2 Samuel 2:1-32
2 Ta patil, te David jich la sjojkʼoybey te Jehová: «¿Yabal xjuʼ xmoon bael ta junuk te mukʼul lumetik yuʼun Judá?». Jich albot yuʼun te Jehová: «Yak, moan bael». Jich la sjojkʼoyxan te David: «¿Banti ya xboon?». Jich albot yuʼun: «Ta Hebrón».
2 Jich mo bael te David sok te chaʼtul yiname, jaʼ te Ahinoam te talem ta Jezreel sok te Abigaíl te meʼba ants yuʼun te Nabal te talem ta Carmelo.
3 Te David jaʼnix jich la yikʼ bael te winiketik te jokinbil yuʼun soknix ta jujunchajp te sfamiliaike, kʼotik ta nainel ta mukʼul lumetik te ayik ta skʼinal Hebrón.
4 Ta patil talik te winiketik yuʼun Judá, la smalbeyik aceite ta sjol te David, jich la yotsesik ta ajwalil ta stsʼumbal Judá.
Jich la yalbeyik yaʼiy te David: «Te machʼatik la smukik te Saúl jaʼ te winiketik yuʼun Jabés-Galaad».
5 Jaʼ yuʼun, te David jich la stikun ta albeyel te winiketik yuʼun Jabés-Galaad: «Akʼa yakʼbeyex bendición te Jehová, melel te kʼalal la amukik te Saúl te awajwalike, la awakʼbeyik yil te kʼuxul oʼtanil te ma x-ijkitaywane.
6 Akʼame yakʼbeyex awilik te Jehová te kʼuxul oʼtanil te ma x-ijkitaywan sok junuk yoʼtan ta atojolik. Jaʼnix jich te joʼone yame kakʼbeyex awilik te slekil koʼtan ta swenta te bin la apasike.
7 Ta ora ini ayukme yip awoʼtanik sok mame xiwex, melel lajix te Saúl te awajwalik. Jaʼnix jich la smalbonikix aceite ta jol te stsʼumbal Judá yuʼun ochon ta ajwalil yuʼunik».
8 Pero, te Abner snichʼan Ner, te capitán yuʼun te soldadoetik yuʼun te Saúl, la yikʼ bael te Is-Bóset, snichʼan Saúl, ta Mahanaim te ay ta jejch mukʼul jaʼ.
9 La yotses ta ajwalil ta Galaad, ta Jezreel, ta Efraín, ta Benjamín, ta spamal Israel soknix ta stojol te asuritaetik.
10 Ay 40 yaʼbilal-a te Is-Bóset, snichʼan Saúl, te kʼalal och ta ajwalil ta Israel sok wentainwan cheb jaʼbil. Pero, te stsʼumbal Judá jaʼ la yakʼ sbaik ta stojol te David.
11 Te jayeb tiempo wentainwan te David ta Hebrón ta stsʼumbal Judá jaʼ jukeb jaʼbil sok wakeb u.
12 Ta patil, te Abner snichʼan Ner sok te swiniktak te Is-Bóset, snichʼan Saúl, jajchik bael ta Mahanaim, bajtik ta Gabaón.
13 Te Joab te skerem-al Zeruyá sok te swiniktak te David bajtik ta estanque* yuʼun Gabaón, tey kʼot sta sbaik-a. Te jtsojbe la yak’ sbaik ta jejch, te yan jtsojbe la yak’ sbaik ta yan jejch.
14 Te Abner jich la yalbey te Joab: «Ak’a smaj* sbaik te keremetik, kiltik te machʼa ya xjuʼ yuʼun». Jich la yal te Joab: «Lek ay, akʼa smaj sbaik».
15 Jich yuʼun jajchik sok la stsaik 12 ta tul winiketik te jaʼik stsʼumbal Benjamín, te jaʼ swiniktak te Is-Bóset, snichʼan Saúl, sok la stsaik 12 ta tul swiniktak te David swenta ya smaj sbaik.
16 Ta jujuntul la stsak sba ta sjolik sok la slow sbaik ta espada ta smoch bakelik,* jich lajik ta spisilik. Jaʼ yuʼun, Helcat-Hazurim* la sbiilin te lugar-abi te ay ta Gabaón.
17 Ta swenta te bin kʼot ta pasel ta kʼajkʼal-abi, jajch tulan guerra yuʼun. Jich te swiniktak te David la stsalik te Abner sok te winiketik yuʼun Israel.
18 Tey ayik-a te oxtul skerem-al te Zeruyá: te Joab, Abisái sok te Asahel. Te Asahel mero ya xjuʼ yuʼun animal jich te bin-utʼil ya x-animaj jkojt chij ta sjamalel kʼinal.
19 Te Asahel la snuts bael te Abner, maba lokʼ bael ta swaʼel skʼab o ta skʼexam skʼab* ta snutsel te Abner.
20 Te kʼalal la sut sit ta spat te Abner, jich la sjojkʼoy: «¿Jaʼatbal Asahel?». «Joʼon», xchi te Asahel.
21 Jaʼ yuʼun, te Abner jich la yalbey te Asahel: «Ma xa anutsonix, jaʼ xa anuts jtuluk te keremetike sok ichʼbeya jilel spisil te bin ya apojbeye». Pero, te Asahel ma la yijkitay ta snutsel te Abner.
22 Te Abner jich la schaʼyalbey te Asahel: «Ma xa anutsonix, teme maʼuke yame jmilat. ¿Bin-utʼil ya xjuʼ ya kilbeyxan sit yelaw te abankil Joab teme la jmilate?».
23 Pero, te Asahel maba la schʼuun. Jaʼ yuʼun, te Abner la stsʼapbey ta schʼujt te Asahel te steʼel slanza te lokʼ kʼalal ta spat. Jich yal ta lum sok laj. Spisil te machʼatik ya xkʼaxik te banti lajem te Asahel, ya stejkʼan sbaik ta yilel.
24 Jich yuʼun, te Joab sok te Abisái bajt snutsik te Abner. Yakix ta malel-a te kʼajkʼal te kʼalal kʼotik ta chʼin wits yuʼun Amá te ay ta yelaw Guíah ta sbelal jochol takin kʼinal yuʼun Gabaón.
25 Jich te stsʼumbal Benjamín la stsob sbaik ta sjoyobal te Abner sok jun-nax la yakʼ sbaik te jich la stejkʼan sbaik ta sba chʼin wits.
26 Te Abner jich tulan la yawtay te Joab: «¿Jayebxan tiempo te talel kʼaxel ya jmil jbatik sok te espada kuʼuntike? ¿Yuʼunbal ma xa awil te jaʼnax ya xjuʼ ya yakʼ bayal jwokoltik? ¿Binto-ora ya awalbey te awiniktak te yakuk yijkitayik ta snutsel te yermanotake?».
27 Tey-abi, te Joab jich la yalbey te Abner: «Jamal ya kal ta stojol te kuxul Dios te manchuk komawanate, maba la skom sbaik te winiketik ta snutsel te yermanotak jaʼto ta sakubel kʼinal te jichuke».
28 Te Joab la yokʼesin te xulubil, jich te swiniktak la skom sbaik ta snutsel te israeletik sok laj skʼoplal te guerrae.
29 Te Abner sok te swiniktak sjunal ajkʼabal beenik ta sbelal Arabá, kʼaxik bael ta Jordán, kʼaxik bael ta chujkul beetik,* kʼotik kʼalal ta Mahanaim.
30 Kʼalal te Joab la yijkitay ta snutsel te Abner, la stsob tal spisil te swiniktake. Laj 20 ta tul te swiniktak te David sok tey ochem skʼoplal-euk-a te Asahel.
31 Pero, te swiniktak te David la stsalik te stsʼumbal Benjamín sok te swiniktak te Abner; ta spisil lajik 360 ta tul winiketik.
32 Ta patil la yichʼbeyik bael te sbakʼetal te Asahel, la smukik ta Belén ta smukenal te state. Te Joab sok te swiniktak sjunal ajkʼabal beenik sok yakix ta sakubel kʼinal-a te kʼalal kʼotik ta Hebrón.
Notaetik
^ Jaʼ jun mukʼul yawil jaʼ.
^ O «stsal».
^ O «scostillaik».
^ Te ya skʼan ya yal «skʼinal cuchilloetik te pastiklanbil ta ton».
^ Ta yantik variante «xin kʼab».
^ O jaʼniwan ya skʼan ya yal «ta spamal Bitrón».
