2 Samuel 14:1-33
14 Jich yuʼun, te Joab te skerem-al Zeruyá la yil te ajwalil te yoʼtanuk ya yilix te Absalón.
2 Jaʼ yuʼun, te Joab la stikun tal ta ikʼel jtul pʼijil ants ta Tecoa sok jich la yalbey: «Akʼa ta ilel te ayat ta mel-oʼtan yilele. Lapa akʼuʼ yuʼun mel-oʼtan sok mame xa awakʼbey aba aceite te ay sperfumeil. Jichme xa apas aba te bin-utʼil jtul ants te ayix bayal tiempo te yak ta okʼel ta skaj te ay machʼa laj yuʼune.
3 Tey-abi baan ta stojol te ajwalil sok cholbeya yaʼiy te bin ya kalbate». Te Joab la yalbey yaʼiy te ants te bin ya skʼan ya scholbey yaʼiy te ajwalil.
4 Jich te tecoíta-ants bajt ta stojol te ajwalil, la spajkan sba kʼalal ta lum, la snijan sba ta stojol sok jich la yalbey wokol: «¡Ajwalil, koltayawon!».
5 Jich la yal te ajwalil: «¿Bin-a te awokole?». Jich la yal te ants: «¡Oʼbol jba! Meʼba antson. Lajemix te jmamalale.
6 Ay chaʼtul yalatak-a te j-abat awuʼun ini. Te kʼalal ayik ta jamalal-ae, jajch smaj sbaik, ta skaj te maʼyuk machʼa xatotik yuʼune, te jtule la yejchentes te yane sok la smil.
7 Spisil te machʼatik ay kuʼune la skontrainikix te j-abat awuʼun ini sok jich yakik ta yalel: ‹¡Akʼa ta jkʼabkotik te machʼa milawan yuʼun ya jmiltik, jich ya stoj sok skuxlejal te bitʼil la smil te yermanoe! Manchukme jaʼxanix jtul-a te akerem-ale›.* Yame stupʼbonik te slajibal akʼal te yak ta tilele,* jichme ya stupʼbeyik te stsʼumbal sok te sbiil te jmamalal ta sba te balumilal».
8 Te ajwalil jich la yalbey te antse: «Sujtan bael ta ana. Joʼonme ya kal mantal te ya schajpanik te kʼop ini».
9 Te tecoíta-ants jich la yalbey te ajwalile: «Awokoluk, kajwal, jaʼ akʼa kʼotuk ta jwenta te mulil sok ta swenta te machʼatik ay yuʼun te jtate. Pero mame ayuk smul ya xjil stukel te ajwalil sok te mukʼul naktajibal yuʼune».
10 Tey-abi, jich la yal te ajwalil: «Teme ay machʼa ay bin ya yalbatxane, ikʼa tal ta jtojol, jich maʼyukix bin-ora ya yutsʼinat-a».*
11 Jich la yalxan te antse: «Awokoluk, ajwalil kuʼun, ala ta jamal* ta stojol te Jehová te Dios awuʼun te manchuk ya yakʼbeyxan swokol te kal te machʼa ya sutbey spakol te chʼichʼ sok te maba ya smilbone». Jich la yal te ajwalil: «Jamal ya kalbat ta stojol Jehová te kuxul Dios te maʼyuk machʼa ya spikbey ni jlijkʼuk stsotsel sjol te akerem-ale».*
12 Jich la yal te ants: «Awokoluk, ajwalil kuʼun, ay bin ya skʼan ya yalbat te j-abat ants awuʼun ini». «Kʼopojan», xchi te ajwalile.
13 Jich la yal te ants: «¿Bin yuʼunix-a te jich apasoj ta stojol te lum yuʼun te Diose? Ta swenta te bin la awalixe, yakat ta stael amul, melel maba awikʼoj sujtel tal te akerem nich’an te tenbil lokʼele.
14 Yananix xlajotik-a sok jich ya xkʼootik te bin-utʼil jaʼ te ya yichʼ malel ta lum te ma xjuʼix ta tsobele. Pero, te Diose maʼyuk machʼa ya slajinbey skuxlejal sok ya sle bintik-utʼil ya yikʼ tal ta stojol te machʼatik namajemik* ta stojole.
15 Jaʼ yuʼun tal kalbat awaʼiy, ajwalil kuʼun, melel la xiwtesonik te ants winiketike. Jaʼ yuʼun, jich la yal te j-abat ants awuʼun ini: ‹Awokoluk, akʼa jkʼopon te ajwalile. Yaniwan spas te bin ya jkʼanbey te ajwalile.
16 Yaniwan yaʼiybon jkʼop te ajwalil sok yaniwan skoltayotik lokʼel ta skʼab te winik te ya skʼan ya spojbotik te bin yakʼojbotik te Dios joʼon sok te jip jtul jkerem-ale›.
17 Jaʼ yuʼun, jich la yal te j-abat ants awuʼun ini: ‹Awokoluk, jaʼ akʼa yakʼbon slamalil kʼinal kaʼiy te bin ya yalbon te ajwalil›. Melel te ajwalil kuʼun ya snaʼ stsajtayel* te bin lek sok te bin ma lekuk jich te bin-utʼil jtul chʼul-abat yuʼun te smelelil Diose.* Akʼame sjokinat te Jehová te Dios awuʼune».
18 Tey-abi, te ajwalil jich la yalbey te ants: «Ay bin ya jojkʼoybat sok mame xa amukbon ta awoʼtan». Jich la yal te ants: «Awokoluk, ajwalil kuʼun, kʼopojan».
19 Te ajwalil jich la sjojkʼoybey te ants: «¿Jaʼbal la yalbat te Joab te bin tal apase?». Jich la yal te ants: «Jamal ya kalbat ta atojol, ajwalil kuʼun, smelelil* te bin ya awale, jaʼ te Joab te j-abat awuʼun te machʼa la yalbon te bin ya skʼan ya jpas sok spisil te bin ya kale.
20 Jaʼ jich la spas te Joab te j-abat awuʼun swenta yakuk xjelon te bin anopoj ta swenta te bin kʼot ta pasele, pero kʼax bayal spʼijil yoʼtan te ajwalil kuʼun jich te bin-utʼil te chʼul-abat yuʼun te smelelil Dios* te spisil ya sna’ te bin yak ta kʼoel ta pasel ta lum kuʼuntike».
21 Ta patil, te ajwalil jich la yalbey te Joab: «Lek ay, jichme ya jpas. Baan, ikʼa sujtel tal te kerem Absalón».
22 Jich ta oranax la spajkan sba kʼalal ta lum te Joab, la snijan sba ta stojol te ajwalil sok jajch yalbey yutsil skʼoplal. Jich la yal te Joab: «Ta ora ini, te j-abat awuʼun ini ya snaʼix stojol te lek ilbil awuʼune, ajwalil kuʼun, melel la apas te bin la jkʼanbate».
23 Jich jajch te Joab, bajt ta Guesur sok la yikʼ tal ta Jerusalén te Absalón.
24 Pero, jich la yal te ajwalil: «Akʼa bajtuk ta sna, mame jkʼan ya xtal yilon». Jich bajt ta sna te Absalón sok ma bajt yil te ajwalile.
25 Ta spamal Israel maʼyuk yan winik te kʼax bayal ya yichʼ albeyel yutsil skʼoplal ta swenta te stʼujbilal jich bitʼil te Absalón. Maʼyuk falta yuʼun kʼalalto ta ye’tal yok jaʼto kʼalal ta sjol.
26 Ta slajibal jujun jaʼbil ya setʼ lokʼel te stsotsel sjole ta skaj te kʼax al ya yaʼiye. Te kʼalal ya setʼ lokʼel te stsotsel sjole, 200 siclo* yalal jaʼ chikan te jayeb yalal te ton* te ya stuuntes ta spʼisel sbiluk te ajwalil.
27 Te Absalón ayin* oxtul skerem nichʼnab sok jtul yantsil nichʼan te Tamar sbiil, te mero kʼax tʼujbil achʼix.
28 Tsʼakaj cheb jaʼbil te nain ta Jerusalén te Absalón, pero ma bajt yil te ajwalile.
29 Jich yuʼun, te Absalón la stikun ta ikʼel te Joab yuʼun ya stikun bael ta stojol te ajwalile, pero ma la skʼan tal te Joab. La schaʼtikun ta ikʼel, pero ma la skʼan tal yan buelta.
30 Ta patil, jich la yalbey te j-abatetik yuʼune: «Te skʼinal te Joab slakʼoj sba sok te kuʼune sok stsʼunoj cebada tey-a. Baanik, chikʼbeyaik». Jich yuʼun, te j-abatetik yuʼun te Absalón la schikʼik te kʼinale.
31 Tey-abi, te Joab bajt ta sna te Absalón sok jich la yalbey: «¿Bin yuʼun te la schikʼbonik te jkʼinal te j-abatetik awuʼune?».
32 Te Absalón jich la yalbey te Joab: «Te joʼone jich la jtikunbat ta alel: ‹Laʼ liʼi, yuʼun ya jtikunat bael ta stojol te ajwalil yuʼun jich ya ajojkʼoybey ta jwenta: «¿Bin yuʼun te la alokʼeson tal ta Guesur? Jaʼ lek te tey jilukon-ae. Koʼtanuk ya kilat, ajwalil, teme yuʼun-nix ay jmul-ae, milawon»›».
33 Jich yuʼun, te Joab bajt ta stojol te ajwalil sok la yalbey yaʼiy te bin albot yuʼun te Absalón. Jaʼ yuʼun, te ajwalil la stikun ta ikʼel te Absalón, te kʼalal kʼote, la spajkan sba kʼalal ta lum ta stojol te ajwalile. Tey-abi, te ajwalil la yujtsʼuy* te Absalón.
Notaetik
^ O «jaʼ te machʼa ay ta swenta yichʼel te bintik ay yuʼun te state».
^ Jaʼ ya skʼan ya yal te ay smukʼul yoʼtan te ma xtupʼ te stsʼumbale.
^ Ta yantik variante «yilbajinat-a».
^ Ta hebreo: «juluk ta awoʼtan».
^ O «maba ya xchʼay koel ta lum ni jlijkʼuk stsotsel sjol te akerem-ale».
^ Ta yantik variante «jakalajemik», «kʼubenik».
^ Ta yantik variante «stʼunel ta lek».
^ O «maʼyuk machʼa ya xjuʼ ya xbajt ta skʼexam skʼab ni ta swaʼel skʼab ta swenta».
^ Jaʼniwan 2.3 kilo. Ilawil ta apéndice, B14.
^ Te ton ini jaʼnax ya yichʼ tuuntesel ta sna te ajwalil sok ma pajaluk sok te yantik tonetik te ya yichʼ tuuntesel ta swenta pʼisojibal.
^ Ta yantik variante «pʼejkaj», «tojk».
^ Ta yantik variante «sbujtsʼi».
