 18)
3 Kermanotak te kʼuxex ta koʼtan, jaʼix te schebal carta ini te ya jtsʼibaybeyex ta atojolike, jichnix te bin-utʼil ta sbabial cartae, ya jtijbeyex awoʼtanik te ayuk lek snopojibal awuʼunik,
2 yuʼun jich ya xjul ta awoʼtanik te bin la yalik jilel ta nailalto te chʼul j-alwanejetike sok te mantalil te la yakʼ te Kajwaltik te Jkoltaywanej kuʼuntik ta swenta te jpuk-kʼopetik awuʼunike.
3 Pero, te bin tulanxan skʼoplale, jaʼ te ya skʼan ya anaʼik te ya xchiknaj jlabanwanejetik te kʼalal nopolix-a* te slajibal kʼajkʼale sok jaʼnaxme ya spasik te bin ya skʼan yoʼtanike,
4 sok jichme ya yalik: «Yaloj ta jamal te ya xtale,* pero ¿banti ay? Melel jaʼto tal te kʼalal way sbakʼetalik te antiguo jmeʼ jtatik, spisil te bintik ay stalel jich ay, maʼyuk bin jelonem jtebuk kʼalalto tal ta sjajchibal spisil te bintik pastiklanbile».
5 Spasemal yoʼtanik ma skʼan ya sjultes ta yoʼtanik te bitʼil jich la yal te Dios ta nameye, te akʼa chiknajuk chʼulchan sok te akʼa chiknajuk lumkʼinal ta sba te jaʼetik soknix ta yolil te jaʼetike.
6 Jaʼnix ta swenta te jaʼetik-abi te la yichʼ lajinel te balumilal te kʼalal noj ta jaʼ.
7 Pero, ta swenta te jichnix la yal te Diose, te chʼulchan sok te balumilal te ayik ta ora ini, kechelik ta lajinel ta kʼajkʼ sok kʼejbilik jaʼto ta Skʼajkʼalel ichʼel ta kʼop* soknix te kʼalal ya yichʼik lajinel te ants winiketik te chopolike.*
8 Kermanotak te kʼuxex ta koʼtan, mame xchʼay ta awoʼtanik ini: te jun kʼajkʼal jaʼ jmil jaʼbil kʼoem yuʼun te Jehová* sok te jmil jaʼbil jaʼ jun kʼajkʼal kʼoem yuʼun.
9 Ma yuʼunuk yak ta jalajel te Jehová* yuʼun ya skʼotes ta pasel te bin jamal yaloje, jich te bin-utʼil ay machʼatik ya skuyik te ya xjalaje. Te bin yak ta spasele, jaʼ te sok slamalil yoʼtan yak smaliybelex, melel ma skʼan te ni jtuluk ya yichʼ lajinel, jaʼ ya skʼan te yakuk sujtes yoʼtanik ta spisilik.
10 Pero, te skʼajkʼalel te Jehová* jichme ya xtal te bin-utʼil jtul j-elekʼ. Ta kʼajkʼal-abi, te chʼulchan ya xchʼay bael jich te bin-utʼil ay bin tulan ya xkʼopoj,* sok spisil te bintik ay ta chʼulchan sok ta balumilal yame xlilaj ta kʼajkʼel, jaʼnixme jich ya yichʼ akʼel ta ilel ta jamal spisil te bintik yak ta pasel ta balumilal.
11 Te bitʼil jich ya xjin spisil ini, ¡nopaikme te bin yilel ya skʼan ya awakʼik ta ilel te atalelike! Ya skʼan te chʼultesbiluk te atalelik sok akʼaik ta ilel te awichʼojik ta mukʼ te Dios
12 te kʼalal yakex ta smaliyel sok te awoʼtanukik ya xkʼotix yorail te kʼalal liʼ ayix-a te skʼajkʼalel te Jehová,* te jaʼ ya yichʼ lajinel ta kʼajkʼ te chʼulchane sok yame x-ulub ta kʼajkʼ spisil te bintik ay ta chʼulchan sok ta balumilal.
13 Pero ayme yachʼil chʼulchan sok yachʼil balumilal te yakotik ta smaliyel jich te bin-utʼil jamal yaloj te Diose, te banti ya x-ayin te bin toj ta pasele.
14 Jich yuʼun, kermanotak te kʼuxex ta koʼtan, jich bitʼil te yakex ta smaliyel spisil ini, pasaik tulan bantito kʼalal ya xjuʼ awuʼunik yuʼun jich maʼyuk awabakulik,* amulik sok lamaluk awoʼtanik te kʼalal ya xjul staex te Diose.
15 Jaʼnix jich, jichukme xa awilik te jaʼ ta swenta akolelik te bitʼil yak ta maliywanej te Kajwaltike, jichnix te bin-utʼil la stsʼibaybeyex-euk te kermanotik Pablo te kʼux ta koʼtantik ta swenta te spʼijil yoʼtan te la yichʼ akʼbeyele.
16 Jaʼ te bin la yalbey skʼoplal-euk ta spisil te cartaetik yuʼune. Pero ay bintik wokol ta naʼbeyel swentail tey-a te ya sjelbeyik skʼoplal te machʼatik maʼyuk bin ya snaʼik sok te machʼatik xchebet yoʼtanik, jichnix te bitʼil ya sjelbeyik skʼoplal te bintik tsʼibaybil ta sJun Dios, jaʼ jich yakik ta sleel te lajinel yuʼunike.
17 Jaʼ yuʼun, kermanotak te kʼuxex ta koʼtan, jich bitʼil te ya anaʼikix ini, wikʼilukme asitik ta spisil-ora yuʼun jich maba ya awichʼik loʼlayel jich te bin-utʼil la yichʼik loʼlayel yuʼun te machʼatik chopolike* sok te jich ya achʼayik te bitʼil jun awoʼtanike.
18 Te bin ya skʼan ya apasike, jaʼ te bejbeuk* ya xmukʼubex ta swenta te slekil yoʼtan Dios te ma snujpʼuk ya kichʼtike sok ta swenta te ya anaʼbeyik sba te Kajwaltik Jesucristo te Jkoltaywanej kuʼuntike. Akʼa yichʼ albeyel yutsil skʼoplal ta ora ini sok ta sbajtelkʼinal. Jichuk.
Notaetik
^ O «tijilix-a».
^ O «ma lek stalelike».
^ Jaʼ skʼoplal te ay bin oranax sok jtsʼin-nax ya xkʼopoj.
^ O «ma ijkʼubenukex».
^ O «machʼatik ya skʼaxuntayik te leye».
^ O «xkechkonuk».
