2 Reyes 13:1-25
13 Te Jehoacaz snichʼan Jehú och ta ajwalil ta Israel ta Samaria te kʼalal ayix 23 jaʼbil ta ajwalil-a te Jehoás snich’an Ocozías te ajwalil yuʼun Judá sok wentainwan 17 jaʼbil.
2 Jaʼ la spas te bintik ma lek ya yil te Jehová sok maba la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel. Maba la yijkitay spasel.
3 Jaʼ yuʼun, te Jehová bayal ilin ta stojol te lum Israel te jich la yakʼtiklan ta skʼab te Hazael te ajwalil yuʼun Siria sok te Ben-Hadad snichʼan Hazael te jayeb kʼajkʼal kuxulik ta kʼinale.
4 Ta patil, te Jehoacaz la skʼanbey wokol te Jehová, jich aʼiybot skʼop yuʼun te Jehová, melel la yil te bitʼil yak ta utsʼinel* te lum Israel yuʼun te ajwalil yuʼun Siria.
5 Jich yuʼun, te Jehová la yakʼbey jtul jkoltaywanej yuʼun te lum Israel swenta ya skoltay lokʼel ta skʼab te Siria, jich jun yoʼtan kuxin ta snaik te israeletik jich bitʼil ta nailale.*
6 (Pero maba la yijkitayik spasel te muliletik te la spas te stsʼumbal Jeroboán te ja’nix la yakʼbey sta smul te lum Israel. Maba la yijkitayik spasel te muliletik-abi sok tey tekʼel yuʼunik-a te chʼul teʼ yuʼun Aserá* ta Samaria).
7 Te Jehoacaz jaʼxanix jil yuʼun 50 ta tul te machʼatik ya skajtajibinik caballo, lajunkojt carretaetik yuʼun guerra sok 10 mil ta tul soldadoetik, melel lajinotik yuʼun te ajwalil yuʼun Siria jich te bin-utʼil tan te kʼalal ya yichʼ majel te trigo.
8 Te bintik la spas ta skuxlejal te Jehoacaz, spisil te bintikxan la spas sok te bitʼil tsalawan ta guerraetik, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
9 Jich te Jehoacaz way sbakʼetal sok te antiguo smeʼ stat sok la smukik ta Samaria. Tey-abi, jaʼ och jilel ta ajwalil te Jehoás, te snichʼane.
10 Te Jehoás snichʼan Jehoacaz och ta ajwalil ta Israel ta Samaria te kʼalal ayix 37 jaʼbil ta ajwalil-a te Jehoás ta Judá sok wentainwan 16 jaʼbil.
11 Jaʼ la spas te bintik ma lek ya yil te Jehová sok maba la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel. Maba la yijkitay spasel te muliletik-abi.
12 Te bintik la spas ta skuxlejal te Jehoás, spisil te bintikxan la spas, te bitʼil tsalawan ta guerraetik sok te bitʼil la yakʼbey guerra te Amasías te ajwalil yuʼun Judá, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
13 Te Jehoás way sbakʼetal sok te antiguo smeʼ stat, jich te Jeroboán* jaʼ la snajkan sba ta smukʼul naktajib te Jehoás. Te Jehoás la yichʼ mukel ta Samaria te banti mukulik te yantik ajwaliletik yuʼun Israel.
14 Tey-abi, te kʼalal tsakot ta chamel te Eliseo te jaʼ laj bael yuʼune, ko bael ta ilel yuʼun te Jehoás te ajwalil yuʼun Israel. Te Jehoás la spajkan sba ta sba te Eliseo sok jich yak ta yalel ta okʼel: «¡Jtat, jtat! ¡Te carreta yuʼun Israel sok te machʼatik kajajtik ta caballo yuʼune!».
15 Jaʼ yuʼun, jich albot yuʼun te Eliseo: «Tsaka tal jun tʼimalteʼ sok cheʼoxeb flechaetik». Jich yuʼun la yichʼ tal jun tʼimalteʼ sok cheʼoxeb flechaetik.
16 Te Eliseo jich la yalbey te ajwalil yuʼun Israel: «Tsaka te tʼimalteʼ». Jaʼ yuʼun la stsak te tʼimalteʼ, jich te Eliseo la skajan te skʼab ta skʼab te ajwalile.
17 Jich la yal te Eliseo: «Jama te ventana te ay ta slokʼib kʼajkʼal». La sjam te ventana. Jich albot yuʼun te Eliseo: «¡Tʼimuya bael!». Jich la stʼimuy bael. Te Eliseo jich la yal: «¡Te sflecha yuʼun tsalaw te Jehová, te flecha yuʼun tsalaw ta stojol te Siria! Yame atsal te Siria ta Afec jaʼto te kʼalal ya alajin ta jkʼaxele».
18 Jich la yalxan te Eliseo: «Tsaka te flechaetike». Jich te ajwalil la stsak te flechaetike. Jich la yalbey te ajwalil yuʼun Israel: «Maja te lum». Te ajwalil oxeb buelta la smaj te lum, tey-abi la skom sba.
19 Te winik yuʼun te smelelil Dios* ilin ta stojol te ajwalil sok jich la yalbey: «¡La skʼan la amaj joʼeb o wakeb buelta te lum te jichuke! Jich ya atsal te Siria jaʼto te kʼalal ya alajin ta jkʼaxel te jichuke, pero ta skaj-abi jaʼnax ya atsal oxeb buelta».
20 Ta patil laj te Eliseo sok la smukik. Ta sjajchibal te jujun jaʼbil* ya x-ochik tal ta lum jpojbiluketik te talemik ta Moab.
21 Te kʼalal ay chaʼoxtul winiketik yakik ta smukel jtul winik te lajemixe, la yilik te tal te jpojbiluketike, jich yuʼun la schʼojik bael ta oranax ta smukenal te Eliseo te sbakʼetal te winik sok lokʼik bael ta anel. Te kʼalal kʼot te sbakʼetal te winik ta sbakel te Eliseoe, chaʼkuxaj sok la stejkʼan sba.
22 Te jayeb kʼajkʼal kuxin ta kʼinal te Jehoacaz, te Hazael te ajwalil yuʼun Siria la yakʼbey swokol te lum Israel.
23 Pero, te Jehová la snaʼtiklanbey yoʼbolil sba sok la skʼuxultay te israeletik. Ta swenta te chapbilkʼop la spas sok te Abrahán, Isaac sok te Jacob la yichʼtiklan ta wenta. Maba la skʼan la slajinlan sok maba la slokʼeslan bael ta stojol jaʼto ta ora ini.
24 Te kʼalal laj te Hazael te ajwalil yuʼun Siria, jaʼ och jilel ta ajwalil te Ben-Hadad, te snichʼane.
25 Te Jehoás snichʼan Jehoacaz la spojbey sujtel te Ben-Hadad snichʼan Hazael te mukʼul lumetik la spojbey te Jehoacaz, te state, jaʼ te kʼalal la yakʼbey sbaik guerrae. Te Jehoás oxeb buelta la stsal te Ben-Hadad, jich sujtxan ta stojol te mukʼul lumetik yuʼun Israel.
Notaetik
^ Ta yantik variante «ilbajinel».
^ Jaʼ ya skʼan ya yal te maba yakik ta xiwel.
^ Jaʼ skʼoplal te Jeroboán II.
^ Jaʼniwan te kʼalal kʼaxemix yorail-a te sike. Jaʼniwan ta yuilal marzo o abril. Ilawil ta apéndice, B15.
