2 Reyes 22:1-20
22 Ay waxakeb yaʼbilal-a te Josías te kʼalal och ta ajwalil sok wentainwan 31 jaʼbil ta Jerusalén. Jedidá sbiil te snane,* jaʼ yantsil nichʼan Adaya te talem ta Bozcat.
2 Te Josías jaʼ la spas te bintik lek ya yil te Jehová, jaʼnix jich la spas-euk te bintik la spas te David te antiguo smeʼ stat. Maba bajt ta swaʼel ni ta skʼexam.*
3 Te kʼalal ayix 18 jaʼbil ta ajwalil-a te Josías, la stikun ta sna te Jehová te secretario Safán snichʼan Azalías, snichʼan Mesulam. Jich la yalbey:
4 «Moan bael te banti ay te mukʼul sacerdote Hilquías, albeya te akʼa stsob spisil te takʼin te ya yichʼ akʼel ta sna te Jehová, ja’ te takʼin stsobojik te jkanantiʼnailetik te yakʼojik te ants winiketik yuʼun te lume.
5 Ala te akʼa yichʼik akʼbeyel te takʼin te machʼatik swentainojik yilel te aʼtelil te yak ta pasel ta sna te Jehová, swenta ya xbajt yakʼbeyik te j-aʼteletik te ya schajpanik te banti jatemik te sna te Jehová:
6 jaʼik te machʼatik ya snaʼik ta lek spasel tʼujbil aʼteliletik, te j-aʼteletik sok te albañiletike. Jaʼme ya stuuntesik yuʼun ya smanik teʼetik sok juxbil tonetik swenta ya slekubtesik te temploe.
7 Pero mame skʼan ya ajojkʼoybeyik te banti ya slajinik te takʼin te ya yichʼike, melel ay smukʼul yoʼtanik ta stojolik te winiketike».
8 Ta patil, te mukʼul sacerdote Hilquías jich la yalbey te Safán te secretario: «La jta ta sna te Jehová te libro yuʼun te Ley». Jich te Hilquías la yakʼbey te Safán te libroe sok jajch skʼopon.
9 Jich yuʼun, te Safán te secretario bajt yil te ajwalil sok jich la yalbey: «Te j-abatetik awuʼune la stsobik te takʼin te ay ta templo sok jaʼ la yakʼbeyik te machʼatik swentainojik yilel te aʼtelil te yak ta pasel ta sna te Jehová».
10 Te Safán te secretario jich la yalbeyxan te ajwalil: «Te sacerdote Hilquías la yakʼbon jun libro». Jich te Safán jajch skʼopon ta stojol te ajwalile.
11 Jaʼnax te kʼalal la yaʼiy stojol te ajwalil te bin ya yal te libro yuʼun te Ley, la schʼiʼ* skʼuʼ yuʼun.
12 Tey-abi, te ajwalil Josías jich la yalbey ta mantal te sacerdote Hilquías, te Ahicam snichʼan Safán, te Acbor snichʼan Micaya, te Safán te secretario sok te Asaya te j-abat yuʼun te ajwalil:
13 «Baanik, baan jojkʼoybeyaik te Jehová ta jwenta, ta swenta te lum sok ta swenta spisil te Judá te bin-nix ya skʼan ya yal-a te libro te la yichʼ taele, melel kʼaxto ilinem te Jehová ta jtojoltik ta skaj te ma la schʼuunik te antiguo jmeʼ jtatik te bin ya yal te libro ini sok te ma la skʼotesik ta pasel spisil te bin tsʼibaybil ta jtojoltik tey-a».
14 Jaʼ yuʼun, te sacerdote Hilquías, Ahicam, Acbor, Safán sok te Asaya bajt yilik te Huldá te j-alwanej ants, te yinam Salum —te snichʼan Ticvá, snichʼan Harhás—, te machʼa swentainoj te yawil kʼuʼul. Nainem ta Schebal Barrio ta Jerusalén, tey bajt skʼoponik-a.
15 Jich albotik yuʼun: «Jich ya yal te Jehová te Dios yuʼun Israel: ‹Jichme xa awalbeyik te winik te la stikunex tal ta jtojole:
16 «Jich ya yal te Jehová: ‹Ya jtikun tal wokolil ta stojol te lum ini sok ta stojol te yajwalule jich te bitʼil ya yal te libro te la skʼopon te ajwalil yuʼun Judá.
17 Ta skaj te la yijkitayonik sok te yakik ta yakʼel te xtomet schʼailel te chikʼbil majtaniletik yuʼunik ta stojol yantik diosetik yuʼun ya sjachbonik kilinba ta swenta te bintik ya spasike, yame xtil kilinba ta stojol te lum ini sok maba ya xtupʼ›».
18 Pero, jich xa awalbeyik te ajwalil yuʼun Judá, te machʼa la stikunex tal yuʼun ya sjojkʼoybey te Jehová: «Jich ya yal te Jehová te Dios yuʼun Israel: ‹Ta swenta te bin la awaʼiy stojol,
19 te la amel awoʼtan yuʼun, te la apejkʼan aba ta stojol te Jehová te kʼalal la awaʼiy stojol te bin ya xkʼot ta stojol te lum ini sok ta stojol te yajwalule —jaʼ te ya xtal wokolil ta stojol sok te chamnax yoʼtanik* yuʼun te yantik— sok te la achʼiʼ* akʼuʼ soknix ta swenta te okʼat ta jtojol, la kaʼiybat-euk te akʼope —xchi te Jehová—.
20 Jaʼ yuʼun ya kakʼ te ya ajokin te antiguo ameʼ atat, junme awoʼtan ya awichʼ mukel sok maba ya awil spisil te wokolil te ya kakʼ tal ta stojol te lum ini›»›». Jich bajt yalbeyik yaʼiy te ajwalil te bin la yichʼ alele.
Notaetik
^ Ta yantik variante «smeʼe», «smamae».
^ Ta yantik variante «xin kʼab».
^ Ta yantik variante «xetʼ».
^ Ta yantik variante «chajpnax ya yilik».
^ Ta yantik variante «axetʼ».
