2 Samuel 11:1-27
11 Ta sjajchibal jujun jaʼbil,* jaʼ te kʼalal ya xlokʼik ta spasel guerra te ajwaliletik, te David la stikun bael te Joab sok te j-abatetik yuʼun soknix spisil te soldadoetik yuʼun Israel swenta ya slajinik te ammonitaetik. Jich la sjoytayik te lum Rabá, yan stukel te David jil ta Jerusalén.
2 Ta jun buelta, te kʼalal yakix ta ijkʼubel-a te kʼinale,* jajch ta swayib te David sok jajch ta beel ta sba sna te ajwalile. Tey la sta ta ilel jtul ants te yak ta atimal sok te kʼax tʼujbile.
3 Jich yuʼun, te David la stikun ta jojkʼoyel machʼa-a te antse sok jich albot: «Jaʼ te Bat-Seba te yantsil nichʼan te Eliam sok jaʼ yinam te Urías te hitita-winike».
4 Jich yuʼun, te David la stikun tal ta ikʼel. Te kʼalal jul te antse och bael te banti ay te David, jich te David way sok te antse. (Jaʼ-abi kʼot ta pasel te kʼalal te ants yak ta slekubtesel sba ta swenta te boloben skʼoplale).* Ta patil sujt bael ta sna te antse.
5 Te antse la sta yal, jich la stikun ta albeyel te David: «Kikʼoj kal ta jchʼujt».
6 Te kʼalal la snaʼ stojol te David, jich la stikun ta albeyel te Joab: «Tikunbon tal te Urías te hitita-winike». Jich te Joab la stikun tal te Urías.
7 Te kʼalal jul te Urías, te David la sjojkʼoybey te bin-utʼil ay te Joab sok te soldadoetik, soknix bin-utʼil ay ta bael te guerrae.
8 Ta patil, te David jich la yalbey te Urías: «Koan bael ta ana sok kuxa awoʼtan».* Te kʼalal lokʼ bael te Urías ta sna te ajwalile, ayik bael ta spat yuʼun la yakʼbeyik te majtanil yuʼun te ajwalile.*
9 Pero maba ko bael ta sna te Urías, tey way jilel ta yochibal sna te ajwalil, jaʼ la sjokin te j-abatetik yuʼun te yajwale.
10 Jich yuʼun la yakʼbeyik snaʼ te David: «Te Urías maba ko bael ta sna». Jaʼ yuʼun, te David jich la sjojkʼoybey te Urías: «¿Mabal namaluk* te banti talate? ¿Bin yuʼun te maba koat bael ta anae?».
11 Te Urías jich la yalbey te David: «Te skaxaul chapbilkʼop, te winiketik yuʼun Israel sok Judá ayik ta nainel ta nailpakʼetik, te kajwal Joab sok te swiniktake ayik ta jilel ta jamalal. Jich yuʼun, ¿snujpʼbal te ya xboon ta jna te ya xweʼ x-uchʼajon sok te ya jokin ta wayel te kiname? ¡Jamal ya kal ta atojol te maba jich ya jpase!».
12 Jich yuʼun, te David jich la yalbey te Urías: «Jilanxan yoʼtik liʼi, pajel ya jtikunat sujtel». Jich jil ta Jerusalén te Urías ta kʼajkʼal-abi soknix te yan kʼajkʼale.
13 Ta patil, te David la stikun ta ikʼel te Urías swenta ya xweʼ x-uchʼajik, jich la syakubtes. Pero, te kʼalal ijkʼub te kʼinale maba ko bael ta sna te Urías, tey bajt ta wayel te banti ya xway te j-abatetik yuʼun te yajwale.
14 Te kʼalal sakub te kʼinale, te David la stsʼibaybey bael jun carta te Joab sok jaʼnix la yakʼbey bael te Urías.
15 Jich la stsʼibay ta scarta te David: «Jaʼ nail xa awakʼik te Urías, jaʼ te banti kʼax tulanxan te guerra. Tey-abi ijkitayaik stukel swenta jich ya x-ejchentesot sok tey ya xlaj-a».
16 Te Joab la yil ta lek te mukʼul lum, jaʼ yuʼun tey la yakʼ-a te Urías te banti snaʼoj te ay winiketik te ay yipik ta yakʼel guerra.
17 Te kʼalal lokʼik tal te winiketik yuʼun te mukʼul lum sok te la yakʼbeyik guerra te Joab, ay lajik chaʼoxtul te j-abatetik yuʼun te David, tey laj-euk-a te Urías te hitita-winik.
18 Jich yuʼun, te Joab la stikun ta albeyel te David spisil te bin kʼot ta pasel ta guerrae.
19 Jich la yalbey bael te winik te bajt yal te kʼope: «Te kʼalal lajix awoʼtan ta scholbeyel yaʼiy-a te ajwalil spisil te bin kʼot ta pasel ta guerrae,
20 yaniwan xjuʼ ya x-ilin te ajwalil sok jich ya yalbat: ‹¿Bin yuʼun te noptsajex* bael ta mukʼul lum ta yakʼel guerra? ¿Yuʼunbal maba anaʼojik te ya stʼimuyik koel tal flechaetik ta sba te tsʼajkʼe?
21 ¿Machʼa la smil te Abimélec snichʼan Jerubéset? ¿Mabal jaʼuk jtul ants te chʼojbot koel tal stonil chaʼ* ta sba te tsʼajkʼ te jich laj ta Tebez? ¿Bin yuʼun te bayal noptsajex* bael ta tsʼajkʼe?›. Teme jich la yalbate, jichme xa awalbey: ‹Tey laj-euk-a te Urías, te j-abat awuʼune, jaʼ te hitita-winike›».
22 Jich bajt te winik sok kʼot scholbey yaʼiy te David spisil te bin albot bael ta mantal yuʼun te Joab.
23 Ta patil, jich la yalbeyxan te David: «Jaʼ ayxan yipik te winiketik yuʼunike sok lokʼik tal ta yakʼbelotik guerra ta jamalal, pero la jnutskotik sujtel kʼalalto ta yochibal te mukʼul lume.
24 Pero, te j-akʼtʼimalteʼetik kʼalalto ta sba te tsʼajkʼ la stʼimuyik tal flechaetik ta stojol te j-abatetik awuʼune, jich yuʼun, ajwalil, ay lajik chaʼoxtul te j-abatetik awuʼune. Tey laj-euk-a te Urías, te j-abat awuʼune, jaʼ te hitita-winike».
25 Te kʼalal jich la yaʼiy stojol te David, jich la yalbey ta mantal te winik te yichʼoj tal te kʼope: «Jichme xa awalbey te Joab: ‹Mame xa amel awoʼtan yuʼun te bin kʼot ta pasele, melel machʼauk ya xjuʼ ya xmilot yuʼun te espadae. Jich yuʼun akʼbeyaxan tulan guerra te mukʼul lum sok uʼunina›. Jaʼnix jich, te jaʼate akʼbeyame yip yoʼtan-euk».
26 Te kʼalal la yaʼiy stojol te yinam te Urías te laj te smamalale, jajch ta yokʼetayel.
27 Jaʼnax te kʼalal laj yorail te mel-oʼtane, te David la stikun ta ikʼel yuʼun ya yikʼ ta sna. Jich la yinamin sok la yakʼbey jtul yal. Pero, te bin la spas te David kʼax ma lek la yil te Jehová.
Notaetik
^ Jaʼ-abi, jaʼ te kʼalal kʼaxemix yorail-a te sike. Jaʼniwan ta yuilal marzo o abril. Ilawil ta apéndice, B15.
^ O «malix-a te kʼajkʼale».
^ Jaʼniwan ya skʼan ya yal te bolobento skʼoplal ta skaj te la yil schamele.
^ Ta hebreo: «poka awok».
^ O «te bin la yakʼ te ajwalile», jaʼniwan skʼoplal weʼelil te ya yichʼ tikunbeyel te machʼa ichʼbil ta mukʼe.
^ Ta yantik variante «jakaluk», «kʼubuluk».
^ Ta yantik variante «jijtsʼajex», «tijtsajex».
^ Ta yantik variante «jijtsʼajex», «tijtsajex».
