2 Samuel 21:1-22
21 Ta skʼajkʼalel te David ayin wiʼnal te jalaj oxeb jaʼbil. Jich yuʼun, te David la sjojkʼoybey te Jehová, jich albot yuʼun te Jehová: «Te Saúl sok te machʼatik ay yuʼun ay smulik ta smalel chʼichʼ, melel la smil te gabaonitaetike».
2 (Te gabaonitaetik ma jaʼuk israeletik, jaʼ stsʼumbal te amorreoetik te ayto jilemik-ae. Te israeletik jamal la yalbeyik te gabaonitaetik te kuxul ya xjilike, pero te Saúl jkʼaxel k’an slajinlan stukel, melel yoʼtanuk kʼan skoltay te lum Israel sok te Judá). Jich yuʼun, te ajwalil David la stikun ta ikʼel te gabaonitaetik yuʼun kʼopoj sok.
3 Te David jich la yalbey te gabaonitaetik: «¿Bin ya xjuʼ ya jpas ta atojolik? ¿Bin ya xjuʼ ya jpastik ta atojolik yuʼun ya apasbonkotik perdón yuʼun te jmulkotik te jich ya awakʼbeyik bendición te bin yakʼojbonkotik te Jehová?».
4 Jich la yalik te gabaonitaetik: «Ma xjuʼ ya atojbonkotik ta plata ni ta oro te bin la spasbonkotik te Saúl sok te machʼatik ay yuʼune. Jaʼnix jich, maʼyuk machʼa ya xjuʼ ya jmiltik ta Israel». Jaʼ yuʼun, jich albotik yuʼun te David: «Chikan te bin ya akʼanbonike, yame jpas».
5 Te gabaonitaetik jich la yalbeyik te ajwalil: «Te winik-abi kʼan slajinbotik te jtsʼumbaltik sok la schap te kʼan slajinotik ta jkʼaxel ta skʼinal Israel,
6 jaʼ yuʼun akʼbonkotik juktul snichʼnab te Saúl yuʼun ya jijpanbeytik te sbakʼetalik* ta stojol te Jehová ta Guibeá ta slumal Saúl, jaʼ te machʼa tsabil yuʼun-a te Jehová». Te ajwalil jich la yal: «Joʼonme ya kakʼbeyex ta akʼabik».
7 Pero, te ajwalil la snaʼbey yoʼbolil sba te Mefibóset —te snichʼan Jonatán, snichʼan Saúl— ta skaj te jamal la yal skʼopik ta stojol te Jehová te David sok te Jonatán, te snichʼan Saúl.
8 Te ajwalil jaʼ la stsa te Armoní sok te Mefibóset, te chaʼtul yalatak te Rizpá te yantsil nichʼan Ayá, jaʼ te la sta sok te Saúl, soknix te joʼtul yalatak te Mical te yantsil nichʼan Saúl, jaʼ te la sta sok te Adriel, snichʼan Barzilái, te meholatita-winike.
9 Tey-abi, te ajwalil la yak’tiklanbey ta skʼab te gabaonitaetik, jich la sjijpanbeyik ta wits te sbakʼetalik ta stojol te Jehová. Jich pajal lajik ta sjukebalik. Jaʼ la smilik-a te kʼalal jajch ta tsobel te sit awal tsʼunubil, jaʼ te kʼalal jajch ta tsobel te cebadae.
10 Tey-abi, te Rizpá yantsil nichʼan Ayá la stsak tal chʼixal pakʼ* sok la slim ta sba ton. Te Rizpá tey jil-a te kʼalal jajch ta tsobel te sit awal tsʼunubil jaʼto te kʼalal la yakʼ jaʼal te ajchʼ te sbakʼetalik te machʼatik la yichʼik jijpanele; ta kʼajkʼaleltik ma la yakʼ te ya xlujchaj te jaʼmal mutetik ta sbakʼetalik, ta ajkʼabal maba la yakʼ te ya xnoptsajik* tal te jtiʼawal chambalametike.
11 La yalbeyik yaʼiy te David te bin la spas te yan yinam* te Saúl, jaʼ te Rizpá yantsil nichʼan Ayá.
12 Jich te David bajt yichʼ tal te sbakel te Saúl sok te sbakel te Jonatán, te snichʼane. Jaʼ yichʼojik te jwolwanejetik* yuʼun Jabés-Galaad, melel jaʼ la yelkʼanik lokʼel ta plaza* yuʼun Bet-San, jaʼ te banti la sjijpanbeyik te sbakʼetal te Saúl sok te Jonatán te filisteoetike. Jaʼ te bin kʼajkʼalil la stsalik te Saúl te filisteoetik ta Guilboa.
13 Te David tey la yichʼbey tal-a te sbakel te Saúl sok te Jonatán, te snichʼane. Jaʼnix jich la yichʼbeyik tal te sbakel te winiketik te la yichʼik milele.*
14 Tey-abi la smukbeyik te sbakel te Saúl sok te Jonatán, te snichʼan, ta skʼinal Benjamín ta Zelá, la smukik ta smukenal te Quis te jaʼnix state. Jaʼnax te kʼalal laj yoʼtanik ta spasel spisil te bin pasotik ta mantal yuʼun te ajwalile, aʼiybot skʼopik yuʼun te Dios te bitʼil yakik ta skʼanel te bin ya xtuun yuʼun te slumalike.
15 Tey-abi, te filisteoetik sok te israeletik la yakʼbeyxan sbaik guerra. Jich yuʼun, te David sok te j-abatetik yuʼune koik bael ta yakʼbeyel guerra te filisteoetik, pero jajch ta lujbel te David.
16 Ay jtul winik te talem ta stsʼumbal refaím te Isbí-Benob sbiil, ay jun slanza te pasbil ta cobre te 300 siclo* yalal sok jun yachʼil yespada, kʼan smil te David.
17 Jich yuʼun, te Abisái te yal Zeruyá oranax tal skoltay te David. La yejchentes te filisteo sok la smil. Jaʼ yuʼun, te swiniktak te David jich la yalbeyik ta jamal: «¡Maba ya xlokʼatix ta yakʼel guerra sok joʼotik swenta ma xa atupʼ te tsumbil kʼajkʼ ta lum Israel!».
18 Ta patil, jajchxan guerra yuʼunik sok te filisteoetik ta Gob. Ta kʼajkʼal-abi, te Sibecái te talem ta Husá* la smil te Saf te talem ta stsʼumbal refaím.
19 Jajchxan guerra yuʼunik sok te filisteoetik ta Gob. Te Elhanán snichʼan Jaaré-Oreguim te betlemita-winik la smil te Goliat te guitita-winik te ay jun slanza te jich steʼel te bin-utʼil steʼel jalab.
20 Jajch guerra yuʼunik yan buelta ta Gat. Ay jtul winik tey-a te mero najt te ay 24 ta chʼix yalatak yok skʼab, wakwakchʼix ta jujun skʼab sok wakwakchʼix ta jujun yok. Te winik ini jaʼnix jich talem ta stsʼumbal refaím.
21 Te Jonatán snichʼan Simeí, te jaʼ sbankil te David, la smil te winik-abi ta skaj te maba la skom sba ta slabanel te lum Israel.
22 Te chantul winiketik-abi te talemik ta stsʼumbal refaím ta Gat jaʼ milotik yuʼun te David sok te j-abatetik yuʼune.
Notaetik
^ Ta hebreo: «yame kakʼkotik ta ilel», jaʼ ya skʼan ya yal te kʼasemik te yok skʼabik.
^ Ta yantik variante «xjijtsʼajik», «xtijtsajik».
^ O jaʼniwan ya skʼan ya yal «te yajwalik te kʼinal».
^ Ta hebreo: «akʼel ta ilele».
^ Jaʼniwan 3.42 kilo. Ilawil ta apéndice, B14.
^ O jaʼniwan skʼoplal «stsʼumbal Husá».
