2 Reyes 15:1-38
15 Te Azarías* snichʼan Amasías te ajwalil yuʼun Judá och ta ajwalil te kʼalal ayix 27 jaʼbil ta ajwalil-a te Jeroboán* te ajwalil yuʼun Israel.
2 Ay 16 yaʼbilal-a te kʼalal och ta ajwalil sok wentainwan 52 jaʼbil ta Jerusalén. Jecolías sbiil te snan* te talem ta Jerusalén.
3 Te Azarías jaʼ la spas te bintik lek ya yil te Jehová, jich te bitʼil la spas te Amasías te state.
4 Pero maba la yichʼ lajinel te toyol awilaletik* sok maba la skom sbaik te ants winiketik ta yakʼel milbil majtaniletik ta toyol awilaletik soknix la yakʼik te xtomet schʼailel te chikʼbil majtaniletik tey-a.
5 Te Jehová la yakʼ te tsakot ta kʼaʼel chamel te ajwalil jaʼto te kʼalal laj baele; parte nain, jaʼ yuʼun te Jotán te snichʼane jaʼ jajch ta swentainbeyel te sna te ajwalil sok jaʼ la schajpan te ants winiketik yuʼun te lume.
6 Te bintik la spas ta skuxlejal te Azarías sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
7 Jich te Azarías way sbakʼetal sok te antiguo smeʼ stat sok la smukik te banti mukul te antiguo smeʼ stat, ta Mukʼul lum yuʼun David. Tey-abi, jaʼ och jilel ta ajwalil te Jotán, te snichʼane.
8 Te Zacarías snich’an Jeroboán och ta ajwalil ta Israel ta Samaria te kʼalal ayix 38 jaʼbil ta ajwalil-a te Azarías ta Judá sok wentainwan wakeb u.
9 Ja’ la spas te bintik ma lek ya yil te Jehová jich te bitʼil la spas te antiguo smeʼ stat. Maba la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel.
10 Jich yuʼun, te Salum snichʼan Jabés la schap te bitʼil ya smil te Zacarías, jich la smil ta Ibleam. Te kʼalal smilojix-ae, jaʼ och jilel ta ajwalil.
11 Te bintik la spas ta skuxlejal te Zacarías, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
12 Jaʼ kʼot ta pasel te bin la yal te Jehová ta swenta Jehú: «Yame xnajkaj chankaj atsʼumbal ta mukʼul naktajibal yuʼun Israel». Jich kʼot ta pasel.
13 Te Salum snichʼan Jabés och ta ajwalil te kʼalal ayix 39 jaʼbil ta ajwalil-a te Uzías te ajwalil yuʼun Judá sok wentainwan jun u ta Samaria.
14 Jich yuʼun, te Menahem snichʼan Gadí lokʼ bael ta Tirzá, mo bael ta Samaria, jich la smil ta Samaria te Salum snichʼan Jabés. Te kʼalal smilojix-ae, jaʼ och jilel ta ajwalil.
15 Te bintik la spas ta skuxlejal te Salum sok te bitʼil la schap te ya smil te ajwalile, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
16 Jich lokʼ bael ta Tirzá te Menahem, la yakʼbey guerra te Tifsá sok la smiltiklan spisil te machʼatik nainemik tey-a soknix te machʼatik ayik ta sjoyobal te skʼinale. Ta skaj te maba jambot te yochibal te mukʼul lum, la slajin sok la sjat-tiklanbey schʼujt spisil te antsetik te yikʼoj yalik.
17 Te Menahem snichʼan Gadí och ta ajwalil ta Israel te kʼalal ayix 39 jaʼbil ta ajwalil-a te Azarías te ajwalil yuʼun Judá sok wentainwan lajuneb jaʼbil ta Samaria.
18 Ja’ la spas te bintik ma lek ya yil te Jehová, sok maʼyuk bin-ora la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel.
19 Te Pul te ajwalil yuʼun Asiria kʼot ta skʼinalik, jich te Menahem la yakʼbey jmil talento* yuʼun plata te Pul swenta ya xkoltayot ta yakʼbeyelxan yichʼ yip te wentainel yuʼune.
20 Jich yuʼun, te Menahem jaʼ la skʼanbey te plata te jkʼulej winiketik sok te winiketik te mukʼ skʼoplalik ta Israel. Ta jujuntul la skʼanbey 50 siclo* yuʼun plata swenta ya yakʼbey te ajwalil yuʼun Asiria. Jich sujt bael te ajwalil yuʼun Asiria sok maba jil ta skʼinalik.
21 Te bintik la spas ta skuxlejal te Menahem sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
22 Jich te Menahem way sbakʼetal sok te antiguo smeʼ stat. Tey-abi, jaʼ och jilel ta ajwalil te Pecahías, te snichʼane.
23 Te Pecahías snich’an Menahem och ta ajwalil ta Israel ta Samaria te kʼalal ayix 50 jaʼbil ta ajwalil-a te Azarías ta Judá sok wentainwan cheb jaʼbil.
24 Ja’ la spas te bintik ma lek ya yil te Jehová. Maba la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel.
25 Jich yuʼun, te capitán yuʼun te soldadoetik yuʼune jaʼ te Pécah snichʼan Remalías la schap te bitʼil ya smil te Pecahías, jich la smil ta Samaria tey ta toyol tsʼajkʼ te yichʼoj lek yip te ay ta sna te ajwalil. Jaʼnix jich la smil te Argob sok te Arié.* Jokinbil yuʼun 50 ta tul winiketik yuʼun Galaad. Te kʼalal smilojix-ae, jaʼ och jilel ta ajwalil.
26 Te bintik la spas ta skuxlejal te Pecahías sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
27 Te Pécah snichʼan Remalías och ta ajwalil ta Israel ta Samaria te kʼalal ayix 52 jaʼbil ta ajwalil-a te Azarías ta Judá sok wentainwan 20 jaʼbil.
28 Ja’ la spas te bintik ma lek ya yil te Jehová. Maba la yijkitay spasel te muliletik te la spas te Jeroboán snichʼan Nebat te la yakʼbey sta smul te lum Israel.
29 Te kʼalal ay ta ajwalil-a te Pécah ta Israel, te Tiglat-Piléser te ajwalil yuʼun Asiria la yochintay sok la yuʼunin te mukʼul lum Ijón, Abel-Bet-Maacá, Janóah, Quedes, Hazor, te skʼinal Galaad, te Galilea soknix spisil te skʼinal Neftalí sok la schuk bael ta Asiria spisil te machʼatik nainemik tey-ae.
30 Jich yuʼun, te Hosea snichʼan Elá la schap te bitʼil ya smil te Pécah snichʼan Remalías, jich la yejchentes sok la smil. Jaʼ och jilel ta ajwalil te kʼalal ayix 20 jaʼbil ta ajwalil-a te Jotán snich’an Uzías.
31 Te bintik la spas ta skuxlejal te Pécah sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Israel.
32 Te Jotán snichʼan Uzías te ajwalil yuʼun Judá och ta ajwalil te kʼalal ayix cheb jaʼbil ta ajwalil-a te Pécah snichʼan Remalías te ajwalil yuʼun Israel.
33 Ay 25 yaʼbilal-a te kʼalal och ta ajwalil sok wentainwan 16 jaʼbil ta Jerusalén. Jerusá sbiil te snan,* jaʼ yantsil nichʼan te Sadoc.
34 Te Jotán jaʼ la spas te bintik lek ya yil te Jehová, jich te bitʼil la spas te Uzías te state.
35 Pero maba la yichʼ lajinel te toyol awilaletik* sok maba la skom sbaik te ants winiketik ta yakʼel milbil majtaniletik ta toyol awilaletik soknix la yakʼik te xtomet schʼailel te chikʼbil majtaniletik tey-a. Jaʼ la spas te puerta te ay ta kajal ta sna te Jehová.
36 Te bintik la spas ta skuxlejal te Jotán sok te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
37 Ta yorail-abi, te Jehová jajch stikun te Rezín te ajwalil yuʼun Siria sok te Pécah snichʼan Remalías yuʼun ya yakʼbeyik guerra te Judá.
38 Jich te Jotán way sbakʼetal sok te antiguo smeʼ stat sok la yichʼ mukel ta Mukʼul lum yuʼun David, jaʼ te antiguo smeʼ stat. Tey-abi, jaʼ och jilel ta ajwalil te Acaz, te snichʼane.
Notaetik
^ Te ya skʼan ya yal «koltaywan te Jehová». Uzías sbiil ta 2 Reyes 15:13; 2 Crónicas 26:1-23; Isaías 6:1 sok ta Zacarías 14:5.
^ Jaʼ skʼoplal te Jeroboán II.
^ Ta yantik variante «smeʼ», «smama».
^ Jaʼ 34,200 kilo. Ilawil ta apéndice, B14.
^ Jaʼ 570 gramo. Ilawil ta apéndice, B14.
^ O jaʼniwan ya skʼan ya yal «te Pécah snichʼan Remalías, Argob sok te Arié la schapik te bitʼil ya smilik te Pecahías, jich la smilik».
^ Ta yantik variante «smeʼ», «smama».
