2 Reyes 16:1-20
16 Te Acaz snichʼan Jotán te ajwalil yuʼun Judá och ta ajwalil te kʼalal ayix 17 jaʼbil ta ajwalil-a te Pécah snichʼan Remalías.
2 Ay 20 yaʼbilal-a te Acaz te kʼalal och ta ajwalil sok wentainwan 16 jaʼbil ta Jerusalén. Jaʼ la spas te bintik ma lek ya yil te Jehová te Dios yuʼune, ma jichuk te bitʼil la spas te David te antiguo smeʼ state.
3 Te bin la spase, jaʼ te la spas-euk te bintik la spas te ajwaliletik yuʼun Israel sok la schikʼ ta kʼajkʼ te snichʼan, jaʼ la skʼayin te bintik ilobtik sba ya spasik te nacionetik te la stentiklan lokʼel te Jehová ta stojol te israeletik.
4 Jaʼnix jich la yakʼ milbil majtaniletik sok la yakʼ te xtomet schʼailel te chikʼbil majtaniletik ta toyol awilaletik,* ta chʼin witsetik sok ta yeʼtal teʼetik te bayal yabinal.
5 Ta yorail-abi, te Rezín te ajwalil yuʼun Siria sok te Pécah snichʼan Remalías te ajwalil yuʼun Israel moik bael ta yakʼbeyel guerra te Jerusalén. La sjoytayik te Acaz, pero maba juʼ yuʼunik yochintayel te mukʼul lume.
6 Ta yorailnix-abi, te Rezín te ajwalil yuʼun Siria la sujtesbey te Edom te lum Elat sok la stentiklan lokʼel te judioetik* ta Elat. Tey kʼotik ta nainel-a te edomitaetik sok teyto ayik jaʼto ta ora ini.
7 Jich yuʼun, te Acaz la stikun bael winiketik ta stojol te Tiglat-Piléser te ajwalil yuʼun Asiria ta yalbeyel jich ini: «J-abaton awuʼun sok anichʼanon. Moan tal sok koltayawon lokʼel ta skʼab te ajwalil yuʼun Siria sok te ajwalil yuʼun Israel te yakik ta yakʼbelon guerra».
8 Jich te Acaz la stsob tal te plata sok te oro te ay ta sna te Jehová sok ta yawil kʼulejalil te ay ta sna te ajwalil, jaʼ la yakʼbey bael smajtanin te ajwalil yuʼun Asiria.
9 Te ajwalil yuʼun Asiria la schʼuun te bin albote, jich yuʼun mo bael ta Damasco sok la yuʼunin, jaʼnix jich la schuk bael ta Quir te machʼatik nainemik tey-a sok la smil te Rezín.
10 Ta patil, te ajwalil Acaz bajt ta Damasco ta yilel te Tiglat-Piléser te ajwalil yuʼun Asiria. Te kʼalal la yil te ajwalil Acaz te skajtajib chikʼbil majtanil te ay ta Damasco, la stikunbey te sacerdote Uriya te slokʼombail te bitʼil pasbil te skajtajib chikʼbil majtanil.
11 Jich te sacerdote Uriya la spas jun skajtajib chikʼbil majtanil jich te bitʼil albot tal yuʼun te ajwalil Acaz ta Damasco. Te kʼalal ayto ta Damasco-a te ajwalil Acaz, te sacerdote Uriya juʼ yuʼun spasel te skajtajib chikʼbil majtanil.
12 Te kʼalal sujt tal ta Damasco te ajwalil sok la yil te skajtajib chikʼbil majtanil, noptsaj* ta stojol yuʼun ya yakʼ chikʼbil majtaniletik tey-a.
13 Maba la skom sba ta yakʼel majtaniletik yuʼun sit awal tsʼunubiletik sok chikʼbil majtaniletik te xtomet schʼailel ta skajtajib te chikʼbil majtanil-abi. Jaʼnix jich la smal ta stojol te malbil majtaniletik sok la stsijtsin te schʼichʼel te milbil majtaniletik ta swenta lamalkʼinal.
14 Jaʼ yuʼun la slokʼes bael ta slugar te skajtajib chikʼbil majtanil te pasbil ta cobre te ay ta stojol te Jehová sok ta stojol te templo —te ay ta olil yuʼun-a te sna te Jehová sok te skajtajib chikʼbil majtanil la spase— la yak’ bael ta stojol norte jaʼ te banti ay te skajtajib chikʼbil majtanil yuʼune.
15 Te ajwalil Acaz jich la spas ta mantal te sacerdote Uriya: «Tey ta mukʼul skajtajib chikʼbil majtanil xtometukme schʼailel awuʼun te chikʼbil majtanil te ya yichʼ akʼel ta sab soknix te majtanil yuʼun sit awal tsʼunubil te ya yichʼ akʼel ta mal kʼajkʼal, te chikʼbil majtanil te ya yakʼ te ajwalil sok te majtanil yuʼun sit awal tsʼunubil te ya yakʼe, jaʼnix jich te chikʼbil majtaniletik, te majtaniletik yuʼun sit awal tsʼunubil sok te malbil majtaniletik te ya yakʼik spisil te ants winiketik. Jaʼnix jich yame atsijtsinbey spisil te schʼichʼel te chikʼbil majtaniletik sok te yantikxan milbil majtaniletik. Ta swenta te skajtajib chikʼbil majtanil te pasbil ta cobre yato kil te bin ya jpasbeye».
16 Te sacerdote Uriya jich la spas spisil te bin albot ta mantal yuʼun te ajwalil Acaz.
17 Jaʼnix jich, te ajwalil Acaz la setʼtiklan lokʼel te spajkʼul te carroetik te ayik ta jujunjejch sok la slokʼeslan te yawil jaʼetik. Te Mukʼul yawil jaʼ te kajal ta spat te toroetik te pastiklanbil ta cobre la skojtes sok la skajan ta sba tonetik te ay ta lum.
18 La slokʼes bael ta sna Jehová te smujkil te yichʼoj pasel tey-a te ya xtuun ta sábado sok la smak te tiʼnail te banti ya x-och te ajwalil te kʼalal ya xbajt ta templo. Jich la spas swenta lek yoʼtan yuʼun-a te ajwalil yuʼun Asiria.
19 Te bintik la spas ta skuxlejal te Acaz sok te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
20 Jich te Acaz way sbakʼetal sok te antiguo smeʼ stat sok la yichʼ mukel ta Mukʼul lum yuʼun David. Tey-abi, jaʼ och jilel ta ajwalil te Ezequías,* te snichʼane.
Notaetik
^ O «winiketik yuʼun Judá».
^ Ta yantik variante «jijtsʼaj», «tijtsaj».
^ Te ya skʼan ya yal «te Jehová ya yakʼ yip oʼtanil».
