2 Reyes 21:1-26
21 Te Manasés ay 12 yaʼbilal-a te kʼalal och ta ajwalil sok wentainwan 55 jaʼbil ta Jerusalén. Hefziba sbiil te snane.*
2 Te Manasés jaʼ la spas te bintik ma lek ya yil te Jehová, jaʼ la skʼayin te bintik ilobtik sba ya spasik te nacionetik te la stentiklan lokʼel te Jehová ta stojol te lum Israel.
3 La schaʼpas te toyol awilaletik* te la sjin te Ezequías te state; la spasbey skajtajib chikʼbil majtanil te Baal sok la spas chʼul teʼ yuʼun Aserá,* jich te bitʼil la spas te Acab te ajwalil yuʼun Israel. La snijan sba ta stojol spisil te bintik ay ta chʼulchan sok la yichʼ ta mukʼ.
4 Jaʼnix jich la spas skajtajib chikʼbil majtaniletik ta sna te Jehová, jaʼ te banti jich la yal te Jehová ta stojol «Ya kakʼ x-ayin te jbiil ta Jerusalén».
5 Ta schebal yamakʼul sna te Jehová la spastiklan skajtajib chikʼbil majtaniletik ta stojol spisil te bintik ay ta chʼulchan.
6 Jaʼnix jich la schikʼ ta kʼajkʼ te snichʼan, la spas magia, la slebey swentail te bintik ya xkʼot ta pasel, ay machʼatik la yakʼbey yaʼtel ta spasel espiritismo* sok ay machʼatik la yotses ta jnaʼojel. Kʼaxto la spas te bintik ma lek ya yil te Jehová yuʼun ya sjachbey yilinba.
7 Te slokʼombail te chʼul teʼ yuʼun Aserá* te la spase la yakʼ ta sna Dios te jich albilik yuʼun Jehová te David sok Salomón te snichʼane: «Ta na ini sok ta Jerusalén, jaʼ te lugar te la jtsa ta spisil te stsʼumbal Israel, teyme ya kakʼ x-ayin-a te jbiil ta sbajtelkʼinal.
8 Maʼyuk bin-ora ya kakʼ yijkitayik te israeletik te kʼinal te la kakʼbey te antiguo smeʼ statike, ja’nax teme sok spisil yoʼtanik ya schʼuunik spasel spisil te mantaliletik te kalojbeyik, spisil te Ley te la yakʼbeyex atʼunik te Moisés te j-abat kuʼune».
9 Pero maba la schʼuunik mantal sok ikʼotikxan ta chʼayel yuʼun te Manasés, la yikʼtiklanxan ta spasel te bintik chopol,* kʼaxtoxan-a te bitʼil te yantik lumetik te la slajinlan te Jehová ta stojol te israeletike.
10 Te Jehová maba la skom sba ta yalulanbeyel jich te israeletik ta swenta te j-alwanejetik te jaʼik j-abatetik yuʼune:
11 «Te Manasés te ajwalil yuʼun Judá spasoj spisil te bintik ilobtik sba; kʼax chopol* te bintik spasoj, kʼaxtoxan-a te bitʼil spisil te amorreoetik te nailajem yuʼun. Jaʼnix jich la yakʼ sta smul te Judá ta swenta te lokʼombaetik yuʼun te ilobtik sba.
12 Jaʼ yuʼun, jich ya yal te Jehová te Dios yuʼun Israel: ‹Yame kakʼ tal wokolil ta stojol te Jerusalén sok te Judá te xchʼinet schikin ya xjil machʼauk-a te ya yaʼiy stojole.
13 Te chʼajan la jpʼis-a te Samaria jaʼnix ya jpʼis-euk-a te Jerusalén sok yame jtuuntes te plomo te la jtuuntes ta stojol te machʼatik ay yuʼun te Acab, yame jpok te Jerusalén jich te bin-utʼil ya yichʼ pokel te taza sok ya yichʼ nujanel.
14 Yame kijkitay te lum kuʼun te jilemiktoe sok yame kakʼtiklan jilel ta skʼab te skontratakik, yame yichʼik chukel bael sok yame xpojbotik te sbilukik yuʼun te skontratakik,
15 melel jaʼ la spasik te bintik ma lek ya kil sok maba la skom sbaik ta sjachbelonik kilinba jaʼto te bin kʼajkʼalil lokʼik tal ta Egipto te antiguo smeʼ statik jaʼto ta ora ini›».
16 Te Manasés kʼax bayal machʼatik la smalbey schʼichʼel te maʼyuk smulike, te jich kʼax bayal la snojes ta chʼichʼ spamal te Jerusalén. Jaʼnix jich la sta smul te kʼalal la yakʼbey sta smul te Judá ta spasel te bintik ma lek ya yil te Jehová.
17 Te bintik la spas ta skuxlejal te Manasés, spisil te bintikxan la spas sok te muliletik la spase, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
18 Jich te Manasés way sbakʼetal sok te antiguo smeʼ stat sok la smukik ta sna te banti ay te skʼinal yuʼun yawal tsʼunub, te awal tsʼunubil yuʼun Uzá. Tey-abi, jaʼ och jilel ta ajwalil te Amón, te snichʼane.
19 Te Amón ay 22 yaʼbilal-a te kʼalal och ta ajwalil sok wentainwan cheb jaʼbil ta Jerusalén. Mesulémet sbiil te snane,* jaʼ yantsil nichʼan Haruz te talem ta Jotbá.
20 Te Amón jaʼ la spas te bintik ma lek ya yil te Jehová, jich te bitʼil la spas te Manasés te state.
21 Jaʼnix jich la spas-euk te bin la spas te state. La yichʼ ta mukʼ te lokʼombaetik te ilobtik sba te la yichʼ ta mukʼ te stat sok te la snijan sba ta stojolike.
22 La yijkitay te Jehová te Dios yuʼun te antiguo smeʼ stat sok maba la stʼun te be yuʼun te Jehová.
23 Ta patil, te j-abatetik yuʼun te ajwalil Amón la schapik te bitʼil ya smilik te Amón, teynix la smilik ta sna.
24 Pero, te ants winiketik yuʼun te lume la smilik spisil te machʼatik la schap skʼopik ta smilel te ajwalil Amón. Tey-abi, jaʼ la yotsesik jilel ta ajwalil te Josías, te snichʼane.
25 Te bintik la spas ta skuxlejal te Amón sok te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
26 Ta patil la smukik ta smukenal te banti ay te yawal tsʼunub yuʼun Uzá. Tey-abi, jaʼ och jilel ta ajwalil te Josías, te snichʼane.
Notaetik
^ Ta yantik variante «smeʼe», «smamae».
^ Ta yantik variante «ma lek».
^ Ta yantik variante «ma lek».
^ Ta yantik variante «smeʼe», «smamae».
