2 Samuel 1:1-27
1 Te kʼalal lajemix-a te Saúl sok te sujtemix tal-a te David ta stsalel te amalequitaetik, jil cheb kʼajkʼal ta Ziclag.
2 Ta yoxebal kʼajkʼal tal jtul winik te jajch tal ta scampamento te Saúl, schʼiʼoj* tal skʼuʼ sok sbujkʼiyoj tsʼubil lum ta sjol. Te kʼalal noptsaj* bael ta stojol te David, la spajkan sba kʼalal ta lum sok la snijan sba.
3 Te David jich la sjojkʼoybey te winik: «¿Banti talat?». Jich la yal te winik: «Lokʼon tal ta anel ta scampamento te Israel».
4 Te David jich la yal: «Awokoluk, albon kaʼiy te bin kʼot ta pasele». Jich la yal te winik: «Te soldadoetik yuʼun Israel lokʼik bael ta anel te banti ay te guerra sok bayal lajik. Jaʼnix jich laj-euk te Saúl sok te Jonatán te snichʼane».
5 Te David jich la sjojkʼoybeyxan te winik te tal yal te bin kʼot ta pasele: «¿Bin-utʼil ya anaʼ te laj te Saúl sok te Jonatán te snichʼane?».
6 Jich la yal te winike: «Ta yorail-abi ayon ta wits Guilboa-a, la kil te yichʼoj yip ta slanza te Saúl sok yakik ta noptsajel* tal ta stojol-a te carretaetik yuʼun guerra soknix te machʼatik kajajtik ta caballo.
7 La sut sit ta spat, la yilon sok la yikʼon; jich la kalbey: ‹¡Liʼ ayoni!›.
8 Te Saúl jich la sjojkʼoybon: ‹¿Machʼaat-a?›. Jich la kalbey: ‹Joʼon amalequitaon›.
9 Jich la yalbon: ‹Awokoluk, laʼ, milawon, melel kuxulonto sok bayal jwokol›.
10 La kil te bayal ejchenajem sok te yananix xlaj-ae. Jich yuʼun noptsajon* bael ta stojol sok la jmil. Tey-abi la jlokʼesbey te scorona te ay ta sjol sok te stakʼinal skʼab, jich la kichʼ tal ta atojol, kajwal».
11 Te kʼalal la yaʼiy stojol te David te bin kʼot ta pasele, la schʼiʼ* skʼuʼ yuʼun, jaʼnix jich la spasik-euk spisil te winiketik te jokinbil yuʼune.
12 Jajchik ta okʼel sok ta aw soknix la skom sweʼelik jaʼto kʼalal ta mal kʼajkʼal ta skaj te la yichʼik milel ta espada te Saúl, te Jonatán te snichʼan, te lum yuʼun te Jehová sok te israeletik.
13 Ta patil, te David jich la sjojkʼoybey te winik te tal yal te bin kʼot ta pasele: «¿Banti talemat?». Jich la sjakʼ: «Joʼon snichʼanon jyanlum, amalequitaon».
14 Te David jich la yalbey: «¿Bin yuʼun te ma la axiʼ smilel te machʼa tsabil yuʼun te Jehová?».
15 Jich te David la yikʼ tal jtul te swiniktake sok jich la yalbey: «Noptsajan* tal sok mila». La yejchentes ta espada, jich laj.
16 Te David jich la yalbey te winike: «Jaʼatnix ta amul te lajate,* melel jaʼatnix la ale te alajel te kʼalal jich la awal ‹Joʼon la jmil te machʼa tsabil yuʼun te Jehová›».
17 Jich yuʼun, te David la skʼayojtay jun kʼayoj yuʼun mel-o’tan ta stojol te Saúl sok te Jonatán te snichʼane,
18 sok la yal te ak’a snopbeyik skʼoplal te kʼayoj te ants winiketik yuʼun Judá. Te kʼayojil te sbiilinoj «Te tʼimalteʼ» tsʼibaybil ta libro yuʼun Jasar te jich ya yal:
19 «¡Aay, lum Israel! Chʼay te atʼujbilal ta toyol witsetik awuʼun.
¡Lajik te winiketik te ay yipik!
20 Mame xa acholbeyik skʼoplal ta Gat;mame xa awalik ta calleetik yuʼun Asquelón,yuʼun jich maba x-akʼbotik stseʼelil yoʼtanik-a te yantsil nichʼnab te filisteoetik,yuʼun jich maba ya spasik kʼin-a te yantsil nichʼnab te machʼatik maba yichʼojik circuncisión.*
21 Witsetik yuʼun Guilboa,mame xyalix tsʼujul ni jaʼal ta atojolik,te akʼinale mame jaʼuk ya yakʼix te chʼul majtaniletik;melel tey bolob skʼoplal-a te majkilaletik yuʼun te machʼatik ay yipik,maʼyuk bin-ora ya yichʼix jaxbeyel aceite te majkilal yuʼun te Saúl.
22 Te schʼichʼel te machʼatik lajik sok te sjujpʼel* te skontratakik te ay yipik,maʼyuk bin-ora sujt ta spat te stʼimalteʼ te Jonatán,spisil-ora juʼ yuʼun tsalaw te espada yuʼun te Saúl.
23 Te Saúl sok te Jonatán te kʼuxik ta oʼtanil sok te kʼanbilik-a te kʼalal kuxulikto-ae,ni jaʼuk xatotik yuʼun te lajele.
Kʼaxto jich animajik-a te bin-utʼil ya xwilik te xiketik,kʼaxto jich yipik-a te bin-utʼil león-chojetik.
24 Yantsil nichʼnab Israel, okʼetayaik te Saúl,jaʼex te la yakʼbeyex alapik lekil tsajal pakʼ,sok te la schʼalbeyex ta oro te akʼuʼ apakʼike.
25 ¡Lajik te winiketik te ay yipik ta yakʼel guerra!
¡Laj te Jonatán ta toyol witsetik awuʼun!
26 Kermano, Jonatán, ayon ta tulan mel-o’tan ta atojol;kʼax kʼuxat ta ko’tan-a.
Te skʼuxul awoʼtan te la awakʼbon kile, kʼaxtoxan jich-a te bin-utʼil skʼuxul yoʼtan te antsetike.
27 ¡Lajik te winiketik te ay yipik,la yichʼ lajinel te aʼtejibaletik yuʼun guerra!».
Notaetik
^ Ta yantik variante «xetʼoj».
^ Ta yantik variante «jijtsʼaj», «tijtsaj».
^ Ta yantik variante «jijtsʼajel», «tijtsajel».
^ Ta yantik variante «jijtsʼajon», «tijtsajon».
^ Ta yantik variante «xetʼ».
^ Ta yantik variante «Jijtsʼajan», «Tijtsajan».
^ Ta hebreo: «te mal te achʼichʼele».
^ Ta yantik variante «xepuil».
