2 Reyes 24:1-20
24 Ta skʼajkʼalel te Jehoiaquim, tal ta akʼbeyel guerra yuʼun te Nabucodonosor te ajwalil yuʼun Babilonia sok la yichʼ abatinel oxeb jaʼbil yuʼun. Pero, ta patil la stoy sba ta stojol te ajwalil yuʼun Babilonia.
2 Jich yuʼun, te Jehová jajch stikun jpojbiluketik te jaʼik caldeoetik, sirioetik, moabitaetik sok ammonitaetik ta skontrainel te Jehoiaquim. La stikunlan swenta ya slajinik te Judá, jich te bitʼil la yal te Jehová ta swenta te j-alwanejetik te jaʼik j-abatetik yuʼun.
3 Jich kʼot ta stojol te Judá, melel jaʼ smantal te Jehová te jich la skʼan la slokʼeslan bael ta stojol ta skaj te muliletik la spas te Manasés
4 soknix ta skaj te la smalbey schʼichʼel te machʼatik maʼyuk smulik, melel la snojes te Jerusalén ta schʼichʼel te machʼatik maʼyuk smulike. Jaʼ yuʼun, te Jehová ma la skʼan la spasix perdón.
5 Te bintik la spas ta skuxlejal te Jehoiaquim sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá.
6 Jich te Jehoiaquim way sbakʼetal sok te antiguo smeʼ stat. Tey-abi, jaʼ och jilel ta ajwalil te Joaquín, te snichʼane.
7 Te ajwalil yuʼun Egipto maʼyuk bin-ora lokʼix ta skʼinal, melel pojbot spisil te skʼinal yuʼun te ajwalil yuʼun Babilonia te jajch tal ta be jaʼ yuʼun Egipto jaʼto kʼalal ta mukʼul jaʼ Éufrates.
8 Ay 18 yaʼbilal-a te Joaquín te kʼalal och ta ajwalil sok wentainwan oxeb u ta Jerusalén. Nehustá sbiil te snan,* jaʼ yantsil nichʼan te Elnatán te talem ta Jerusalén.
9 Te Joaquín jaʼ la spas te bintik ma lek ya yil te Jehová, jich te bitʼil la spas te state.
10 Ta yorail-abi, te j-abatetik yuʼun te Nabucodonosor te ajwalil yuʼun Babilonia moik bael ta yakʼbeyel guerra te Jerusalén sok la sjoytayik te mukʼul lume.
11 Te kʼalal joytaybilix yuʼunik-ae, te Nabucodonosor te ajwalil yuʼun Babilonia kʼot ta mukʼul lum.
12 Te Joaquín te ajwalil yuʼun Judá lokʼ yakʼ sba ta kʼabal ta stojol te ajwalil yuʼun Babilonia, jaʼnix jich la yakʼ sbaik ta kʼabal-euk te snan,* te j-abatetik yuʼun, te winiketik te ichʼbilik ta mukʼ sok te machʼatik yichʼoj mukʼ yaʼtelik ta stojol te ajwalil, jich te kʼalal ayix waxakeb jaʼbil ta ajwalil-a te ajwalil yuʼun Babilonia la yikʼtiklan bael ta chukel.
13 Jich yuʼun, te ajwalil yuʼun Babilonia la yichʼ bael spisil te kʼulejalil te ay ta sna te Jehová sok ta sna te ajwalil. Jaʼnix jich la swuytiklan spisil te aʼtejibaletik te pastiklanbil ta oro te la spas te Salomón te ajwalil yuʼun Israel ta stojol te templo yuʼun Jehová. Spisil-abi jich kʼot ta pasel jich te bitʼil la yal te Jehová.
14 La yikʼtiklan bael ta chukel spisil te yajwalul te Jerusalén, spisil te winiketik te ichʼbilik ta mukʼ, spisil te winiketik te ay yipik ta yakʼel guerra sok spisil te machʼatik ya snaʼik spasel tʼujbil aʼteliletik sok te machʼatik ya x-aʼtejik sok tulan takʼinetik.* La schuk bael 10 mil ta tul ants winiketik. Spisil la yikʼtiklan bael, jaʼxanix la yijkitay te pobreetik te ayik ta lume.
15 Jich la schuk bael ta Babilonia te Joaquín. Jaʼnix jich la schukbey bael te snan* sok te yinamtak, te machʼatik yichʼoj mukʼ yaʼtelik ta stojol te ajwalil sok te winiketik te ichʼbilik ta mukʼ ta lume; la yikʼtiklan lokʼel ta Jerusalén, la schuktiklan bael ta Babilonia.
16 Te ajwalil yuʼun Babilonia jaʼnix jich la schuk bael ta Babilonia 7 mil ta tul winiketik yuʼun guerra sok jmil ta tul te machʼatik ya snaʼik spasel tʼujbil aʼteliletik sok te machʼatik ya x-aʼtejik sok tulan takʼinetik.* Spisil te winiketik-abi ay yipik sok pʼijubenik ta lek ta yakʼel guerra.
17 Te ajwalil yuʼun Babilonia la yotses ta ajwalil te Matanías te stajun* te Joaquín swenta jaʼ la sjelolin jilel te Joaquín sok la sjelbey te sbiil ta Sedequías.
18 Ay 21 yaʼbilal-a te Sedequías te kʼalal och ta ajwalil sok wentainwan 11 jaʼbil ta Jerusalén. Hamutal sbiil te snan,* jaʼ yantsil nichʼan te Jeremías te talem ta Libná.
19 Te Sedequías jaʼ la spas te bintik ma lek ya yil te Jehová, jich te bitʼil la spas te Jehoiaquim.
20 Jich kʼot ta pasel ta Jerusalén sok ta Judá ta skaj te ilin te Jehová ta stojolik, la slokʼeslan bael ta stojol. Te Sedequías la stoy sba ta stojol te ajwalil yuʼun Babilonia.
Notaetik
^ Ta yantik variante «smeʼ», «smama».
^ Ta yantik variante «smeʼ», «smama».
^ O jaʼniwan skʼoplal «te machʼatik ya spasik tsʼajkʼetik».
^ Ta yantik variante «smeʼ», «smama».
^ O jaʼniwan skʼoplal «te machʼatik ya spasik tsʼajkʼetik».
^ O «stio».
^ Ta yantik variante «smeʼ», «smama».
