2 Reyes 9:1-37
9 Te j-alwanej Eliseo la yikʼ tal jtul te snichʼnab te j-alwanejetik sok jich la yalbey: «Chuka moel te akʼuʼ kʼalalto ta achʼujt, suja aba, ichʼa bael te aceite ini, baan ta Ramot-Galaad.
2 Te kʼalal ya xkʼoat tey-a, lea te Jehú, snichʼan Jehosafat, snichʼan Nimsí. Ochan bael te banti ay sok te yermanotak, akʼa sjokinat bael ta jun cuarto te ay ta yutilxan te nae.
3 Ta patil malbeya te aceite ta sjol sok jichme xa awalbey: ‹Jich ya yal te Jehová: «Ya jtsaat swenta ya x-ochat ta ajwalil ta Israel»›. Tey-abi jama te tiʼnail sok lokʼan bael ta anel ta oranax».
4 Jich bajt ta Ramot-Galaad te yabat te j-alwaneje.
5 Te kʼalal kʼote, nakajtik-a te capitanetik yuʼun te soldadoetik. «Capitán, kichʼoj tal kʼop ta atojol», xchi te j-abate. Jich la sjojkʼoy te Jehú: «¿Machʼa ta jpisiltik-a?». «Jaʼat, capitán», xchi te j-abate.
6 Jich jajch te Jehú sok och bael ta yutil na. Te j-abate la smalbey te aceite ta sjol te Jehú sok jich la yalbey: «Jich ya yal te Jehová te Dios yuʼun Israel: ‹Ya jtsaat yuʼun ya x-ochat ta ajwalil yuʼun te lum yuʼun te Jehová, jaʼ te Israel.
7 Yame skʼan ya alajin te machʼatik ay yuʼun te awajwal Acab sok yame kakʼbey spakol te schʼichʼel te j-alwanejetik kuʼun sok spisil te j-abatetik yuʼun te Jehová te la smiltiklan te Jezabel.
8 Spisil te machʼatik ay yuʼun te Acab yame xlajik; yame jlajin ta jkʼaxel ta lum Israel spisil te winiketik* yuʼun te Acab, teyme ochem skʼoplal-a te machʼatik maba mukʼ skʼoplalik.
9 Yame jlajin te machʼatik ay yuʼun* te Acab jich te bitʼil la jlajin te machʼatik ay yuʼun te Jeroboán snichʼan Nebat sok te machʼatik ay yuʼun te Baasá snichʼan Ahíya.
10 Te Jezabel yame yichʼ tiʼbeyel yuʼun tsʼiʼetik te sbakʼetal ta kʼinal te ay ta Jezreel sok maʼyuk machʼa ya xmukot yuʼun›». Te kʼalal laj yoʼtan ta yalel-abi, la sjam te tiʼnail sok lokʼ bael ta anel.
11 Te kʼalal sujt bael te Jehú te banti ay te j-abatetik yuʼun te yajwale, jich jojkʼoybot yuʼunik: «¿Bin la yalbat? ¿Bin yuʼun tal yilat te sojkem jol winik ini?». Jich la sjakʼ te Jehú: «Anaʼojikix te bin yilel stalel te ants winiketik ini sok te bitʼil ya xkʼopojike».
12 Pero, jich la yalbeyik: «¡Alot! Ala kaʼiykotik te bin la yalbate». Jich la schol te Jehú te bin albot yuʼun te winik sok jich la scholxan: «Jich ya yal te Jehová: ‹Ya jtsaat swenta ya x-ochat ta ajwalil ta Israel›».
13 Tey-abi, ta jujuntul la yichʼik tal ta oranax te skʼuʼik sok la slimik ta kajalkaj escalera te banti ya xkʼax te Jehú, la yokʼesinik te xulubil sok jich la yalik: «¡Te Jehú ochix ta ajwalil!».
14 Jich yuʼun, te Jehú, snichʼan Jehosafat, snichʼan Nimsí, la schap te bitʼil ya smil te Jehoram.
Te Jehoram sok spisil te israeletik ayik ta Ramot-Galaad yuʼun baemik ta yakʼbeyel guerra-a te Hazael te ajwalil yuʼun Siria.
15 Te ajwalil Jehoram sujt bael ta Jezreel swenta ya xlekub te yejchen te akʼbot yuʼun te sirioetik te kʼalal la yakʼbey guerra te Hazael te ajwalil yuʼun Siria.
Jich yuʼun, jich la yal te Jehú: «Teme jun awoʼtanik ta jtojole, mame xa awakʼik te ay machʼa ya xlokʼ bael ta anel ta mukʼul lum yuʼun ya xbajt yal ta Israel».
16 Ta patil, te Jehú mo ta scarreta, bajt ta Jezreel, melel tey ay-a te Jehoram ta swayib ta skaj te yejchene. Jaʼnix jich, te Ocozías te ajwalil yuʼun Judá koem bael ta yilel-a te Jehoram.
17 K’alal te j-ilkʼinal ta toyol te ay ta toyol tsʼajkʼ yuʼun Jezreel la yil tal bayal ta tul swiniktak te Jehú, jich la yal: «Ya kil te yak ta talel bayal ta tul winiketik». Jaʼ yuʼun, jich la yal te Jehoram: «Ikʼa tal jtul soldado te ya skajtajibin caballo yuʼun ya xbajt sta ta be sok te jich ya sjojkʼoye: ‹¿Swentabal lamalkʼinal te talexe?›».
18 Jich mo ta scaballo te soldado yuʼun bajt sta ta be te winiketik, jich la yal: «Jich ya yal te ajwalil: ‹¿Swentabal lamalkʼinal te talexe?›». Pero, jich la sjakʼ te Jehú: «¿Bin yuʼun te ya awalbey skʼoplal lamalkʼinal? ¡Jaʼ lek, laʼ, tʼunawon!».
Jich la yal te j-ilkʼinal ta toyol: «Kʼot tey-a te machʼa la atikun baele, pero maba sujtem tal».
19 Jich yuʼun, te ajwalil la stikun yan soldado te ya skajtajibin caballo, te kʼalal kʼot ta stojolike jich la yal: «Jich ya yal te ajwalil: ‹¿Swentabal lamalkʼinal te talexe?›». Pero, jich la sjakʼ te Jehú: «¿Bin yuʼun te ya awalbey skʼoplal lamalkʼinal? ¡Jaʼ lek, laʼ, tʼunawon!».
20 Jich la yal te j-ilkʼinal ta toyol: «Te yane kʼot ta stojolik, pero maba sujtem tal. Te jwolwanej yuʼunike jich ya stij scarreta te bitʼil te Jehú te smam* Nimsí, melel jich ya stij te bin-utʼil te machʼa sojkem sjol».
21 Jich la yal te Jehoram: «¡Chajpanbonik-a te jcarretae!». Jich chajpanbot te scarreta yuʼun guerra. Tey-abi, te Jehoram te ajwalil yuʼun Israel sok te Ocozías te ajwalil yuʼun Judá bajtik ta jujuntul ta scarretaik ta stael ta be te Jehú. La sta sbaik ta be sok te Jehú ta skʼinal te Nabot te jezreelita-winik.
22 Jaʼnax te kʼalal la yil te Jehoram te Jehú, jich la yalbey: «¿Jaʼbal ta swenta lamalkʼinal te talat, Jehú?». Pero, jich la sjakʼ te Jehú: «¿Bin-utʼil kʼan ayinuk lamalkʼinal te bitʼil yak ta yakʼbel sba ta antsinel* te Jezabel te anan* sok te yak ta ak’chamele?».
23 Tey-abi, te Jehoram la sut sba ta oranax sok te scarreta sok jich la yalbey te Ocozías: «¡La kichʼtik loʼlayel, Ocozías!».
24 Te Jehú la stʼimuy bael te Jehoram, te stʼimalteʼ kʼot ta spat, kʼax ta yoʼtan, jich metsel kʼoel ta scarreta yuʼun guerra.
25 Jich yuʼun, te Jehú jich la yalbey te Bidcar te capitán yuʼun te soldadoetik: «Jacha sok chʼoja bael ta skʼinal te Nabot te jezreelita-winik. ¿Yatobal xjul ta awoʼtan te bin la yal te Jehová te kʼalal yakotik ta stijel tal-a te carreta* ta spat te Acab te state?:
26 ‹Jich ya yal te Jehová: «Jamal ya kalbat te ya kakʼbat spakol liʼ ta kʼinal ini ta skaj te liʼ la kilbey wojey te schʼichʼel te Nabot sok te schʼichʼel te snichʼnabe», xchi te Jehová›. Jich yuʼun jacha sok chʼoja bael ta kʼinal ini, jich te bitʼil la yal te Jehová».
27 Te kʼalal la yil te Ocozías te ajwalil yuʼun Judá te bin kʼot ta pasel, lokʼ bael ta anel ta sbelal te na te ay ta nichimaltik. (Ta patil, te Jehú la snuts bael te Ocozías sok jich la yal: «¡Milaik-euk!». Jaʼ yuʼun la yejchentesik te kʼalal ay bael ta scarreta ta sbelal Gur te nopol* ay ta Ibleam. Jich anxan bael kʼalalto ta Meguidó, tey kʼot ta lajel-a.
28 Jich yuʼun, te j-abatetik yuʼun la yikʼik bael ta jun carreta ta Jerusalén, la smukik te banti mukul te antiguo smeʼ stat, ta Mukʼul lum yuʼun David.
29 Te Ocozías jaʼ och ta ajwalil ta Judá te kʼalal ayix 11 jaʼbil ta ajwalil-a te Jehoram snichʼan Acab).
30 Te k’alal kʼot ta Jezreel te Jehú, la snaʼ stojol te Jezabel. Jich yuʼun la sbon ta ijkʼ te site, la schʼal te sjole sok la yil koel ta ventana.
31 Te kʼalal yak ta ochel bael te Jehú ta yochibal te mukʼul lum, jich la yal te Jezabel: «¿Yabal xjul ta awoʼtan te bin kʼot ta stojol te Zimrí te la smil te yajwale?».
32 Te Jehú la yil moel ta ventana sok jich la yal: «¿Machʼa-a te jun yoʼtan ta jtojole? ¿Machʼa-a?». Ay chaʼoxtul j-abatetik te yichʼoj mukʼ yaʼtelik ta stojol te ajwalil la yilik koel ta oranax te Jehú.
33 Jich la yal te Jehú: «¡Chʼojaik koel tal!». Jich la schʼojik koel tal. Wil moel te schʼichʼel ta pajkʼ sok ta stojol te caballoetike. Te Jehú kʼax stekʼ te Jezabel sok te caballoetik yuʼun.
34 Tey-abi och bael te Jehú sok weʼ uchʼaj. Ta patil, jich la yal: «Awokoluk, baan mukaik te kʼaʼ bol antse, melel jaʼnix yantsil nichʼan ajwalil».
35 Pero, te k’alal k’an bajt smukike, jaʼxanix la stabeyik te sbakel sjol, te yok sok te stan skʼabe.
36 Te kʼalal bajt yalbeyik te Jehú te bin kʼot ta pasele, jich la yal te Jehú: «Jaʼ jich kʼot ta pasel te bin la yal te Jehová ta swenta te yabat Elías te talem ta Tisbe: ‹Yame yichʼ tiʼbeyel yuʼun tsʼiʼetik te sbakʼetal te Jezabel ta kʼinal te ay ta Jezreel.
37 Te sbakʼetal te Jezabel yame skʼaʼtes te lumkʼinal te ay ta Jezreel, swenta maʼyuk machʼa jich ya yal «Jaʼ te Jezabel ini»›».
Notaetik
^ Ta hebreo: «te machʼatik ya schuxtayik pajkʼ». Jaʼ jich ya yichʼ alel ta hebreo kʼop te kʼalal ya schopolkʼoptayik te winiketike.
^ Ta hebreo: «te sna».
^ Ta yantik variante «yil-al kerem».
^ O «yichʼel ta mukʼ lokʼombaetik».
^ Ta yantik variante «ameʼ», «amama».
^ O «carreta te nitbil ta caballoetik».
^ Ta yantik variante «tijil».
