2 Samuel 13:1-39
13 Te Absalón, snichʼan David, ay jtul yijtsʼin achʼix te kʼax tʼujbil te Tamar sbiile. Te Amnón te yan snichʼan te David, la smulan te Tamar.
2 Te Amnón kʼaxto ay ta wokol-a ta skaj te Tamar te yijtsʼin te jich tsakot ta chamel yuʼune. Ta skaj te maba tabil ta winik te Tamar, kʼax wokol la yil te ay bin ya xjuʼ ya spasbeye.
3 Te Amnón ay jtul yamigo te Jehonadab sbiil, snichʼan Simeá, te jaʼ sbankil te David. Te Jehonadab jaʼ jtul winik te kʼax pʼij.
4 Jich la sjojkʼoybey te Amnón: «Jich bitʼil te snichʼanat ajwalil, ¿bin yuʼun te ayat ta mel-oʼtan ta jujun sab? ¿Yabal xjuʼ ya acholbon kaʼiy?». Jich la yal te Amnón: «Yuʼun kʼaxto ya jmulan te Tamar, te yijtsʼin te kijtsʼin Absalón».
5 Te Jehonadab jich la yalbey te Amnón: «Mejtsʼana aba ta awayib sok jich xa apas te ayat ta chamel yilele. Jich yuʼun, te kʼalal ya xtal yilat te atate, jichme xa awalbey: ‹Awokoluk, albeya te akʼa taluk te kijtsʼin Tamar sok te akʼa yichʼbon tal jweʼel. Teme ya schajpan ta jtojol sok ya yakʼbon te weʼelil te ya sweʼik te machʼatik ayik ta chamele, yame xweʼon›».
6 Jich yuʼun, te Amnón la smejtsʼan sba ta swayib sok jich la spas te ay ta chamel yilele, tey-abi tal ta ilel yuʼun te ajwalile. Te Amnón jich la yalbey te ajwalil: «Awokoluk, akʼa taluk te kijtsʼin Tamar. Akʼa spas ta jtojol chaʼpejch pan te jichik yilel te bin-utʼil oʼtanil sok akʼa yakʼbon yuʼun ya jweʼ».
7 Te David jich la stikun ta albeyel te Tamar: «Awokoluk, baan ta sna te abankil* Amnón sok pasbeya sweʼel».
8 Jich bajt te Tamar ta sna te Amnón te sbankil* te banti metsele. Te Amnón la yil te kʼalal la swotsʼ harina te Tamar, te la spas te pan sok te la staʼajtese.
9 Tey-abi la slokʼes te panetik te ay ta sartén, pero ma la skʼan la sweʼ te Amnón sok jich la yal: «¡Lokʼanik bael ta apisilik!». Jich lokʼik bael ta spisilik tey-a.
10 Te Amnón jich la yalbey te Tamar: «Ichʼa tal te weʼelil ta jwayib sok jaʼatnixme ya awakʼbon jweʼ». Jich te Tamar la yichʼbey bael ta swayib te Amnón te sbankil* te panetik te jichik yilel te bin-utʼil oʼtanil te la spase.
11 Te kʼalal noptsaj* bael ta stojol yuʼun ya yakʼbey sweʼ te pane, te Amnón la stsak te Tamar sok jich la yalbey: «Laʼ, kijtsʼin, laʼ, wayukotik».
12 Pero, te Tamar jich la yal: «¡Maʼuk, jbankil!* Ma xa atsak awutsʼinon. Maʼyuk jich ta pasel ta Israel. Ma xa apas te bin kʼax ilobtik sbae.
13 Teme jich la apasbone, mame xkujch kuʼun te kʼexlale. Te jaʼat-euke jichme ya xkʼoat te bin-utʼil bol winik ta Israel. Kʼopona te ajwalil, ya jnaʼ te ya yakʼ te ya awikʼone».
14 Pero, te Amnón maba la yichʼ ta wenta te bin albote. Te bitʼil jaʼ bayalxan yip te Amnón la stsak yutsʼin te yijtsʼin, jich la sbolobtesbey skʼoplal.
15 Jich te Amnón jajch spʼaj ta oranax ta yoʼtan te Tamar, jaʼ kʼaxtoxan jelaw te bitʼil la spʼaj ta yoʼtan te bitʼil skʼanoj ta sjajchibale. Jaʼ yuʼun, jich la yalbey: «¡Jajchan, lokʼan bael!».
16 Jich la yal te Tamar: «¡Maʼuk, jbankil,* ma xa atenon lokʼel! ¡Teme jich ya apase, jaʼ kʼaxto chopol* ya xkʼotxan-a te bin la apasbonixe!». Pero, te Amnón maba la yichʼ ta wenta te bin albote.
17 Te Amnón la yikʼ tal jtul yabat te keremto sok jich la yalbey: «Awokoluk, lokʼesa bael ta jtojol te ants ini sok maka jilel ta lek te tiʼnaile».
18 (Te Tamar slapoj bael jlijkʼ tʼujbil snajtil kʼuʼ,* melel jich ya slapik te yantsil nichʼnab te ajwalil te mato tabilik ta winike). Te yabat te Amnón la sten lokʼel te Tamar sok la smak jilel ta lek te tiʼnaile.
19 Tey-abi, te Tamar la sbujkʼiy stanul kʼajkʼ ta sjol, la schʼiʼ* te tʼujbil snajtil kʼuʼ te slapoje, yak ta okʼel bael sok yakʼoj skʼab ta sjol.
20 Te kʼalal ilot yuʼun te sbankil* Absalón, jich jojkʼoybot: «¿Jaʼbal la stsak yutsʼinat te abankil Amnón? Mame ayuk bin xa awal kala ijtsʼin, abankilme te Amnón. Mame xa anaʼulan ta awoʼtan te bin la awichʼ pasbeyele». Tey-abi, te Tamar jil ta nainel ta sna te Absalón te sbankil. Maʼyuk machʼa la yalbey yaʼiy te bin kʼot ta pasele.
21 Kʼax bayal ilin te ajwalil David te kʼalal la yaʼiy stojol-abi. Pero ma la skʼan la yakʼbey smel yoʼtan te Amnón te snichʼane, melel jaʼ sba snichʼan sok kʼux ta yoʼtan.
22 Te Absalón maʼyuk bin chopol* ni lek la yalbey te Amnón, melel te Absalón xkupet slab yoʼtan ta stojol te Amnón ta skaj te la sbolobtesbey skʼoplal te Tamar te yijtsʼine.
23 Te kʼalal tsʼakaj cheb jaʼbil te bin kʼot ta pasele, te Absalón la yikʼ ta weʼel spisil te snichʼnab te ajwalil, melel te machʼatik yakik ta sjoxbeyel* te stsotsel stuminchij te Absalón ayik ta Baal-Hazor ta nopol* Efraín.
24 Te Absalón bajt yil te ajwalil sok jich la yalbey: «Yakon ta sjoxbeyel* te stsotsel tuminchijetik kuʼune. Awokoluk, ajwalil kuʼun, ¿yabal xjuʼ ya xtal ajokinon sok te j-abatetik awuʼune?».
25 Pero, jich la yal te ajwalil: «Maʼuk, jnichʼan, melel teme ya xbootik jpisiltike, yame kakʼtik awokol». Manchukme te Absalón maba la skom sba ta yalulanbeyel te ajwalil, maba la skʼan bajt. Pero la yakʼbey bael bendición.
26 Jich yuʼun, te Absalón jich la yalbey te ajwalil: «Teme ma xjuʼ awuʼun ya xbaat te jaʼate, awokoluk, jaʼ akʼa bajtuk te Amnón te jbankile». Jich jojkʼoybot yuʼun te ajwalil: «¿Bin yuʼun te jaʼ ya akʼan ya awikʼ baele?».
27 Ta skaj te maba la skom sba te Absalón ta yalulanbeyel te ajwalile, la stikun bael te Amnón sok spisil te snichʼnabe.
28 Jich yuʼun, te Absalón jich la yalbey ta mantal te j-abatetik yuʼune: «Awokoluk, te kʼalal ya awilik te tseʼelix yoʼtan-a te Amnón ta skaj te vino, yame kalbeyex ‹¡Milaik te Amnón!›. Jaʼme yorail te ya amilike. Mame xiwex, ¿yuʼunbal ma joʼukon yak jpasbelex ta mantal? Ayukme yip awoʼtanik sok mame xiwex».
29 Jich yuʼun, te j-abatetik yuʼun te Absalón la smilik te Amnón jich te bitʼil albotik ta mantal yuʼun te Absalón. Te kʼalal kʼot ta pasel-abi, spisil te yantikxan snichʼnab te ajwalil jajchik ta jujuntul, mo ta smulaik sok lokʼik bael ta anel.
30 Te kʼalal ayik ta bael ta be-a te snichʼnab te ajwalile, jich kʼot ta albeyel te David: «Te Absalón la smil spisil te snichʼnab te ajwalile, maʼyuk kol jilel jtuluk».
31 Te kʼalal jich la yaʼiy stojol te ajwalil, la stejkʼan sba, la schʼiʼ* skʼuʼ sok la smejts’an sba ta lum. Spisil te j-abatetik yuʼune tekʼajtik jilel ta stsʼeel sok la schʼiʼik-euk te skʼuʼike.
32 Pero, te Jehonadab snichʼan Simeá, te sbankil te David, jich la yal: «Kajwal, mame xa achʼuun te la yichʼ milel spisil te anichʼnab, melel jaʼnax laj te Amnón. Jaʼ la yal ta mantal te Absalón, melel la yakʼ ta yoʼtan te ya smil te Amnón jaʼto tal te bin-ora la sbolobtesbey skʼoplal te Tamar te yijtsʼine.
33 Jich yuʼun, kajwal, mame xa achʼuun* te bitʼil yak ta alel te laj spisil te anichʼnabe, melel jaʼnax laj te Amnón».
34 Yan stukel te Absalón lokʼ bael ta anel. Tey-abi, te kʼalal la sut sit ta spat te j-ilkʼinal ta toyol, la yil te bayal machʼatik yakik ta talel ta be te ay ta stsʼeel te witse.
35 Jich yuʼun, te Jehonadab jich la yalbey te ajwalil: «¡Ilawil! Sujtikix tal te anichʼnabe, jich te bitʼil la yalbat te j-abat awuʼun ini».
36 Jaʼnax te kʼalal laj yoʼtan ta kʼop* te Jehonadab, ochik tal te snichʼnab te ajwalil, yakik ta tulan okʼel. Jaʼnix jich, te ajwalil sok spisil te j-abatetik yuʼune tulan okʼik-euk.
37 Yan stukel te Absalón bajt ta anel te banti ay te Talmái snichʼan Amihud te ajwalil yuʼun Guesur. Te David bayal kʼajkʼal ay ta mel-oʼtan yuʼun te snichʼane.
38 Te Absalón ayin oxeb jaʼbil ta Guesur.
39 Te kʼalal kʼaxix-a te mel-oʼtan la yaʼiy te ajwalil David ta swenta te laj te Amnón, jaʼ yoʼtanuk ya skʼan ya yilix-a te Absalón.
Notaetik
^ Ta yantik variante «axiʼlel».
^ Ta yantik variante «xiʼlel».
^ Ta yantik variante «xiʼlel».
^ Ta yantik variante «jijtsʼaj», «tijtsaj».
^ Ta yantik variante «jxiʼlel».
^ Ta yantik variante «jxiʼlel».
^ Ta yantik variante «ma lek».
^ O «jlijkʼ snajtil kʼuʼ te ay schʼalil».
^ Ta yantik variante «xetʼ».
^ Ta yantik variante «xiʼlel».
^ Ta yantik variante «ma lek».
^ Ta yantik variante «sjochbeyel».
^ Ta yantik variante «tijil».
^ Ta yantik variante «sjochbeyel».
^ Ta yantik variante «xetʼ».
^ Ta hebreo: «mame xa awakʼ ta awoʼtan».
^ Ta yantik variante «aʼiyej».
