2 Reyes 2:1-25
2 Kʼalal te Jehová nopol* ya yikʼix bael ta chʼulchan-a* te Elías ta sutu-ikʼ, te Elías sok te Eliseo lokʼik bael ta Guilgal.
2 Te Elías jich la yalbey te Eliseo: «Awokoluk, jilan liʼi, melel te Jehová la stikunon ta Betel». Pero, jich la yal te Eliseo: «Jamal ya kalbat ta stojol Jehová te kuxul Dios sok te kuxulat-euk te maba ya kijkitayate». Jich koik bael ta Betel.
3 Jich yuʼun, te snichʼnab te j-alwanejetik* te ayik ta Betel lokʼ staik te Eliseo sok jich la sjojkʼoybeyik: «¿Anaʼojbal te yoʼtik ya yikʼ bael te Jehová te awajwal sok te maba ya snojptesatixe?». Jich la yal te Eliseo: «Jnaʼoj, jnaʼojix. Pero ma xa awalbeyikix skʼoplal».
4 Jich la yal te Elías: «Eliseo, awokoluk, jilan liʼi, melel te Jehová la stikunon ta Jericó». Pero, jich la sjakʼ te Eliseo: «Jamal ya kalbat ta stojol Jehová te kuxul Dios sok te kuxulat-euk te maba ya kijkitayat». Jich kʼotik ta Jericó.
5 Jich yuʼun, te snichʼnab te j-alwanejetik te ayik ta Jericó noptsajik* bael ta stojol te Eliseo sok jich la sjojkʼoybeyik: «¿Anaʼojbal te yoʼtik ya yikʼ bael te Jehová te awajwal sok te maba ya snojptesatixe?». Jich la yal te Eliseo: «Jnaʼoj, jnaʼojix. Pero ma xa awalbeyikix skʼoplal».
6 Jich la yal te Elías: «Awokoluk, jilan liʼi, melel te Jehová la stikunon ta Jordán». Pero, jich la sjakʼ te Eliseo: «Jamal ya kalbat ta stojol Jehová te kuxul Dios sok te kuxulat-euk te maba ya kijkitayat». Jich bajtik ta schebalik.
7 Jaʼnix jich bajtik-euk 50 ta tul te snichʼnab te j-alwanejetik, sok namalto* tekʼajtik jilel ta yilel te Elías sok te Eliseo te ayik ta stiʼil te mukʼul jaʼ Jordán.
8 Jich yuʼun, te Elías la sbal te skʼuʼ yuʼun j-alwanej sok jaʼ la smaj-a te mukʼul jaʼ, jich la sjam sba ta olil. Takin slumil te banti kʼaxik bael ta schebalike.
9 Jaʼnax te kʼalal kʼaxik bael ta jejch mukʼul jaʼ, te Elías jich la yalbey te Eliseo: «Albon te bin ya akʼan ya jpas ta atojol te bitʼil mato kichʼoj ikʼel baele». Jich la yal te Eliseo: «Awokoluk, ¿yabal xjuʼ ya awakʼbon cheb buelta te espíritu awichʼoje?».
10 Jich la yal te Elías: «Kʼax tulan te bin la akʼanbon. Teme ya awilon te kʼalal ya kichʼ ikʼel bael, yame awichʼ te bin la akʼane; yan teme maba la awilone, maba ya awichʼ».
11 Te kʼalal yakikto ta beel sok te yakikto ta kʼop-ae,* ta repentenax chiknaj jkojt carreta yuʼun guerra sok caballoetik te jichik yilel te bin-utʼil kʼajkʼ te la yakʼ yijkitay sbaik yuʼune. Te Elías ikʼot moel ta chʼulchan* ta sutu-ikʼ.
12 Te Eliseo la yil te bin yak ta kʼoel ta pasel sok jajch ta aw: «¡Jtat, jtat! ¡Te carreta yuʼun Israel sok te machʼatik kajajtik ta caballo yuʼune!». Te kʼalal maba la staix ta ilel, la stsak te skʼuʼ sok la schʼiʼ.*
13 Tey-abi la stambey te skʼuʼ te Elías, jaʼ te skʼuʼ yuʼun j-alwanej te chʼay jilel yuʼune, jich sujt ta stiʼil te mukʼul jaʼ Jordán.
14 Ta patil, te Eliseo la smaj te mukʼul jaʼ sok te skʼuʼ yuʼun j-alwanej te chʼay jilel yuʼun te Elías sok jich la yal: «¿Banti ay te Jehová te Dios yuʼun Elías?». Te kʼalal la smaj te Eliseo te mukʼul jaʼ, la sjam sba ta olil, jich kʼax bael tey-a.
15 Kʼalal te snichʼnab te j-alwanejetik te ayik ta Jericó te namalto* la yilik te bin la spas te Eliseo, jich la yalik: «Te espíritu yuʼun te Elías ayix ta stojol te Eliseo». Jich bajt staik tal te Eliseo sok la spajkan sbaik kʼalal ta lum ta stojol.
16 Jich la yalik: «Liʼ ayotik 50 ta tul winiketik te jaʼ j-abatotik awuʼun. Awokoluk, akʼawotik bael ta sleel te awajwale. Repenta te espíritu* yuʼun te Jehová la slik moel sok la yakʼ jilel ta ba wits o ta spamlej kʼinal». Pero, jich la yal te Eliseo: «Mame xbaex».
17 Ta skaj te bayal wulwultayot yuʼunik, ma lek la yaʼiy sba yuʼun, jaʼ yuʼun jich la yaltiklanbey: «Baanik-abi». Jich bajtik te 50 ta tul winiketik, oxeb kʼajkʼal la sleik te Elías, pero maba la staik.
18 Te kʼalal sujtik tal te winiketik, bajtik ta stojol te Eliseo te ay ta Jericó. Jich albotik yuʼun te Eliseo: «¿Mabal lajuk kalbeyex te ma xbaexe?».
19 Ta patil bael, te winiketik yuʼun te mukʼul lum jich la yalbeyik te Eliseo: «Kajwal, ilawil, buen lek te banti ay te mukʼul lum kuʼuntike, pero maba lek te jaʼ sok maʼyuk bin ya xchʼi ta lumkʼinal».*
20 Tey-abi, jich la yal: «Ichʼbonik tal jun yachʼil taza te maba mukʼ sok akʼbeyaik tal atsʼam». Jich la yichʼbeyik tal.
21 Jich yuʼun bajt te Eliseo ta banti slokʼib jaʼ, la sbuskʼinbey ochel te atsʼam sok jich la yal: «Jich ya yal te Jehová: ‹La jlekubtesix te jaʼe. Maʼyuk machʼa ya xlajix yuʼun sok maba ya yakʼix te ma x-alajik te antsetike›».*
22 Jich lekub te jaʼ jaʼto ta ora ini, jich bitʼil la yal te Eliseo.
23 Tey-abi bajt ta Betel. Te kʼalal yak ta moel bael ta be, lokʼ tal chaʼoxtul chʼin keremetik ta mukʼul lum te jich jajch slabanik te Eliseo: «¡Jtʼaxjol, moan bael! ¡Jtʼaxjol, moan bael!».
24 Te kʼalal jich la yaʼiy stojol te Eliseo, la sut sba ta stojol te chʼin keremetik sok la schopolkʼoptaylan ta swenta sbiil te Jehová. Tey-abi lokʼ tal chaʼkojt meʼ osoetik ta teʼtikil te la smiltiklan 42 ta tul chʼin keremetik.
25 Jich la stsakxan bael sbe, bajt ta wits Carmelo, tey-abi sujt tal ta Samaria.
Notaetik
^ Ta yantik variante «tijil».
^ Jaʼ ya skʼan ya yal te chʼulchan te banti ya xwilik te jaʼmal mutetik.
^ Te kʼopil snichʼnab te j-alwanejetik jich yilel te jaʼ skʼoplal jun escuela yuʼun j-alwanejetik o jtsojb j-alwanejetik.
^ Ta yantik variante «jijtsʼajik», «tijtsajik».
^ Ta yantik variante «jakalto».
^ Ta yantik variante «aʼiyej-ae».
^ Jaʼ ya skʼan ya yal te chʼulchan te banti ya xwilik te jaʼmal mutetik.
^ Ta yantik variante «xetʼ».
^ Ta yantik variante «jakalto».
^ O «ikʼ».
^ O jaʼniwan ya skʼan ya yal «ya skʼases alal».
^ O jaʼniwan ya skʼan ya yal «maba ya yakʼ xkʼaxix alal».
