2 Reyes 18:1-37
18 Te Ezequías snichʼan Acaz te ajwalil yuʼun Judá och ta ajwalil te kʼalal ayix oxeb jaʼbil ta ajwalil-a te Hosea snichʼan Elá te ajwalil yuʼun Israel.
2 Ay 25 yaʼbilal-a te kʼalal och ta ajwalil sok wentainwan 29 jaʼbil ta Jerusalén. Abí* sbiil te snan,* jaʼ yantsil nich’an te Zacarías.
3 Te Ezequías jaʼ la spas te bintik lek ya yil te Jehová, jich te bitʼil la spas te David te antiguo smeʼ state.
4 Ja’ te machʼa la slajin te toyol awilaletik,* te balal tonetik te ya yichʼik ta mukʼ sok te chʼul teʼ yuʼun Aserá.* Jaʼnix jich la swuy te chan te la spas ta cobre te Moisés, melel ta yorail-abi te lum Israel yakik ta yakʼel te xtomet schʼailel te chikʼbil majtanil yuʼunik ta stojol. La yakʼbeyik sbiilin Nehustán.*
5 Te Ezequías la smukʼulin yoʼtan te Jehová te Dios yuʼun Israel. Ta spisil te ajwaliletik yuʼun Judá te kʼaxik ta nail sok ta patil, maʼyuk machʼa la spajbey yoʼtan te Ezequías.
6 Jun yoʼtan la yak’ sba ta stojol te Jehová. Maba la skom sba ta stʼunel. La schʼuun spasel te mantaliletik te la yichʼ akʼbeyel yuʼun Jehová te Moisés.
7 Jokinbil yuʼun te Jehová. La spas sok spʼijil yoʼtan spisil te bintik la spase. La stoy sba ta stojol te ajwalil yuʼun Asiria sok maba la yakʼ sba ta abatinel ta stojol.
8 Jaʼnix jich la stsal te filisteoetik, och ta skʼab te Gaza sok spisil te skʼinale, jichnix bitʼil te toyol tsʼajkʼetik yuʼun yilojibal kʼinal sok te mukʼul lumetik te joytaybilik ta tsʼajkʼetik te yichʼoj lek yip.*
9 Te kʼalal ayix chaneb jaʼbil ta ajwalil-a te Ezequías —ja’ te k’alal ayix jukeb jaʼbil ta ajwalil-a te Hosea snichʼan Elá te ajwalil yuʼun Israel—, te Salmanasar te ajwalil yuʼun Asiria mo bael ta yakʼbeyel guerra te Samaria sok la sjoytay.
10 Ta yoxebal jaʼbil la yichʼ uʼuninel te Samaria. La yichʼ uʼuninel te kʼalal ayix wakeb jaʼbil ta ajwalil-a te Ezequías, ja’ te k’alal ayix baluneb jaʼbil ta ajwalil-a te Hosea ta Israel.
11 Jich yuʼun, te ajwalil yuʼun Asiria la schuktiklan bael te israeletik ta Asiria sok la yakʼ nainukik ta Halá sok ta Habor te ay ta stsʼeel te mukʼul jaʼ Gozán soknix ta mukʼul lumetik yuʼun te medoetik.
12 Jich kʼot ta pasel, melel maba la schʼuunbeyik skʼop te Jehová te Dios yuʼunike, maba la yichʼik ta wenta te chapbilkʼop yuʼune, jaʼ te mantaliletik la yal te Moisés te j-abat yuʼun te Jehová. Maba la yichʼik ta wenta sok maba la schʼuunik kʼop.
13 Te kʼalal ayix 14 jaʼbil ta ajwalil-a te Ezequías, te Senaquerib te ajwalil yuʼun Asiria mo bael ta yakʼbeyel guerra spisil te mukʼul lumetik yuʼun Judá te joytaybilik ta tsʼajkʼetik te yichʼoj lek yip sok la yuʼunin te mukʼul lumetik-abi.
14 Jich yuʼun, te Ezequías te ajwalil yuʼun Judá jich la stikun ta albeyel te ajwalil yuʼun Asiria ta Lakís: «Ma lek te bin la jpase. Lokʼan bael ta jkʼinal sok ya kakʼbat spisil te bin ya akʼanbone». Jich te ajwalil yuʼun Asiria la skʼanbey te Ezequías te ajwalil yuʼun Judá 300 talento* yuʼun plata sok 30 talento* yuʼun oro.
15 Jich yuʼun, te Ezequías la yakʼbey spisil te plata te ay ta sna te Jehová sok te ay ta yawil kʼulejalil ta sna te ajwalil.
16 Ta yorail-abi, te Ezequías te ajwalil yuʼun Judá la slokʼes te puertaetik yuʼun te templo yuʼun te Jehová sok te smarcoil te puertaetik te jaʼnix la spots ta oro, la yakʼbey te ajwalil yuʼun Asiria.
17 Jich te ajwalil yuʼun Asiria la stikun bael te tartán,* rabsarís,* rabsaqué* sok bayal ta tul soldadoetik te lokʼik bael ta Lakís, bajtik ta Jerusalén, jaʼ te banti ay te ajwalil Ezequías. Moik bael ta Jerusalén sok tey la yakʼ sbaik ta stsʼeel te be jaʼ te pasbil te ya xtal ta estanque te ay ta toyol, ta sbelal skʼinal te sakʼojibal pakʼ.
18 Te kʼalal la stikunik ta ikʼel te ajwalil, jaʼ lokʼ tal te Eliaquim snichʼan Hilquías, jaʼ te machʼa swentainojbey te sna te ajwalil, te Sebná te secretario sok te Joá snichʼan Asaf, jaʼ te machʼa ya stsʼibay te bin ya xkʼot ta pasel.
19 Jich yuʼun, jich la yal te rabsaqué: «Awokolukik, jichme xa awalbeyik te Ezequías: ‹Jich ya yal te mukʼul ajwalil, te ajwalil yuʼun Asiria: «¿Bin yuʼun te smukʼulinoj sba awoʼtanike?
20 Jich ya awal: ‹Ay bin jchapoj ta koʼtan spasel sok ay kip ta yakʼel guerra›, pero jaʼnax tojol kʼopetik. ¿Machʼa smukʼulinoj awoʼtanik te ya xtal atoy abaik ta jtojole?
21 Te ya kile, ja’ smukʼulinoj awoʼtan te ya skoltayat te Egipto, te jalal* te wakʼelixe,* te ayuk machʼa ya stsak sba tey-ae ya xlowot kʼaxel ta skaj te ya xwakʼe. Jaʼ jich te faraón te ajwalil yuʼun Egipto sok spisil te machʼatik ya yakʼ smukʼul yoʼtanik ta stojole.
22 Pero, teme jich ya awalbonik, ‹Jaʼ ay smukʼul koʼtantik ta stojol te Jehová te Dios kuʼuntik›, ¿yuʼunbal ma jaʼuk yuʼun-a te toyol awilaletik* sok te skajtajib chikʼbil majtaniletik te la slokʼes te Ezequías sok te jich la yalbey te Judá sok te Jerusalén ‹Jaʼme ya skʼan ya akejan abaik ta stojol te skajtajib chikʼbil majtanil te ay ta Jerusalén›?»›.
23 Chapa akʼop sok te kajwal, jaʼ te ajwalil yuʼun Asiria: ya kakʼbat 2 mil ta kojt caballoetik, kiltik teme ya xjuʼ awuʼun sleel te machʼatik ya skajtajibinike.
24 Jich bitʼil te ya smukʼulin awoʼtan te carretaetik yuʼun guerra sok te machʼatik ya xkajajik ta caballo yuʼun te Egipto, ¿yanixbal xjuʼ awuʼun stsalel jtuluk-a te gobernador yuʼun te kajwal te maʼyuk lek yip ta yakʼel guerra?
25 ¿Yuʼunbal ya akuy te ma jaʼuk ta swenta smantal Jehová te tal jlajin te lugar ini? Jaʼnix te Jehová te jich la yalbone: ‹Moan bael ta yakʼbeyel guerra te lum ini sok lajina›».
26 Ta swenta te bin la yale, te Eliaquim snichʼan Hilquías, te Sebná sok te Joá jich la yalbeyik te rabsaqué: «Awokoluk, kʼopona ta arameo* kʼop te j-abatetik awuʼun ini, melel ya kaʼiykotik. Ma xa akʼopononkotik ta skʼop te judioetik yuʼun jich ma xyaʼiyik stojol-a te machʼatik ayik ta sba te tsʼajkʼe».
27 Pero, jich albotik yuʼun te rabsaqué: «¿Yuʼunbal jaʼnax ta atojolik sok ta stojol te awajwalik te la stikunon tal te kajwal yuʼun jich ya kal ta atojolik? ¿Yuʼunbal ma jaʼuk tal kal ta stojolik-euk te winiketik te nakajtik ta sba te tsʼajkʼ, jaʼik te machʼatik ya sloʼ stsaʼik sok ya yuchʼ schuxik jich bitʼil te jaʼexe?».
28 Jich yuʼun, te rabsaqué jich tulan la yal ta skʼop te judioetik: «¡Aʼiya awaʼiyik te bin ya yal te mukʼul ajwalil, jaʼ te ajwalil yuʼun Asiria!
29 Jich ya yal te ajwalil: ‹Ma xa awakʼ abaik ta loʼlayel yuʼun te Ezequías. Ma xjuʼ ya skoltayex lokʼel ta jkʼab.
30 Mame xa awakʼ smukʼul awoʼtanik ta stojol te Jehová ta skaj te jich ya yalbeyex te Ezequías «Jaʼnanixme ya skoltayotik-a te Jehová. Te mukʼul lum ini maba ya x-och ta skʼab te ajwalil yuʼun Asiria».
31 Ma xa awaʼiybeyik skʼop te Ezequías, melel jich ya yal te ajwalil yuʼun Asiria: «Jchap jkʼoptik yuʼun ya x-ayin lamalkʼinal sok ak’a abaik ta jkʼab. Jichme jun awoʼtan ya aweʼik te sit tsʼusub awuʼunik sok te sit higuera awuʼunik soknix yame awuchʼbeyik yaʼlel te pozo awuʼunike,
32 jaʼto teme talon yuʼun ya kikʼex bael ta yan kʼinal jich bitʼil te awuʼunike. Ta kʼinal te banti ya yakʼ trigo, cebada sok tsʼusubetik yuʼun ya apasik pan sok vino awuchʼik, ta kʼinal te banti ay olivoetik sok chab. Jichme ya xkuxinex, maba ya xlajex. Ma xa awaʼiybeyik skʼop te Ezequías, melel ya sloʼlayex te kʼalal jich ya yalbeyex ‹Jaʼ ya skoltayotik te Jehová›.
33 ¿Aybal junuk te diosetik yuʼun te nacionetik te juʼem skoltayel te slumal ta skʼab te ajwalil yuʼun Asiria?
34 ¿Banti ay te diosetik yuʼun te Hamat sok te Arpad? ¿Banti ay te diosetik yuʼun te Sefarvaim, te Hená sok te Ivá? ¿Juʼembal yuʼunik skoltayel lokʼel ta jkʼab te Samaria?
35 Ta spisil te diosetik yuʼunike, ¿machʼa diosil te juʼem yuʼun skoltayel lokʼel ta jkʼab te lum yuʼune? Jich yuʼun, ¿yabal xjuʼ yuʼun te Jehová ta skoltayel lokʼel ta jkʼab te Jerusalén?»›».
36 Pero, te ants winiketik ma la sjakʼik, maʼyuk bin la yalik ni jpʼaluk, melel jich albotik yuʼun te ajwalile «Mame xa ajakʼik te kʼope».
37 Tey-abi, te Eliaquim snichʼan Hilquías, jaʼ te machʼa swentainojbey te sna te ajwalil, te Sebná te secretario sok te Joá snichʼan Asaf, jaʼ te machʼa ya stsʼibay te bin ya xkʼot ta pasel, bajt stejkʼan sbaik ta stojol te Ezequías, schʼiʼoj* bael skʼuʼik sok la scholbeyik yaʼiy te bin la yal te rabsaqué.
Notaetik
^ Jaʼ te bitʼil ta alel ta komnax te biilil Abías.
^ Ta yantik variante «smeʼ», «smama».
^ Ta hebreo: «slokʼombail chan te pasbil ta cobre».
^ Jaʼ ya skʼan ya yal ta spisil lumetik, chikan teme bayal o ma bayal yajwalul.
^ Jaʼ 1,026 kilo.
^ Jaʼ 10,260 kilo. Ilawil ta apéndice, B14.
^ O «capitán».
^ O «te machʼa yichʼoj mukʼ yaʼtel ta stojol te ajwalil».
^ O «te machʼa yichʼoj mukʼ yaʼtel ta skʼasesel copa».
^ O «carrizo».
^ Ta yantik variante «kʼaselixe».
^ O «sirio».
^ Ta yantik variante «xetʼoj».
