2 Reyes 7:1-20
7 Jaʼ yuʼun, te Eliseo jich la yal: «Chʼama awaʼiyik te bin ya yal te Jehová. Jich ya yal te Jehová: ‹Pajel ta jich ora ini, ta ochibal* yuʼun Samaria, jun siclo* stojol ya xkʼot te jun sea* yuʼun lekil harina sok jun siclo stojol ya xkʼot te cheb sea* yuʼun cebada›».
2 Te kʼalal la yaʼiy stojol te capitán yuʼun te soldadoetik jaʼ te machʼa smukʼulinoj yoʼtan te ajwalil, jich la yalbey te winik yuʼun te smelelil Dios:* «Manchukme ya sjambey stiʼil chʼulchan te Jehová, ¿bin-utʼil ya xkʼot ta pasel-abi?». Jich la yal te Eliseo: «Yame awil sok asit, pero maba ya aweʼ».
3 Tey-abi, ta yochibal te mukʼul lum ay chantul winiketik te yichʼojik kʼaʼel chamel te jich la yalbey sbaik: «¿Bin yuʼun te jaʼnax yakotik ta smaliyel te ya xlajotike?
4 Teme ya x-ochotik ta mukʼul lum, yananix xlajotik ta skaj-a te wiʼnale. Teme liʼ ya xjilotike, yananix xlajotik-a. Jich yuʼun konik ta scampamento te sirioetike. Teme ya smilotik, lajotik-abi. Teme maba ya smilotik, kuxul ya xjilotik».
5 Jich yuʼun, te kʼalal ijkʼubix-a te kʼinale, ochik bael ta scampamento te sirioetik. Te kʼalal kʼotik ta stiʼil te scampamento te sirioetik, maʼyuk machʼa tey ay-a.
6 Melel te Jehová la yakʼbey yaʼiy stojol te sirioetik skʼop carretaetik yuʼun guerra, caballoetik sok skʼop bayal ta tul soldadoetik. Jich talel kʼaxel la yalbey sbaik te sirioetik: «¡Aʼiya awaʼiyik! ¡Te ajwalil yuʼun Israel la stoj te ajwaliletik yuʼun hititaetik sok te ajwaliletik yuʼun Egipto yuʼun ya yakʼbotik guerra!».
7 Te k’alal ijkʼubix-a te kʼinal, anik bael ta oranax. La yijkitayik jilel te snailpakʼik, scaballoik sok te sburroik. Jich te bitʼil ay-a te scampamentoik jichnix la yijkitayik sok anik bael yuʼun ma xlajik-a.
8 Te kʼalal kʼotik ta stiʼil te campamento te winiketik te yichʼojik kʼaʼel chamel, ochik bael ta nailpakʼ sok jajchik ta weʼel uchʼajel. Tey-abi la yichʼik bael plata, oro sok kʼuʼul pakʼal, bajt snakʼik jilel. Chaʼsujtik tal sok ochik ta yan nailpakʼ, la yichʼik bael te biluketik tey-a sok bajt snakʼik-euk.
9 Ta patil, jich la yalbey sbaik: «Ma lek te bin yakotik ta spasele. ¡Jaʼ skʼajkʼalel lek yachʼil kʼop! Teme maʼyuk bin ya kaltik sok teme jaʼto ya jmaliytik te ya sakub kʼinal, snujpʼ te ya kichʼtik castigo. Konik, jaʼ lek te ya kakʼtik ta naʼel ta sna te ajwalile».
10 Jich bajtik ta mukʼul lum, la yikʼik tal te jkanantiʼnailetik, jich la yalbeyik: «Ochonkotik bael ta scampamento te sirioetik, pero maʼyuk machʼa la kilkotik sok maʼyuk bin chikan. Jaʼnax chukajtik jilel te caballoetik sok te burroetik soknix te bitʼil ay-a te snailpakʼik jichnix la yijkitayik jilel».
11 Jich te jkanantiʼnailetik la yalik ta aw te bin kʼot ta pasel te chiknaj kʼalalto ta sna te ajwalile.
12 Jich jajch ta oranax te ajwalil ta ajkʼabal sok jich la yalbey te j-abatetik yuʼun: «Ya kalbeyex awaʼiyik te bin yakik ta schapel te sirioetik. Te bitʼil snaʼojik te ay jwokoltik yuʼun wiʼnal, la yijkitay te scampamentoik yuʼun ya snakʼ sbaik ta jaʼmaleltik, melel jich la yal ta yoʼtanik: ‹Yame xlokʼik tal ta mukʼul lum, jichme kuxul ya jtsaktiklantik sok yame kochintaytik te mukʼul lum›».
13 Ay jtul yabat te jich la yale: «Awokoluk, tikuna bael chaʼoxtul winiketik sok akʼa yikʼik bael joʼkojt caballoetik te ay kuxulikto ta mukʼul lum. Melel jaʼnixme jich ya xkʼot ta stojolik-euk te bin ya xkʼot ta stojolik spisilik te ants winiketik ta Israel sok te bin kʼot ta stojolik spisil te ants winiketik te lajikix ta Israel. Akʼa jtikuntik bael, kiltik te bin ya xkʼot ta pasel».
14 Jich la schajpanik cheb carretaetik te nitbilik yuʼun caballoetik. Te ajwalil la stikunlan bael ta scampamentoik te sirioetik sok jich la yaltiklanbey: «Baan, ilawilik».
15 Bajt sleik te sirioetik jaʼto kʼalal ta mukʼul jaʼ Jordán, la yilik te schʼixil te bee nojel ta kʼuʼul pakʼal sok yantikxan biluketik te la schʼojik jilel ta skaj te xiwenik bael ta anele. Tey-abi sujtik tal te winiketik sok la yalbeyik yaʼiy te ajwalil te bin la yilike.
16 Jich te lume lokʼik bael ta yuʼuninbeyel te sbilukik te sirioetik ta scampamentoik. Jich kʼot ta pasel te bin la yal te Jehová, jun siclo* stojol kʼot te jun sea* yuʼun lekil harina sok jun siclo stojol kʼot te cheb sea* yuʼun cebada.
17 Te ajwalil la yakʼ jilel ta yochibal te mukʼul lum te capitán yuʼun te soldadoetik jaʼ te machʼa smukʼulinoj yoʼtane. Pero kʼax ta tenel yuʼun te ants winiketik ta yochibal te mukʼul lum, jich laj, jich te bitʼil la yal te winik yuʼun te smelelil Dios* te kʼalal ko ta ilel yuʼun te ajwalil.
18 Jich kʼot ta pasel te bitʼil la yal te winik yuʼun te smelelil Dios* jichnix te bitʼil la yalbey te ajwalile: «Pajel ta jich ora ini, ta ochibal yuʼun Samaria, jun siclo* stojol ya xkʼot te jun sea* yuʼun lekil harina sok jun siclo stojol ya xkʼot te cheb sea* yuʼun cebada».
19 Pero, te capitán yuʼun te soldadoetik jich yalojbeyix-a te winik yuʼun te smelelil Dios:* «Manchukme ya sjambey stiʼil chʼulchan te Jehová, ¿bin-utʼil ya xkʼot ta pasel-abi?». Jich albilix yuʼun-a te Eliseo: «Yame awil sok asit, pero maba ya aweʼ».
20 Mero jich kʼot ta pasel, melel laj te kʼalal kʼax ta tenel yuʼun te ants winiketik ta yochibal te mukʼul lume.
Notaetik
^ O «mercadoetik».
^ Jaʼ 11.4 gramo. Ilawil ta apéndice, B14.
^ Jaʼ 7.33 litro. Ilawil ta apéndice, B14.
^ Jaʼ 14.66 litro.
^ Jaʼ 11.4 gramo. Ilawil ta apéndice, B14.
^ Jaʼ 7.33 litro. Ilawil ta apéndice, B14.
^ Jaʼ 14.66 litro.
^ Jaʼ 11.4 gramo. Ilawil ta apéndice, B14.
^ Jaʼ 7.33 litro. Ilawil ta apéndice, B14.
^ Jaʼ 14.66 litro.
