2 Reyes 12:1-21
12 Te Jehoás jaʼ och ta ajwalil te kʼalal ayix jukeb jaʼbil ta ajwalil-a te Jehú, wentainwan 40 jaʼbil ta Jerusalén. Zibíah sbiil te snan* te talem ta Beer-Seba.
2 Te Jehoás jaʼ la spas te bintik lek ya yil te Jehová te jayeb kʼajkʼal nojptesot yuʼun te sacerdote Jehoiadá.
3 Pero maba la yichʼ lajinel te toyol awilaletik* sok maba la skom sbaik te ants winiketik ta yakʼel milbil majtaniletik ta toyol awilaletik soknix la yakʼik te xtomet schʼailel te chikʼbil majtaniletik tey-a.
4 Te Jehoás jich la yalbey te sacerdoteetik: «Tsobaik spisil te takʼin te ya yichʼ akʼel ta sna te Jehová ta swenta te chʼul majtaniletik: te patanil te ya skʼan ya stojik ta jujuntul, te takʼin te ya yichʼ akʼel ta swenta te ay machʼa ay bin jamal ya yal te ya skʼotes ta pasel sok spisil te takʼin te ya yakʼik sok spisil yoʼtanik ta jujuntul ta sna te Jehová.
5 Jaʼnixme te sacerdoteetik ya stsobik te takʼin te ya xtalik ta akʼbeyel sok jaʼme ya stuuntesik ta schajpanel te sna te Dios jaʼ chikan te banti jatemike».
6 Te k’alal ayix 23 jaʼbil ta ajwalil-a te Jehoás, te sacerdoteetik matoba schajpanojik-a te banti jatemik te sna te Diose.
7 Jich yuʼun, te ajwalil Jehoás la stikun ta ikʼel te sacerdote Jehoiadá sok te yantikxan sacerdoteetik, jich la yaltiklanbey: «¿Bin yuʼun te maba yakex ta schajpanel te banti jatemik te sna te Diose? Jaʼ yuʼun ma xa atsakikix te majtan takʼin te yak ta akʼel, jaʼnax teme yuʼun ya atuuntesik ta schajpanel te banti jatemik te sna te Diose».
8 Te sacerdoteetik lek la yaʼiyik te maba ya stsakikix te takʼin te ya yakʼ te lume sok te ma jaʼuk ya swentainik schajpanel te banti jatemik te sna te Diose.
9 Jich yuʼun, te sacerdote Jehoiadá la tsak jun caja, la sjutbey te smajkil sok la yakʼ ta stsʼeel te skajtajib chikʼbil majtanil te ay ta waʼel kʼabal te kʼalal ya x-ochik ta sna te Jehová. Te sacerdoteetik te ya skanantayik te tiʼnail tey ya yakʼik spisil-a te takʼin te ya yichʼik tal ta sna te Jehová.
10 Te kʼalal ya yilik te kʼax bayalix-a te takʼin ta cajae, te secretario yuʼun te ajwalil sok te mukʼul sacerdote ya xbajt stsobik* sok ya yajtayik te takʼin te la yichʼik tal ta sna te Jehová.
11 Te takʼin te ya yichʼ tsobel-ae jaʼ ya yakʼbeyik-a te machʼatik swentainojik te aʼtelil te yak ta pasel ta sna te Jehová. Jich te machʼatik swentainojik te aʼtelil jaʼ ya stojik te j-aʼteletik sok te carpinteroetik te yakik ta aʼtel ta sna te Jehová,
12 soknix ya stojik te albañiletik sok te jtopʼtonetik. Jaʼnix jich la smanik teʼetik sok juxbil tonetik yuʼun ya schajpanik te sna te Jehová soknix la stuuntesik te takʼin yuʼun ya stojik spisil te bintikxan tuun ta sna te Diose.
13 Pero, te takʼin te ya yichʼik tal ta sna te Jehová maba la yichʼ tuuntesel yuʼun ya yichʼ pasel yawil jaʼetik ta plata, te stupʼojibal kʼajkʼ, tazaetik, trompetaetik ni yantikxan biluketik ta oro o plata ta swenta sna te Jehová.
14 Te takʼin-abi jaʼnax ya yakʼbeyik te machʼatik ya spasik te aʼtelil swenta ya stuuntesik ta schajpanel te banti jatemik te sna te Jehová.
15 Maba ya yichʼik jojkʼoybeyel te banti ya stuuntesik te takʼin te winiketik te ya yichʼik te takʼin swenta ya stojik-a te j-aʼteletike, melel ay smukʼul yoʼtanik ta stojolik.
16 Pero, te takʼin te ya yichʼ akʼel yuʼun te majtaniletik ta swenta chʼayel ta stojol Dios sok te takʼin te ya yichʼ akʼel yuʼun te majtaniletik ta swenta mulil maba ya yichʼ ichʼel bael ta sna te Jehová, melel te takʼin-abi jaʼ ya yichʼik te sacerdoteetike.
17 Ta yorail-abi, te Hazael te ajwalil yuʼun Siria mo bael ta yakʼbeyel guerra te Gat sok la yuʼunin. Ta patil la snop te ya xbajt yakʼbey guerra te Jerusalén.
18 Jich yuʼun, te Jehoás te ajwalil yuʼun Judá la stsob spisil te chʼul majtaniletik te la schʼulteslan te antiguo smeʼ stat te Jehosafat, Jehoram sok te Ocozías te jaʼik ajwaliletik yuʼun Judá. Jaʼnix jich la stsob tal te chʼul majtaniletik yuʼune sok spisil te oro te ay ta yawil kʼulejalil ta sna te Jehová sok ta sna te ajwalile. Tey-abi la stikunbey bael te Hazael te ajwalil yuʼun Siria, jich te Hazael maba la yakʼbeyix guerra te Jerusalén.
19 Te bintik la spas ta skuxlejal te Jehoás sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
20 Te j-abatetik yuʼun te Jehoás la schapik te bitʼil ya smilik te Jehoás, jich la smilik ta na te ay ta chʼin wits* ta be te ya xko bael ta Silá.
21 Te j-abatetik yuʼun te Jehoás te jaʼik te Jozacar snichʼan Simeat sok te Jehozabad snichʼan Somer la yejchentesik sok la smilik te Jehoás. La smukik te banti mukul te antiguo smeʼ stat, ta Mukʼul lum yuʼun David. Tey-abi, jaʼ och jilel ta ajwalil te Amasías, te snichʼane.
