2 Reyes 19:1-37
19 Ja’nax te k’alal jich la yaʼiy stojol te ajwalil Ezequías, la schʼiʼ* skʼuʼ yuʼun sok la slap chʼixal pakʼ,* jich och bael ta sna te Jehová.
2 Jich yuʼun la stikun bael te Eliaquim, jaʼ te machʼa swentainojbey te sna te ajwalil, te Sebná te secretario sok te jwolwanejetik yuʼun te sacerdoteetik ta yilel te j-alwanej Isaías snichʼan Amoz, slapojik bael chʼixal pakʼ.*
3 Jich kʼot yalik: «Jich ya yal te Ezequías: ‹Yoʼtik jaʼ skʼajkʼalel wokolil, utel sok kʼexlaltesel, jichonkotik te bin-utʼil jtul ants te ya x-ayin* yal, pero maʼyuk yip yuʼun alajel.
4 Yaniwan yaʼiy te Jehová te Dios awuʼun spisil te bintik la yal te rabsaqué, jaʼ te machʼa tikunot yuʼun te yajwal te ajwalil yuʼun Asiria ta slabanel te kuxul Dios, sok akʼa yichʼ castigo ta swenta te bintik la yal te la yaʼiy stojol te Jehová te Dios awuʼune. Jich yuʼun, awokoluk, kʼopona Dios ta stojol te machʼatik kuxuliktoe›».
5 Jich yuʼun, te j-abatetik yuʼun te ajwalil Ezequías ochik bael te banti ay te Isaías,
6 jich albotik yuʼun te Isaías: «Jichme xa awalbeyik te ajwalil awuʼunik: ‹Jich ya yal te Jehová: «Mame xiwat yuʼun te bitʼil la sbolkʼoptayon te j-abatetik yuʼun te ajwalil yuʼun Asiria, jaʼ te kʼopetik te la awaʼiy stojol te la yalike.
7 Ayme bin ya kakʼbey ta yoʼtan, yame xjul kʼop* ta stojol, jichme ya sujt bael ta slumal sok ya kakʼ te ya yichʼ milel ta espada ta slumalnix»›».
8 Te kʼalal la yaʼiy stojol te rabsaqué te lokʼix bael ta Lakís te ajwalil yuʼun Asiria, bajt yil ta Libná te banti yak ta yakʼel guerrae.
9 Jich kʼot yalbeyik te ajwalil ta swenta te Tirhacá te ajwalil yuʼun Etiopía: «Talme yakʼbatix guerra». Tey-abi la schaʼtikun bael winiketik ta stojol te Ezequías yuʼun jich ya yalbeyik ini:
10 «Jichme ya skʼan ya awalbeyik te Ezequías te ajwalil yuʼun Judá: ‹Mame xa awakʼ sloʼlayat te Dios awuʼun, te machʼa smukʼulinoj awoʼtan, te kʼalal jich ya yalbat «Te Jerusalén maba ya x-och ta skʼab te ajwalil yuʼun Asiria».
11 ¡Ilawil! ¿Yuʼunbal maba awaʼiyoj stojol te bin la spasik te ajwaliletik yuʼun Asiria ta stojol spisil te lumetik te la slajinike? ¿Yabal akuy te ya xkolate?
12 ¿Yuʼunbal la yichʼik koltayel yuʼun te sdiosik te lumetik te la yichʼik lajinel yuʼun te antiguo jmeʼ jtate? ¿Banti ayik ta ora ini te Gozán, Harán, Rézef sok te ants winiketik yuʼun Edén te nainik ta Tel-Asar?
13 ¿Banti ay te ajwalil yuʼun Hamat, te ajwalil yuʼun Arpad sok te ajwaliletik yuʼun te mukʼul lumetik yuʼun Sefarvaim, Hená sok te Ivá?›».
14 Te Ezequías la stsak te cartaetik te jul ta akʼbeyel yuʼun te winiketik sok la skʼopon. Ta patil mo bael ta sna te Jehová sok la slejchan ta stojol te Jehová.
15 Jich te Ezequías jajch skʼopon te Jehová sok jich la yalbey: «Kajwal, Jehová, Dios yuʼun Israel, te nakalat ta amukʼul naktajib ta sba* te querubinetik, jaʼatnax te smelelil Dios* ta spisil te lumetik ta balumilal. Jaʼat la apas te chʼulchan sok te balumilal.
16 ¡Kajwal, Jehová, tsʼeana achikin sok aʼiya awaʼiy te bin la yichʼ alele! ¡Kajwal, Jehová, jama asit sok ilawil! Chʼama awaʼiy te bin la yal tal te Senaquerib yuʼun ya slabanat, jaʼat te kuxul Diosate.
17 Yuʼun-nix jich-a, Kajwal, Jehová, te ajwaliletik yuʼun Asiria slajinojik te lumetik sok te skʼinalike.
18 La schʼojbeyik ta k’ajkʼ te diosetik yuʼunik, melel manix diosetikuk-a, jaʼ yaʼtel skʼab ants winiketik te pasbilik ta teʼ sok ta ton. Jaʼ yuʼun juʼ yuʼunik slajinel.
19 Jich yuʼun, ta ora ini Kajwal, Jehová Dios kuʼuntik, awokoluk, koltayawonkotik lokʼel ta skʼabik swenta jich ya snaʼik spisil te lumetik ta balumilal te jaʼatnax Diosat, Kajwal, Jehová».
20 Jich yuʼun, te Isaías snichʼan Amoz jich la stikun ta albeyel te Ezequías: «Jich ya yal te Jehová te Dios yuʼun Israel: ‹La kaʼiy stojol te oración la apas ta jtojol ta swenta te Senaquerib te ajwalil yuʼun Asiria.
21 Jich ya yal te Jehová ta skontrainel te ajwalil yuʼun Asiria:
«Te achʼix yuʼun Sion te maba tabil ta winik ya spʼajat sok ya slabanat.
Te kʼalal ya yilat te achʼix yuʼun Jerusalén, ya sjimulan sjol yuʼun ya stseʼlayat.
22 ¿Machʼa-a te la alaban sok machʼa-a te la abolkʼoptay?
¿Machʼa-a te la atoy akʼop ta stojolsok te la atoy asit ta stojol sok stoybail awoʼtan?
¿Mabal joʼukon te chʼul Dioson yuʼun Israel?
23 Ta swenta te j-abatetik awuʼun la alaban te Jehová sok jich la awal:‹Ya xmoon bael ta sba te witsetiksok te bayal ta kojt carretaetik kuʼun yuʼun guerra,sok ya xkʼoon kʼalalto ta skʼubulil kʼinal yuʼun Líbano.
Yame jtsʼet-tiklan te mukʼul cedro-teʼetik sok te lekil enebro-teʼetik yuʼun.
Yame xkʼoon kʼalalto te banti anakʼoj abaike, ta banti toyem teʼetik.
24 Yame jokʼ pozoetik sok ya kuchʼbey yaʼlel, te jaʼ yuʼun te jyanlumetik;ya jtakijtes sok kok te mukʼul jaʼetik yuʼun Egipto›.
25 ¿Yuʼunbal ma awaʼiyoj stojol te ayix tiempo te jich la jta ta nopele?
Ayix tal bayal tiempo te jich jchajpanoj.
Ta ora ini ya kakʼ kʼotuk ta pasel.
Ya awakʼ te jinem ya xjilik te mukʼul lumetik te joytaybilik ta tsʼajkʼetik te yichʼoj lek yip.
26 Maʼyuk bitʼil ya xjuʼ ya skoltay sbaikix te machʼatik nainemik tey-a;yame xnoj ta xiwel te yoʼtanik sok yame yichʼik kʼexlaltesel.
Jichme ya xkʼotik te bin-utʼil akiltik sok yaxal jaʼmal,*jich te bin-utʼil jaʼmal te ya xchʼi ta ba na te ya xchikʼot yuʼun te ikʼ te ya xtal ta stojol slokʼib kʼajkʼal.
27 Pero, te joʼone ya jnaʼ ta lek te bin-ora nakalat, te bin-ora ya xlokʼat, te bin-ora ya x-ochat,sok te bin-ora kʼax ilinemat ta jtojole,
28 julix ta jtojol te awilinba sok te awawe.
Ya jlukbat xotxot-takʼin ta aniʼ sok ya kakʼbat freno ta awe,sok ya kakʼ sujtat bael te banti talate».
29 »›Jaʼme señail ya xkʼot awuʼun ini, Ezequías: te jaʼbil ini jaʼme ya aweʼik te bin stukel ya xchʼi tal ta lumkʼinal, ta schebal jaʼbil jaʼnixme ya aweʼbeyik sit te bin stukel chʼie, pero ta yoxebal jaʼbil yame awaʼiyik tsʼunbajel sok yame atsobeyik sit, yame atsʼunik tsʼusub sok yame aloʼbeyik sit.
30 Te machʼatik ya xkolik jilel ta stsʼumbal Judá yame xkʼub ochel te slojpʼ o yisim* sok yame yakʼ bayal sit.
31 Melel ay machʼatik ya xkolik jilel ta Jerusalén sok ay machʼatik kuxul ya xjilik ta wits Sion. Ta swenta te skʼanojel yoʼtan te Jehová te jwolwanej yuʼun te soldadoetik* jich ya skʼotes ta pasel.
32 »›Ja’ yuʼun, jich ya yal te Jehová ta stojol te ajwalil yuʼun Asiria:
«Maba ya x-och tal ta mukʼul lum ini,maba ya stʼimuy ni junuk flecha ta stojol,maba ya yichʼ tal majkilaletik yuʼun ya skontrain,maba ya spasik smoibik ta spat tsʼajkʼ yuʼun ya yochintayik.
33 Teynixme ya sujt bael-a te banti tale;maba ya x-och ta mukʼul lum ini», xchi te Jehová.
34 «Yame jkoltay sok yame jkanantay te mukʼul lum ini ta swenta te jbiilsok ta swenta te David te j-abat kuʼune»›».
35 Ta ajkʼabalnix-abi lokʼ tal te chʼul-abat yuʼun te Jehová, la smil 185 mil ta tul winiketik ta campamento yuʼun te asirioetike. Te machʼatik sab jajchik ta yan kʼajkʼal la yilik te limil ta lum te machʼatik lajike.
36 Jich bajt te Senaquerib te ajwalil yuʼun Asiria, sujt bael ta Nínive sok tey jil-a.
37 Kʼalal te Senaquerib ay ta templo ta yichʼel ta mukʼ-a te Nisroc te dios yuʼune, kʼot ta milel ta espada yuʼun te snichʼnab jaʼ te Adramélec sok te Sarézer. Ta patil lokʼik bael ta anel ta skʼinal Ararat. Tey-abi, jaʼ och jilel ta ajwalil te Esar-Hadón, te snichʼane.
Notaetik
^ Ta yantik variante «xetʼ».
^ Ta yantik variante «xpʼejkaj», «xtojk».
^ Ta yantik variante «aʼiyej».
^ O jaʼniwan ya skʼan ya yal «yolil».
^ Ta yantik variante «wamal».
^ Ta yantik variante «yejkʼach».
^ Jaʼ skʼoplal te chʼul-abatetik ta chʼulchan.
