2 Reyes 10:1-36
10 Te Acab ay 70 ta tul snichʼnab ta Samaria. Jich yuʼun, te Jehú la stikun cartaetik ta stojol te machʼatik yichʼoj mukʼ yaʼtelik ta Jezreel, te jwolwanejetik sok te machʼatik ya skanantayik te snichʼnab te Acab* te ayik ta Samaria, jich la yaltiklanbey bael:
2 «Te kʼalal ya xkʼot ta atojolik te carta ini, teyme ayik-a te snichʼnab te awajwalik, te carretaetik yuʼun guerra, te caballoetik, te aʼtejibaletik yuʼun guerra sok te mukʼul lum te banti ayexe joytaybil ta tsʼajkʼ te yichʼoj lek yip.
3 Ta spisil te snichʼnab te awajwalik tsaaik te machʼa tojxan ta winikil sok najkanaik ta smukʼul naktajib te state. Tey-abi akʼaik guerra ta swenta te machʼatik ay yuʼun te awajwalike».
4 Pero kʼaxto la xiʼik sok jich la yalik: «Teme chaʼtul ajwaliletik ma juʼ yuʼunik skoltayel sbaik, ¿bin-utʼil kʼan juʼuk kuʼuntik te joʼotike?».
5 Jich yuʼun, te machʼa ay ta swenta skanantayel te sna te ajwalil, te gobernador yuʼun te mukʼul lum, te jwolwanejetik sok te machʼatik ya skanantayik te snichʼnab te Acab jich la yalbeyik bael te Jehú: «J-abatotik awuʼun sok ya jpastik spisil te bin ya awalbotike. Maʼyuk machʼa ya kotsestik ta ajwalil. Pasa te bin lek ya awile».
6 Tey-abi, te Jehú la schaʼtikun carta ta stojolik te jich ya yale: «Teme jun awoʼtanik ta jtojol sok teme ya achʼuunbonik te jkʼope, ichʼbonik tal te sjol te snichʼnab te awajwalik sok laʼ ilawonik ta jich ora pajel ta Jezreel».
Te 70 ta tul snichʼnab te ajwalil jaʼ sjokinojik-a te winiketik te ichʼbilik te mukʼ ta mukʼul lum te jaʼ chʼitesotik yuʼune.
7 Jaʼnax te kʼalal kʼot ta stojolik te carta, la stsakik sok la smilik te 70 ta tul skerem nichʼnab te ajwalil. La yotsesbeyik ta mochetik te sjolik, jich la stikunbeyik bael te Jehú ta Jezreel.
8 Jich kʼot yal te machʼa yichʼoj bael te kʼope: «La yichʼikix tal te sjol te snichʼnab te ajwalile». Jaʼ yuʼun, jich la yal te Jehú: «Chaʼbus xa awakʼik ta yochibal te mukʼul lum sok ijkitayaik tey-a jaʼto ta pajel».
9 Te kʼalal sakub te kʼinal, lokʼ tal te Jehú, la stejkʼan sba ta stojol te lum sok jich la yal: «Te jaʼexe maʼyuk amulik. Melelnix-a, joʼon la jchap te bitʼil ya jmil te kajwal sok joʼon-nix la jmil, pero ¿machʼa la smiltiklan ini?
10 Naʼaikme te maʼyuk ni jpʼaluk skʼop te Jehová te maba kʼot ta pasel ta spisil te bintik yaloj te Jehová ta stojol te machʼatik ay yuʼun te Acab; jich la skʼotes ta pasel te bin la yal te Jehová ta swenta te Elías te j-abat yuʼune».
11 Jaʼnix jich, te Jehú la smil spisil te machʼatik jilemxan yuʼun te Acab ta Jezreel, spisil te winiketik te mukʼ skʼoplalik, te machʼatik ya snaʼbeyik sba sok te sacerdoteetik yuʼun, jaʼto te kʼalal maʼyuk machʼa kuxul la yijkitaybey te Acab.
12 Jich bajt ta Samaria te Jehú. Ta sbelal te Samaria tey ay-a te na te banti ya sjoxbeyik* stsotsel te tuminchijetike.
13 Te Jehú tey la sta-a te machʼatik ay bin yutoj sba sok te Ocozías te ajwalil yuʼun Judá sok jich la sjojkʼoy: «¿Machʼaex-a?». Jich la yalik: «Jaʼ ay bin kutoj jbatik sok te Ocozías. Talotik yuʼun ya xbajt kiltik teme lek ayik te snichʼnab te ajwalil sok te yalatak te ajwalil antse».
14 Te Jehú jich la yal ta mantal ta oranax: «¡Tsakaik ta spisilik!». Jich yuʼun la stsakik sok la smiltiklanik ta stsʼeel te pozo yuʼun te na te banti ya sjoxbeyik* stsotsel te tuminchijetike. Ta spisilik jaʼ 42 ta tul winiketik, maʼyuk ni jtuluk te kuxul jil yuʼune.
15 Te kʼalal lokʼ bael tey-a te Jehú, la sta sba sok te Jehonadab snichʼan Recab te tal ta tael yuʼune. Te kʼalal la spatbey yoʼtan, jich la sjojkʼoybey: «¿Junbal awoʼtan ta jtojol jich te bitʼil jun koʼtan ta atojole?».
«Jun, jun koʼtan ta atojol», xchi te Jehonadab.
«Teme jiche, akʼbon tal te akʼabe», xchi te Jehú.
Jich la yakʼ skʼab te Jehonadab sok nitot moel ta carreta yuʼun te Jehú.
16 Tey-abi, jich la yal te Jehú: «Laʼ, jokinawon. Yame awil te maba ya kakʼ te ay machʼa ma xyichʼ ta mukʼ te Jehová». Jich te Jehú la yikʼ bael te Jehonadab ta scarreta yuʼun guerra.
17 Te Jehú kʼot ta Samaria sok la smil spisil te machʼatik jilemxan yuʼun te Acab ta Samaria jaʼto te kʼalal la slajin ta jkʼaxele, jich te bitʼil la yal te Jehová ta swenta te Elías.
18 Jaʼnix jich, te Jehú la stsob spisil te ants winiketik sok jich la yal: «Te Acab jtebnax la yichʼ ta mukʼ te Baal, yan te joʼone kʼaxtoxan ya kichʼ ta mukʼ.
19 Tsobaik tal spisil liʼi te j-alwanejetik yuʼun Baal, spisil te machʼatik ya yichʼik ta mukʼ sok spisil te sacerdoteetik yuʼun. Mame xjil ni jtuluk, melel yame kakʼbey bayal milbil majtanil te Baal. Machʼauk-a te ma xjul ta lokʼele yame yichʼ milel». Pero, te Jehú jich la spas yuʼun yak ta loʼlaywanej, melel snopoj te ya smil spisil te machʼatik ya yichʼik ta mukʼ te Baal.
20 Te Jehú jich la yalxan: «Alaik te ya yichʼ pasel jun mukʼul tsoblej te kʼax mukʼ skʼoplal ta stojol te Baal». Jich bajt yalik.
21 Tey-abi, te Jehú la stikun ta alel ta spisil te lum Israel, jich talik spisil te machʼatik ya yichʼik ta mukʼ te Baal. Maʼyuk ni jtuluk te maba kʼot ta lokʼele. Ochik ta templo yuʼun Baal sok kʼax noj yuʼunik.
22 Te Jehú jich la yalbey te machʼa swentainoj te yawil kʼuʼul: «Lokʼesa tal te skʼuʼik te machʼatik ya yichʼik ta mukʼ te Baal». Jich la slokʼes tal.
23 Te Jehú sok te Jehonadab snichʼan Recab ochik ta templo yuʼun Baal. Jich yuʼun, te Jehú jich la yalbey te machʼatik ya yichʼik ta mukʼ te Baal: «Ilawilik ta lek sok lea awilik teme maʼyuk jtuluk te machʼa ya yichʼ ta mukʼ te Jehová, jaʼnaxme ya skʼan liʼ ayik te machʼatik ya yichʼik ta mukʼ te Baal».
24 Jich ochik bael ta yakʼel milbil majtaniletik sok chikʼbil majtaniletik. Jich yuʼun, te Jehú la yakʼ 80 ta tul swiniktak ta fuera sok jich la yaltiklanbey: «Teme ay machʼa ya yakʼ koluk bael jtuluk te winiketik te yakon ta yakʼel ta akʼabike, jaʼme ya yichʼ milel».
25 Jaʼnax te k’alal laj yoʼtan ta yakʼel te chikʼbil majtaniletik, te Jehú jich la spas ta mantal te jkananetik yuʼun sok te soldadoetik te yichʼoj mukʼ yaʼtelik: «¡Ochanik sok miltiklanaik! ¡Mame xkol bael ni jtuluk!». Jich te jkananetik yuʼun sok te soldadoetik te yichʼoj mukʼ yaʼtelik la smilik ta espada te machʼatik ya yichʼik ta mukʼ te Baal, la schʼojik lokʼel ta fuera te sbakʼetalik sok ochik bael kʼalalto ta yutil te templo yuʼun Baal te banti mukʼul lum sbiile.
26 Tey-abi la slokʼesik te balal tonetik te ayik ta templo yuʼun Baal sok la schikʼik spisil.
27 Jaʼnix jich la sjinik te balal ton yuʼun Baal sok la sjinik te templo yuʼun Baal, la skʼatpʼunik ta letrina te stalel ay jaʼto ta ora ini.
28 Te Jehú jaʼ jich la slajin te Baal ta Israel.
29 Pero, te Jehú maba la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel, jaʼ te la yichʼ ta mukʼ jkolel* toroetik te pasbilik ta oro te ayik ta Betel sok ta Dan.
30 Te Jehová jich la yalbey te Jehú: «Ta swenta te la apas te bin lek ta jsit te kʼalal la alajin te machʼatik ay yuʼun te Acab jich te bitʼil la skʼan te koʼtane, yame xnajkaj chankaj atsʼumbal ta mukʼul naktajibal yuʼun Israel».
31 Pero, te Jehú maba la schʼuun spasel sok spisil yoʼtan te bin ya yal te Ley yuʼun te Jehová te Dios yuʼun Israel. Maba la yijkitay spasel te muliletik te la spas te Jeroboán te jich la yakʼbey sta smul te lum Israel.
32 Ta yorail-abi, te Jehová la yakʼ te kʼunkʼun la yichʼik chukel bael te israeletike. Te Hazael la yakʼbey guerra te Israel ta spamal te skʼinale,
33 te jajch tal ta Jordán jaʼto kʼalal ta slokʼib kʼajkʼal, jaʼ spisil te skʼinal Galaad —te skʼinal te Gad, Rubén sok te Manasés— te ya xjajch ta Aroer te ay ta stsʼeel te spamlej yuʼun Arnón jaʼto kʼalal ta Galaad sok ta Basán.
34 Te bintik la spas ta skuxlejal te Jehú, spisil te bintikxan la spas sok te bitʼil tsalawan ta guerraetik, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
35 Jich te Jehú way sbakʼetal sok te antiguo smeʼ stat sok la smukik ta Samaria. Tey-abi, jaʼ och jilel ta ajwalil te Jehoacaz, te snichʼane.
36 Te Jehú la swentain 28 jaʼbil te Israel teyto ta Samaria.
Notaetik
^ Ta hebreo: «te machʼatik ya skanantayik te Acab».
^ Ta yantik variante «sjochbeyik».
^ Ta yantik variante «sjochbeyik».
^ Ta yantik variante «jchʼiel».
