2 Samuel 16:1-23
16 Te kʼalal kʼax-xan bael ta sjol wits te David, tey yak ta maliyel yuʼun-a te Zibá, jaʼ te j-abat yuʼun te Mefibóset, yikʼoj chaʼkojt burroetik te skuchoj 200 ta pejch pan, 100 ta pejch tenbil takin tsʼusub, 100 ta pejch tenbil takin higo sok tenbil sit palmera soknix jun mukʼul jarra yuʼun vino.
2 Te ajwalil jich la sjojkʼoybey te Zibá: «¿Bin yuʼun te la awichʼ tal te biluketik ini?». Jich la yal te Zibá: «Ajwalil kuʼun, te burroetik ini jaʼme ya xmoik tey-a te machʼatik ay awuʼun, te pan sok te sit awal tsʼunubil jaʼme yuʼun te awiniktak, te vino jaʼme yuʼun te machʼatik ya xlujbik ta beel ta jochol takin kʼinal».
3 Te ajwalil jich la yalbey te Zibá: «¿Banti ay te smam* te awajwale?». Te Zibá jich la yalbey te ajwalil: «Jil ta Jerusalén, melel jich la yal: ‹Te lum Israel yame sujtesbon ta ora ini te wentainel yuʼun te jmamuche›».*
4 Te ajwalil jich la yalbey te Zibá: «Spisil te bin ay yuʼun te Mefibóset jaʼ awuʼun». Te Zibá jich la yal: «Ya jnijan jba ta atojol, ajwalil kuʼun. Lekukme ilbilon awuʼun».
5 Te k’alal kʼot te ajwalil David ta Bahurim, lokʼ tal jtul winik te ay bin yutoj sba sok te Saúl te Simeí sbiil, snichʼan Guerá, x-awetnax ta sbolkʼoptayel te David te kʼalal noptsaj* bael ta stojole.
6 Yak ta schʼojtiklanel ta ton te David sok spisil te j-abatetik yuʼun soknix spisil te machʼatik jokinbil yuʼun, tey ochem skʼoplalik-a te winiketik te ay yipik ta yakʼel guerra te ayik ta swaʼel skʼab sok ta skʼexam skʼab* te ajwalil David.
7 Te Simeí jich yak ta sbolkʼoptayel te David: «¡Lokʼan bael, lokʼan bael liʼi, jmilawal! ¡Ma xtuunat!
8 Te Jehová yak yakʼbelat atoj te bitʼil la amilbey spisil te machʼatik ay yuʼun te Saúl, jaʼ te machʼa la apojbey te wentainel yuʼune. Jaʼ yuʼun, te Jehová jaʼ la yakʼbeyix ta skʼab te anichʼan Absalón te wentainele. ¡Ta skaj te jmilawalat, spisilme-ora ay awokol!».
9 Jich yuʼun, te Abisái yal Zeruyá jich la yalbey te ajwalil: «¿Bin yuʼun te ya xtal sbolkʼoptaybon te ajwalil kuʼun te chamen tsʼiʼ ini? Awokoluk, akʼbon permiso yuʼun ya xbajt jxotʼbey* lokʼel te sjole».
10 Pero, jich albot yuʼun te ajwalil: «¿Bin awentaik-a yalatak Zeruyá? Akʼa sbolkʼoptayon, melel jaʼ jich albot yuʼun te Jehová: ‹¡Bolkʼoptaya te David!›. Jich yuʼun, maʼyuk machʼa jich ya xjuʼ ya yalbey, ¿bin yuʼun te jich ya apase?».
11 Tey-abi, te David jich la yalbey te Abisái sok spisil te j-abatetik yuʼun: «Teme jaʼnix te jnichʼan, te jaʼnix jchʼichʼel, te ya skʼan ya smilone, ¡¿jaʼuktobalix ma xjuʼ ya spas-a jtul stsʼumbal Benjamín?! ¡Ijkitayaik! ¡Akʼa sbolkʼoptayon, melel jaʼ jich albot yuʼun te Jehová!
12 Yaniwan yilbon te jwokol te Jehová sok ya yakʼbon bendición te Jehová te manchuk jaʼuk ya xkʼot ta pasel te bolkʼoptayel te yak ta alel ta jtojol ta kʼajkʼal ini».
13 Te kʼalal laj yoʼtan ta yalel te David-abi, bajt sok te swiniktak, pero te Simeí yak ta bael ta schʼujt wits ta nopol* te banti yak ta bael te David. Yak ta sbolkʼoptayel, yak ta schʼojel ta ton sok yak ta sbujkʼiyel ta tsʼubil lum.
14 Tey-abi, te ajwalil sok spisil te ants winiketik te jokinbil yuʼune kʼotik te banti snopoj ya xkʼotike. Kʼax lujbenik-a, jaʼ yuʼun la skux yoʼtanik.
15 Te k’alal jich yak ta kʼoel ta pasel-abi, kʼotik ta Jerusalén te Absalón sok spisil te winiketik yuʼun Israel. Tey ay-euk-a te Ahitofel.
16 Te kʼalal och bael te Husái te arkita-winik, jaʼ te yamigo te David, te banti ay te Absalón, jich la yalbey: «¡Jal akʼa kuxinuk te ajwalil! ¡Jal akʼa kuxinuk te ajwalil!».
17 Te kʼalal jich la yaʼiy stojol te Absalón, jich la yalbey te Husái: «¿Jichbal ya awakʼbey yil te awamigo te kʼuxul oʼtanil te ma x-ijkitaywane? ¿Bin yuʼun te ma baat sok te awamigoe?».
18 Te Husái jich la yalbey te Absalón: «Maʼuk, jaʼ ya jkʼan ya jkoltay te machʼa tsabil yuʼun te Jehová, te machʼa tsabil yuʼun te winiketik ini soknix spisil te winiketik yuʼun Israel. Jaʼ yuʼun yame jokinat.
19 Jich te bitʼil la kalbatix awaʼiy, ¿machʼa ya kakʼ jba ta abatinel ta stojol? ¿Mabal jaʼuk ta stojol te snichʼan te kamigoe? Jich te bitʼil abatinon ta stojol te atate, jaʼnixme jich ya x-abatinon ta atojol».
20 Tey-abi, te Absalón jich la yalbey te Ahitofel: «Ala kaʼiytik, ¿bin ya xjuʼ ya jpastik?».
21 Te Ahitofel jich la yalbey te Absalón: «Jokina ta wayel te yantik yinamtak* te atat te la yijkitaylan ta skanantayel te nae. Jichme ya snaʼik spisil te lum Israel te jkʼaxel ya awakʼ aba ta pʼajel yuʼun te atate sok jichme ya stsakxan yip yoʼtanik te machʼatik sjokinojate».
22 Jich yuʼun la spasbeyik jun nailpakʼ ta sba na te Absalón, jich la sjokin ta wayel te yantik yinamtak* te stat ta stojol spisil te lum Israel.
23 Ta skʼajkʼalel-abi, te tojobtesel ya yakʼ te Ahitofel jich ya yilik te talem ta stojol* te smelelil Diose.* Jich ya yilik-euk-a te David sok te Absalón spisil te tojobtesel ya yakʼ te Ahitofel.
Notaetik
^ Ta hebreo: «snichʼan».
^ Ta hebreo: «jtat».
^ Ta yantik variante «jijtsʼaj», «tijtsaj».
^ Ta yantik variante «xin kʼab».
^ Ta yantik variante «jkʼokbey».
^ Ta yantik variante «tijil».
^ O «ay bin ya sjojkʼoybeyik».
