2 Reyes 3:1-27
3 Te Jehoram snichʼan Acab och ta ajwalil ta Israel ta Samaria te kʼalal ayix 18 jaʼbil ta ajwalil-a te Jehosafat ta Judá sok wentainwan 12 jaʼbil.
2 Jaʼ la spas te bintik ma lek ya yil te Jehová, jaʼnax te ma jichuk kʼaxto la spas te bitʼil te stat sok te snan,* melel la sjin te chʼultesbil balal ton yuʼun Baal te la spas te state.
3 Pero, jaʼnix jich la spas-euk te muliletik te la spas te Jeroboán snichʼan Nebat te la yakʼbey sta smul te lum Israel sok maba la yijkitay spasel.
4 Te Mesá, te ajwalil yuʼun Moab, yaʼtelinoj schʼitesel tuminchijetik sok ya stoj spatan ta stojol te ajwalil yuʼun Israel, ya yakʼbey 100 mil ta kojt jkolel* tuminchijetik sok 100 mil ta kojt jkolel tat tuminchijetik te maba joxbil* stsotselik.
5 Jaʼnax te kʼalal laj te Acab, te ajwalil yuʼun Moab la stoy sba ta stojol te ajwalil yuʼun Israel.
6 Ta yorail-abi, te ajwalil Jehoram lokʼ tal ta Samaria sok la stsob tal spisil te soldadoetik yuʼun Israel.
7 Sok jich la stikun ta albeyel te Jehosafat te ajwalil yuʼun Judá: «La stoy sba ta jtojol te ajwalil yuʼun Moab. ¿Yabal ajokinon bael ta yakʼbeyel guerra?». Jich la yal te Jehosafat: «Yak. Yame jokinat bael, yame sjokinat bael te lum kuʼun sok te caballoetik kuʼune».
8 Jich la sjojkʼoy te Jehosafat: «¿Bin beil ya jtʼuntik bael?». Jich la yal te Jehoram: «Jaʼ te be te ya xbajt ta jochol takin kʼinal yuʼun Edom».
9 Jich lokʼik bael te ajwalil yuʼun Israel, te ajwalil yuʼun Judá sok te ajwalil yuʼun Edom. Te kʼalal ayix jukeb kʼajkʼal yakik ta beel-a, maʼyukix jaʼ yuʼun ya yuchʼik te machʼatik ayik ta campamento ni jaʼuk te schambalamik te ayik tal ta spatike.
10 Te ajwalil yuʼun Israel jich la yal: «¡Oʼbol jbatik! ¡Te Jehová la stsobotik tal te oxtul ajwalilotik yuʼun-nax ya yakʼotik ta skʼab te Moab!».
11 Jich la sjojkʼoy te Jehosafat: «¿Mabal ayuk jtuluk j-alwanej yuʼun Jehová liʼi te ya xjuʼ ya kalbeytik te akʼa sjojkʼoybey te Jehovae?». Ay jtul j-abat yuʼun te ajwalil yuʼun Israel te jich la yal: «Ay, jaʼ te Eliseo snichʼan Safat te machʼa ya smalbey jaʼ ta skʼab-a te Elías».*
12 Jaʼ yuʼun, jich la yal te Jehosafat: «Jaʼnax stukel te machʼa ya xjuʼ ya yalbotik te bin ya yal te Jehová». Jich yuʼun, te ajwalil yuʼun Israel, te Jehosafat sok te ajwalil yuʼun Edom koik bael ta yilel te Eliseo.
13 Te Eliseo jich la yalbey te ajwalil yuʼun Israel: «¿Bin jwentaat-a? Jaʼ baan jojkʼoybeya te j-alwanejetik yuʼun te atat sok te j-alwanejetik yuʼun te anane».* Pero, jich la sjakʼ te ajwalil yuʼun Israel: «Maʼuk, melel jaʼ la stsobonkotik tal te Jehová te oxtul ajwalilotik yuʼun ya yakʼotik ta skʼab te Moab».
14 Ta swenta-abi, te Eliseo jich la yal: «Jamal ya kalbat ta stojol Jehová te kuxul Dios te jwolwanej yuʼun te soldadoetik,* jaʼ te machʼa ya x-abatinon ta stojol, te manchuk ayuk skʼoplal ta koʼtan te Jehosafat te ajwalil yuʼun Judá maba ya kilat sok maba ya kaʼiybat akʼop te jichuke.
15 Ikʼbonik tal jtuluk te machʼa ya stij arpa». Jaʼnax te kʼalal jajch ta tijel te arpa, te skʼab te Jehová tal ta stojol te Eliseo.
16 Jich la yal te Eliseo: «Jich ya yal te Jehová: ‹Pasaik zanjaetik ta spamlej ini,
17 melel jich ya yal te Jehová: «Te jaʼexe maba ya awilik te ya xtal ikʼ ni jaʼal, pero yame xnoj ta jaʼ te spamlej ini, te jaʼexe teyme ya awuchʼik jaʼ-a sok teyme ya yuchʼik jaʼ-euk-a te awakaxik sok te achambalamik»›.
18 Pero, ta sit te Jehová ma wokoluk ya yaʼiy spasel-abi, melel jaʼnix jich yame yakʼbeyex ta akʼabik te Moab.
19 Jinaik spisil te mukʼul lumetik te joytaybilik ta tsʼajkʼetik te yichʼoj lek yip sok spisil te mukʼul lumetik te mukʼik skʼoplal, tsʼetaik spisil te lekil teʼetik, butʼaik spisil te slokʼib jaʼetik sok nojesaik ta tonetik te lumkʼinal te ya yakʼ lek sit awal tsʼunubil».
20 Ta sab, ta yorail te kʼalal ya yichʼ akʼel-a te majtanil yuʼun sit awal tsʼunubil, ta repentenax jajch ta julel jaʼ te tal ta Edom, jich noj ta jaʼ te kʼinale.
21 Spisil te moabitaetik la yaʼiyik stojol te tal te ajwaliletik yuʼun ya x-akʼbotik guerra. Jich yuʼun la stsobik tal spisil te winiketik te ya snaʼik stuuntesel ta lek aʼtejibaletik yuʼun guerra sok la schol sbaik ta stiʼil skʼinalik.
22 Te kʼalal jajchik ta buen sab, te xojobil te kʼajkʼal la yakʼ te xlemetnax te jaʼe, yan stukel te moabitaetik te ayik ta yan jejch tsajnax la yilik jich te bin-utʼil chʼichʼ,
23 jich la yalik: «¡Chʼichʼ ya kil! Yuʼun talel kʼaxel la smil sbaik ta espada te ajwaliletike. ¡Konik, Moab, konik ta spojel te biluketike!».
24 Te k’alal ochik bael ta scampamento te Israel, te israeletik lokʼik ta yakʼbeyel guerra, jich lokʼik bael ta anel te moabitaetik. Te kʼalal ochik bael te israeletik ta Moab, yakik ta smilel bael te moabitaetik.
25 La sjinik te mukʼul lumetik, jich ta jujuntul te winiketik la schʼojik jilel tonetik ta spisil te lumkʼinal te ya yakʼ lek sit awal tsʼunubil, jich la snojesik jilel ta tonetik. Jaʼnix jich la sbutʼik spisil te slokʼib jaʼetik sok la stsʼetik spisil te lekil teʼetik. Jich yuʼun, te kʼalal jaʼxanix maba jinem-a te tsʼajkʼetik yuʼun te Quir-Haréset te pasbilik ta ton, te machʼatik ya schʼojik ton ta jimochʼ la sjoytayik te mukʼul lum sok la sjinik.
26 Te kʼalal la yil te ajwalil yuʼun Moab te yakix ta tsalele, la yikʼ bael 700 ta tul winiketik te chapalik sok yespadaik yuʼun ya sjam ochel sbe jaʼto te banti ay te ajwalil yuʼun Edom, pero maba juʼ yuʼunik.
27 Jich yuʼun la stsak tal te sba snichʼan, jaʼ te machʼa ya xjelolinot jilel yuʼun ta ajwalil, la yakʼ ta chikʼbil majtanil ta sba te tsʼajkʼe. Kʼax bayal ilinik ta stojol te israeletik, jich te israeletik maba la yakʼbeyikix guerra te Moab sok sujtik bael ta slumalik.
Notaetik
^ Ta yantik variante «smeʼ», «smama».
^ Ta yantik variante «jchʼiel».
^ Ta yantik variante «jochbil».
^ O «te machʼa j-abat yuʼun-a te Elías».
^ Ta yantik variante «ameʼe», «amamae».
^ Jaʼ skʼoplal te chʼul-abatetik ta chʼulchan.
