2 Samuel 19:1-43
19 Jich la yalbeyik yaʼiy te Joab: «Yak ta okʼel te ajwalil sok yak ta mel-oʼtan yuʼun te Absalón».
2 Manchukme juʼ yuʼunik tsalaw ta kʼajkʼal-abi, kʼatpʼuj ta yorail mel-oʼtan yuʼunik spisil te soldadoetik, melel la yaʼiyik stojol te kʼaxto yak ta mel-oʼtan te ajwalil ta swenta te snichʼane.
3 Te soldadoetik maba kʼopojikix ochel ta mukʼul lum, ayik ta kʼexlal jich te bin-utʼil ya xkʼexawik te machʼatik ya xlokʼik ta anel ta guerra.
4 La smuk sit yelaw te ajwalil sok tulan jich yak ta yalel: «¡Jnichʼan, Absalón! ¡Jnichʼan, Absalón, jnichʼan!».
5 Jaʼ yuʼun, te Joab och bael ta na te banti ay te ajwalil sok jich la yalbey: «Ta ora ini la awakʼ ta kʼexlal spisil te j-abatetik awuʼune, jaʼik te machʼatik maba la yakʼat ta milel, ni jaʼuk te akerem nichʼnab, awantsil nichʼnab, awinamtak sok te yantik awinamtak.*
6 Kʼux ta awoʼtan te machʼatik ya spʼajat sok ya apʼaj te machʼatik kʼuxat ta yoʼtan. Jamal la awakʼ ta ilel te maʼyuk skʼoplal ta awoʼtan te capitanetik yuʼun te soldadoetik awuʼun sok te j-abatetik awuʼun, jnaʼoj ta lek te kuxuluk te Absalón ta ora ini sok te lajemukotik ta jpisiltike, tseʼel awoʼtan yuʼun te jichuke.
7 Jich yuʼun jajchan, baan akʼbeya smukʼul yoʼtan te j-abatetik awuʼune. Teme maba ya apase, jamal ya kalbat ta stojol Jehová te maʼyuk ni jtuluk winik ya sjokinat jilel te ajkʼabal ini. Jaʼme kʼaxtoxan jich wokol ya xkʼot-a te bitʼil spisil te wokoliletik kʼaxem ta atojol ta akeremilto».
8 Jich jajch te ajwalil sok bajt snajkan sba ta yochibal te mukʼul lume. Jich la yalbeyik yaʼiy spisil te lume: «Te ajwalil nakal ta yochibal te mukʼul lume». Jich talik spisil te ants winiketik ta stojol te ajwalil.
Yan stukel te winiketik yuʼun Israel anik bael ta snaik.
9 Ta spisil te stsʼumbal Israel te ants winiketik jich yakik ta wulajanel ta kʼop: «Te ajwalil la skoltayotik lokʼel ta skʼab te jkontrataktik sok ta skʼab te filisteoetik. Pero, ta skaj te Absalón lokʼ bael ta anel ta skʼinal.
10 Te Absalón te la kotsestik ta ajwalil kuʼuntik, lajix ta guerra. ¿Bin yuʼun maba ya kikʼtikix sujtel tal-a te ajwalile?».
11 Te ajwalil David jich la stikun ta albeyel te sacerdote Sadoc sok te Abiatar: «Kʼopojanik sok te jwolwanejetik yuʼun Judá sok jichme xa awalbeyik: ‹Spisil te bintik yakik ta yalel te lum Israel, julix te banti ayone. ¿Bin yuʼun te patilto ya awikʼonik sujtel ta jna te jaʼexe?
12 Te jaʼexe kermanotakex sok jun-nax jchʼichʼeltik. ¿Bin yuʼun te patilto ya awikʼonik sujtele?›.
13 Sok jichme xa awalbeyik te Amasá: ‹¿Mabal junuknax jchʼichʼeltik? Akʼa yakʼbon tulan castigo te Dios teme ma jaʼuk ya kotsesat ta capitán yuʼun soldadoetik ta ora ini te jaʼ ya ajelolin te Joab›».
14 Te ajwalil lek ilot yuʼun spisil te winiketik yuʼun Judá sok jich la stikunbeyik ta albeyel te ajwalil: «Sujtan tal sok spisil te j-abatetik awuʼune».
15 Te k’alal sujt tal sok jul ta mukʼul jaʼ Jordán te ajwalil, te winiketik yuʼun Judá tal staik te ajwalil ta Guilgal swenta ya sjokinik kʼaxel ta mukʼul jaʼ Jordán.
16 Te Simeí snichʼan Guerá, te jaʼ stsʼumbal Benjamín te talem ta Bahurim, ko bael ta oranax sok te winiketik yuʼun Judá swenta ya sta sbaik ta be sok te ajwalil David,
17 jokinotik bael yuʼun jmil ta tul winiketik yuʼun Benjamín. Jaʼnix jich, te Zibá, te j-abat te ya x-aʼtej ta sna te Saúl, te jokinbil bael yuʼun te 15 ta tul snichʼnab sok te 20 ta tul j-abatetik yuʼun, oranax ko bael ta mukʼul jaʼ Jordán te k’alal mato xjul-a te ajwalile.
18 Kʼax bael* ta be jaʼ swenta ya skoltay kʼaxel te machʼatik ay yuʼun te ajwalil sok yuʼun ya spas spisil te bin ya xkʼanbot yuʼun te ajwalile. Te kʼalal jtebxanix ya skʼan ya xkʼax bael ta jejch mukʼul jaʼ Jordán-a te ajwalil, te Simeí snichʼan Guerá la skejan sba ta stojol.
19 Jich la yalbey te ajwalil: «Kajwal, mame xa awichʼ ta wenta te bin ma lek la jpasbat te bin kʼajkʼalil lokʼat tal ta Jerusalén. Mame xa akʼej ta awoʼtan, ajwalil kuʼun,
20 melel snaʼoj ta lek te j-abat awuʼun ini te la sta smul ta atojole. Jich yuʼun, joʼon nail koon tal ta spisil te stsʼumbal José yuʼun tal jtaat ta be, ajwalil kuʼun».
21 Jich la yal ta oranax te Abisái te yal Zeruyá: «¿Mabal snujpʼuk te ya yichʼ milel te Simeí ta swenta te la sbolkʼoptayat, jaʼat te tsabilat yuʼun te Jehová?».
22 Pero, jich la sjakʼ te David: «¿Bin awentaik-a yalatak Zeruyá? ¿Bin yuʼun te ya akontrainik te bin ya kale? ¿Yuʼunbal ma anaʼojik te ya x-ochon ta ajwalil yan buelta ta lum Israel?».
23 Tey-abi, te ajwalil jich la yalbey te Simeí: «Maba ya xlajat», sok la yalbey ta jamal te maba ya xlaje.
24 Te Mefibóset, te smam* te Saúl, jaʼnix jich ko bael ta stael ta be te ajwalil. Jaʼto te bin kʼajkʼalil lokʼ bael te ajwalil sok jaʼto te kʼalal jun yoʼtan sujt tale, te Mefibóset maba la spok yok, maba la setʼ yisim soknix maba la sakʼ te skʼuʼe.
25 Te kʼalal kʼot* ta Jerusalén te Mefibóset ta stael te ajwalil, jich jojkʼoybot yuʼun te ajwalil: «Mefibóset, ¿bin yuʼun te ma la ajokinon baele?».
26 Jich la yal te Mefibóset: «Ajwalil kuʼun, jaʼ la sloʼlayon te j-abat kuʼun. Ta skaj te koxoone jich la kalbey: ‹Chajpanbon te jburro yuʼun ya xmoon-a sok yuʼun ya jokin bael te ajwalile›.
27 Pero, te j-abat kuʼun la sleon ta kʼop ta atojol, ajwalil kuʼun. Pero, te jaʼate jaʼ jichat te bin-utʼil jtul chʼul-abat yuʼun te smelelil Diose,* jich yuʼun pasa te bin lek ya awile.
28 Ajwalil kuʼun, juʼ te lajuk amil spisil te machʼatik ay yuʼun te jtate, pero ma jichuk la apas, la awakʼ te ya xweʼ ta amesa te j-abat awuʼun ini. Jaʼ yuʼun, ¿aybal jderecho yuʼun ay bin ya jkʼanbatxan, ajwalil kuʼun?».
29 Pero, te ajwalil jich la yalbey te Mefibóset: «Maʼyuk bin ya kalbeytikix skʼoplal. La jtaix ta nopel te jaʼat sok te Zibá yame axatbey abaik te kʼinale».
30 Jich yuʼun, te Mefibóset jich la yalbey te ajwalil: «Akʼa yichʼ jilel spisil, melel jun awoʼtan sujtat tal ta ana, ajwalil kuʼun».
31 Te Barzilái te galaadita-winik lokʼ tal ta Roguelim, kʼot ta skʼinal Jordán swenta ya sjokin bael te ajwalil kʼalalto ta mukʼul jaʼ Jordán.
32 Mamalix-a te Barzilái, ayix 80 yaʼbilal-a. Te jayeb tiempo ayin ta Mahanaim te ajwalile, te Barzilái la yakʼbey weʼelil te ajwalil, melel jaʼ jkʼulej winik.
33 Jaʼ yuʼun, te ajwalil jich la yalbey te Barzilái: «Konik, jokinawon bael. Joʼon ya kakʼbat aweʼel ta Jerusalén».
34 Pero, te Barzilái jich la yalbey te ajwalil: «¿Yuʼunbal jal kʼajkʼal kuxulonxan? Jich yuʼun, ¿bin yuʼun te ya jokin moel te ajwalil ta Jerusalén?
35 Ayix 80 kaʼbilal. ¿Yabal xjuʼ kuʼun stsajtayel* te bin ay yutsil sok te bin maʼyuk yutsil? ¿Yuʼunbal yato kaʼiybey sbujtsʼ te bin ya jweʼ sok te bin ya kuchʼe? ¿Yuʼunbal yato kaʼiybey te skʼayoj te winiketik sok te antsetik? Jaʼ yuʼun, ¿bin yuʼun te ya kakʼbatxan awokol, ajwalil kuʼun?
36 Tseʼel koʼtan te la jokinat tal liʼto kʼalal ta mukʼul jaʼ Jordán. Jich yuʼun, ma puersauk te ya amajtanteson te ya awikʼon bael ta ana, ajwalil kuʼun.
37 Awokoluk, akʼawon sujtel. Tey ya jkʼan ya xlajon ta jlumal sok tey ya jkʼan ya smukonik ta nopol* smukenal te jtat sok te jnan.* Pero ilawil, liʼ ay te Kimham te j-abat awuʼune. Jaʼ akʼa bajtuk sok jaʼ akʼa sjokinat kʼaxel, ajwalil kuʼun. Jaʼ xa apas te bin lek ya awil ta stojole».
38 Jich la yal te ajwalil: «Jaʼ ya sjokinon kʼaxel te Kimham, jaʼ ya jpas ta stojol te bin lek ya awile. Ya jpas spisil te bin ya akʼanbone».
39 Tey-abi jajchik ta kʼaxel ta jejch mukʼul jaʼ Jordán spisil te ants winiketike. Te kʼalal ya xkʼaxix bael ta jejch mukʼul jaʼ Jordán-a te ajwalil, la yujtsʼuy* te Barzilái sok la yakʼbey bendición. Jich sujt bael ta sna te Barzilái.
40 Te kʼalal kʼax bael ta jejch mukʼul jaʼ Jordán te ajwalil ta stojol bael te Guilgal, jokinot bael yuʼun te Kimham. Spisil te ants winiketik yuʼun Judá sok olil te lum yuʼun Israel la sjokinik kʼaxel te ajwalile.
41 Spisil te winiketik yuʼun Israel jich la sjojkʼoybeyik te ajwalil: «Ajwalil kuʼuntik, ¿bin yuʼun te muken la yikʼatik tal te kermanotaktik, jaʼ te winiketik yuʼun Judá? ¿Bin yuʼun te muken la yikʼik tal kʼaxel te machʼatik ay awuʼun sok spisil te awiniktake?».
42 Spisil te winiketik yuʼun Judá jich la yalbeyik te winiketik yuʼun Israel: «Melel jaʼ jfamiliatik te ajwalile. ¿Bin yuʼun te ya x-ilinexe? ¿Yuʼunbal ay jweʼojbeytik sweʼel te ajwalil o aybal yakʼojbotik jmajtantik te ajwalile?».
43 Pero, te winiketik yuʼun Israel jich la yalbeyik te winiketik yuʼun Judá: «Te joʼonkotike lajunchajp tsʼumbalilonkotik, jich yuʼun jaʼ ayxan jderechotik ta stojol te David te bitʼil te jaʼexe. ¿Bin yuʼun te maba la awichʼonkotik ta wentae? ¿Mabal joʼukotik nail la skʼan bajt kikʼtik sujtel tal te ajwalil te jichuke?». Pero, jaʼ tulanxan kʼot te bin la yalik te winiketik yuʼun Judá te bitʼil te winiketik yuʼun Israel.
Notaetik
^ O jaʼniwan ya skʼan ya yal «Kʼaxik bael».
^ Ta yantik variante «yil-al kerem».
^ O jaʼniwan ya skʼan ya yal «lokʼ bael».
^ Ta yantik variante «stʼunel ta lek».
^ Ta yantik variante «tijil».
^ Ta yantik variante «jmeʼ», «jmama».
^ Ta yantik variante «sbujtsʼi».
