2 Samuel 17:1-29
17 Te Ahitofel jich la yalbey te Absalón: «Awokoluk, akʼbon jtsa 12 mil ta tul winiketik swenta ya kikʼtiklan bael ta snutsel te David ta ajkʼabal ini.
2 Jaʼme ya jtsak-a te kʼalal lujbenix sok te kʼalal maʼyukix yip-ae, ya kakʼ ochuk xiwel ta yoʼtan. Jichme ya x-anik bael spisil te machʼatik jokinbil yuʼun sok jaʼnaxme ya jmil te ajwalil.
3 Tey-abi yame kikʼbat sujtel tal spisil te ants winiketik. Chikan te bin ya xkʼot ta stojol te winik te yakat ta sleele, yananix sujt tal spisil-a te ants winiketike. Jichme ya x-ayin lamalkʼinal ta spisil te lume».
4 Te bin la yal te Ahitofel kʼax lek la yaʼiy te Absalón sok spisil te jwolwanejetik yuʼun te Israel.
5 Pero, te Absalón jich la yal: «Awokoluk, ikʼaik tal-euk te Husái te arkita-winik yuʼun ya kaʼiytik-euk te bin ya yale».
6 Jich yuʼun, te Husái kʼot ta stojol te Absalón sok jich albot yuʼun te Absalón: «Jaʼ ini te bin la yalbotik te Ahitofel te ya skʼan ya jpastike. ¿Yabal skʼan ya jchʼuuntik te tojobtesel yuʼune? Teme maʼuke, ala kaʼiytik te bin ya skʼan ya jpastike».
7 Te Husái jich la yalbey te Absalón: «Te tojobtesel la yakʼ te Ahitofel ta ora ini ma lekuk».
8 Jich la yalxan te Husái: «Anaʼoj ta lek te ay yip ta yakʼel guerra te atat sok te swiniktak. Jaʼnix jich, kʼax ilinemik, jaʼ jichik te bin-utʼil jkojt meʼ oso te chʼayem te yalatak. Te atate jaʼnix jich ya snaʼ yakʼel ta lek guerra sok maba tey ya xkʼax ajkʼabal yuʼun-a te banti ay te ants winiketike.
9 Ta ora ini snakʼojixniwan sba ta chʼentikil* o ta yantikxan lugaretik. Teme jaʼ nail ya yakʼbeyex guerra, jichme ya yalik te machʼatik ya yaʼiyik stojole: ‹¡La yichʼikix tsalel te machʼatik ya skoltayik te Absalón!›.
10 Hasta te winik te ma xiw, te jich yoʼtan te bin-utʼil león-choj, yame xnijk yoʼtan yuʼun xiwel. Melel spisil te lum Israel snaʼoj te ay yip ta yakʼel guerra te atat sok te ma xiw yoʼtanik te swiniktake.
11 Te tojobtesel kuʼune jaʼ ini: tsoba tal spisil te winiketik yuʼun Israel ta Dan jaʼto kʼalal ta Beer-Seba te jich ya xkʼotik te bin-utʼil sjiʼal te stiʼil te mare, jaʼatme ya atojobteslan bael ta yakʼel guerra.
12 Chikan te banti ayike yame kakʼbeytik guerra, jichme ya xkʼootik ta stojolik te bin-utʼil tsʼujul te ya xyal koel ta sba te lume. Maʼyuk machʼa ya xkol jilel, ni jaʼuk te David sok te swiniktake.
13 Teme ya snakʼ sba ta mukʼul lum, spisil te lum Israel yame kichʼtik bael jlazotik yuʼun ya jochtik bael te mukʼul lum kʼalalto ta spamlej jaʼto te kʼalal maʼyukix ni jpʼijuk chʼin ton tey-a».
14 Jich yuʼun, te Absalón sok spisil te winiketik yuʼun Israel jich la yalik: «¡Te tojobtesel la yakʼ te Husái te arkita-winik, jaʼ kʼax lekxan-a te bitʼil la yal te Ahitofel!». Melel te Jehová schapojix-a* te ya sjin te tojobtesel la yakʼ te Ahitofel. Jich la yakʼ kʼotuk ta pasel te Jehová yuʼun ya sta swokol te Absalón.
15 Ta patil, te Husái jich la yalbey te sacerdote Sadoc sok te Abiatar: «Te Ahitofel jich la stojobtes te Absalón sok te jwolwanejetik yuʼun te Israel. Pero, jich la jtojobteslan te joʼone.
16 Jaʼ yuʼun, jich xa atikunik ta albeyel ta oranax te David: ‹Ta ajkʼabal ini mame xjilat ta be jaʼetik* te ya xkʼax ta jochol takin kʼinal. Yame skʼan ya xkʼaxat bael ta jejch mukʼul jaʼ. Teme maʼuke, yame xjuʼ ya awichʼ milel sok spisil te ants winiketik te sjokinojate›».
17 Te Jonatán sok te Ahimáaz ayik ta En-Roguel. Ta skaj te ma skʼan ya yakʼ sbaik ta ilel te ya x-ochik bael ta mukʼul lum, talik ta albeyel yuʼun jtul j-abat ants te bin ya xbajt yalbeyik skʼoplale, jich bajt yalbeyik yaʼiy te ajwalil David.
18 Pero ilotik yuʼun jtul kerem sok bajt yalbey yaʼiy te Absalón. Jich yuʼun, te Jonatán sok te Ahimáaz bajtik ta oranax sok kʼotik ta Bahurim ta sna jtul winik te ay jun pozo ta yamakʼul sna. Tey la snakʼ sbaik ta yutil,
19 te yinam te winik la smuk ta pakʼ te pozo sok la skʼi wochʼbil sit awal tsʼunubil ta sba. Maʼyuk machʼa la snaʼ te tey nakʼalik-ae.
20 Te j-abatetik yuʼun te Absalón kʼotik ta sna te ants sok jich la sjojkʼoybeyik: «¿Banti ay te Ahimáaz sok te Jonatán?». Jich la yal te ants: «Toj bajtik ta be jaʼetik». La sleik ta bayuk, pero ma la staik, jich sujtik bael ta Jerusalén.
21 Te kʼalal bajtikix-a te j-abatetik yuʼun te Absalón, te Ahimáaz sok te Jonatán lokʼik tal tey ta pozo sok jich bajt yalbeyik te ajwalil David: «Te Ahitofel jich tojobteswan ta skontrainbelex. Jich yuʼun kʼaxanik bael ta oranax ta jejch mukʼul jaʼ».
22 Jich te David sok spisil te ants winiketik te jokinbil yuʼune oranax kʼaxik bael ta jejch mukʼul jaʼ Jordán. Te kʼalal sakub te kʼinale, kʼaxemikix spisilik ta jejch mukʼul jaʼ Jordán-a.
23 Te kʼalal la yil te Ahitofel te maba la schʼuunik te tojobtesel la yakʼe, la smojtesbey smontura te sburro, jich bajt ta sna ta banti slumal. Te kʼalal laj yoʼtan ta yakʼbeyel mantal te machʼatik ay yuʼune, la sjojkʼan sba, jich laj. Tey la yichʼ mukel ta smukenal te antiguo smeʼ state.
24 Te David bajt ta Mahanaim, te Absalón sok spisil te winiketik yuʼun Israel kʼaxik bael ta jejch mukʼul jaʼ Jordán.
25 Te Absalón jaʼ la yakʼ te Amasá ta swentainel te soldadoetik ta swenta sjelol te Joab. Te Amasá jaʼ snichʼan jtul israel-winik te Itrá sbiil; te Itrá la sjokin ta wayel te Abigaíl, te yantsil nichʼan Nahás; te Abigaíl jaʼ swix te Zeruyá, te snan* te Joab.
26 Te Absalón sok te winiketik yuʼun Israel la spas scampamentoik ta skʼinal Galaad.
27 Te kʼalal kʼot te David ta Mahanaim, tey ay-a te Sobí, snichʼan Nahás te talem ta Rabá te jaʼ skʼinal te ammonitaetik, tey ay-euk-a te Makir, snichʼan Amiel te talem ta Lo-Debar sok te Barzilái te galaadita-winik te talem ta Roguelim,
28 la yichʼik tal wayibaletik, lechlech bojchetik, vasijaetik te pasbil ta ajchʼal, trigo, cebada, harina, chʼilbil sit awal tsʼunubil, haba-chenekʼ, lenteja, takin sit awal tsʼunubil,
29 chab, mantequilla,* tuminchijetik sok queso. Spisil ini jaʼ la yichʼbeyik tal te David sok spisil te ants winiketik te jokinbil yuʼun swenta ya sweʼik, melel jich la yalik: «Ay swiʼnalik sok takin yoʼtanik te ants winiketik ini te ayik ta jochol takin kʼinal soknix lujbenik».
Notaetik
^ O «tonetik te jutajtik», «chujkul beetik te banti ay niwak tontikil».
^ O «yalojix ta mantal-a».
^ O jaʼniwan ya skʼan ya yal «spamlej».
^ Ta yantik variante «smeʼ», «smama».
^ Jaʼ slewul leche te ya xlokʼ te kʼalal ya yichʼ juyilanel o yukʼilanel, te sak o kʼan sbonile.
