2 Samuel 10:1-19
-
La stsalik te Ammón sok te Siria (1-19)
10 Ta patil laj te ajwalil yuʼun te ammonitaetik sok jaʼ och jilel ta ajwalil te Hanún, te snichʼane.
2 Jaʼ yuʼun, te David jich la yal: «Yame kakʼbey yil te Hanún snichʼan Nahás te kʼuxul oʼtanil te ma x-ijkitaywan jich te bitʼil la yakʼbon kil te stat te kʼuxul oʼtanil te ma x-ijkitaywan». Jich yuʼun, te David la stikun j-abatetik yuʼun swenta ya smukʼubtesbeyik kʼinal yaʼiy te Hanún ta skaj te laj te state. Pero, te kʼalal kʼotik ta skʼinal ammonitaetik te j-abatetik yuʼun te David,
3 te jwolwanejetik yuʼun te ammonitaetik jich la yalbeyik te Hanún te yajwalike: «¿Yabal akuy te yuʼun ya yichʼ ta mukʼ te atat te David te bitʼil la stikun tal j-abatetik yuʼun swenta ya smukʼubtesbat kʼinal awaʼiy? ¿Mabal jaʼuknax la stikun tal te j-abatetik yuʼun ta stsajtayel sok ta yilel ta lek te mukʼul lum kuʼuntik te jich ya slajin ta patile?».
4 Jich yuʼun, te Hanún la stsaktiklan te j-abatetik yuʼun te David, la sjoxtiklanbey* lokʼel jejchnax te yisimike. Jaʼnix jich la setʼtiklanbey ta olil te skʼuʼik te kʼot kʼalal ta schʼujtik. Jich la stikunlan sujtel.
5 Te kʼalal la yalbeyik yaʼiy te bin kʼot ta pasel te David, ta oranax la stikun winiketik yuʼun ya sta sbaik ta be sok te winiketik, melel bayal la yichʼik kʼexlaltesel. Jich la yalbeyik yaʼiy: «Jilanik ta Jericó, jaʼtome ya sujtex teme chaʼchʼi te awisimike».
6 Ta patil, te ammonitaetik la snaʼik stojol te maba lek ilbilikix yuʼun te David, jich yuʼun te ammonitaetik la stikun bael winiketik yuʼun la stojik sirioetik te ayik ta Bet-Rehob sok ta Zobá swenta ya xjokinotik ta guerra yuʼun, jaʼ 20 mil ta tul soldadoetik, te ajwalil yuʼun Maacá la yakʼ jmil ta tul winiketik-euk sok 12 mil ta tul winiketik yuʼun Istob.*
7 Te kʼalal la snaʼ stojol te David, la stikun te Joab sok spisil te soldadoetik yuʼun, jaʼnix tey ochem skʼoplalik-euk-a te winiketik te bayal yipik ta yakʼel guerra.
8 Jich yuʼun talik te ammonitaetik sok la scholan sbaik ta yochibal te mukʼul lum ta yakʼel guerra, yan stukel te sirioetik te talemik ta Zobá sok ta Rehob soknix te soldadoetik yuʼun Istob* sok Maacá kʼejel ayik stukel, ayik ta jamalal.
9 Te kʼalal la yil te Joab te scholoj sbaik te soldadoetik ta stojol sok ta spat, la stsa soldadoetik yuʼun Israel te pʼijubenik ta lek ta yakʼel guerra sok la yakʼ schol sbaik swenta ya yakʼbeyik guerra te sirioetike.
10 Te jayebxan ta tul winiketik jile jaʼ la yakʼbey swentain* te sbankil Abisái, jaʼnix jich la schol sbaik-euk yuʼun ya yakʼbeyik guerra te ammonitaetike.
11 Te Joab jich la yal: «Teme ya awil te yak stsalbelon te sirioetike, yame xtal akoltayon. Teme ya kil te yak stsalbelat te ammonitaetike, yame xtal jkoltayat.
12 Jich yuʼun ayukme yip koʼtantik sok mame xiwotik swenta ya jkoltaytik te lum kuʼuntik sok te mukʼul lumetik yuʼun te Dios kuʼuntike, sok jaʼme ya spas te Jehová te bin lek ya yil stukele».
13 Jich yuʼun, te Joab sok te swiniktak noptsajik* bael swenta ya yakʼbeyik guerra te sirioetik, pero te sirioetik lokʼik bael ta anel.
14 Te kʼalal la yilik te ammonitaetik te lokʼik bael ta anel te sirioetike, lokʼik bael ta anel ta stojol te Abisái sok ochik bael ta yutil te mukʼul lum. Tey-abi, te Joab la yijkitay jilel te ammonitaetik sok sujt bael ta Jerusalén.
15 Te kʼalal la yilik te sirioetik te tsalotik yuʼun te israeletike, la stsob sbaik yan buelta.
16 Te Hadadézer la stikun ta ikʼel te sirioetik te ayik ta mukʼul jaʼ Éufrates, jich julik ta Helam, jaʼ wentainbilik tal yuʼun te Sobac te capitán yuʼun te soldadoetik yuʼun te Hadadézer.
17 Te kʼalal la yalbeyik yaʼiy te David, ta oranax la stsob spisil te soldadoetik yuʼun Israel, kʼax bael ta mukʼul jaʼ Jordán sok kʼot ta Helam. Jich yuʼun, te sirioetik la schol sbaik sok bajt sta sbaik ta be sok te David, jich la yakʼbeyik guerra te David.
18 Pero, te sirioetik lokʼik bael ta anel ta stojol te israeletik. Te David la smil 700 ta tul winiketik te yakik ta stijel te carretaetik yuʼun guerra sok la smil 40 mil ta tul sirioetik te kajajtik ta scaballoik. Jaʼnix jich la yejchentes te Sobac te capitán yuʼun te soldadoetik, sok tey laj-a.
19 Te kʼalal la yilik spisil te ajwaliletik, jaʼ te j-abatetik yuʼun te Hadadézer, te la yichʼik tsalel yuʼun te israeletik, ta oranax la skʼanik lamalkʼinal sok te israeletik sok jaʼ la yakʼ sbaik ta wentainel yuʼunik. Jich yuʼun, te sirioetik maba la skoltayikix te ammonitaetike.
Notaetik
^ Ta yantik variante «sjochtiklanbey».
^ O «winiketik yuʼun Tob».
^ O «winiketik yuʼun Tob».
^ Ta hebreo: «ta skʼab».
^ Ta yantik variante «jijtsʼajik», «tijtsajik».
