2 Samuel 24:1-25
24 Te Jehová ilinxan ta stojol te israeletik te kʼalal ay machʼa jich tijbot yoʼtan yuʼun te David ta spasel ini: «Pasa censo ta Israel sok ta Judá».
2 Jaʼ yuʼun, te ajwalil jich la yalbey te Joab te capitán yuʼun te soldadoetik te tey jokinbil yuʼun-ae: «Awokoluk, baan ta spisil te stsʼumbal Israel, ta Dan kʼalal ta Beer-Seba, sok najkanbeya sbiilik spisil te machʼatik ayik ta lum swenta jich ya jnaʼ jayebik ta tul».
3 Pero, te Joab jich la yalbey te ajwalil: «Te Jehová te Dios awuʼune akʼa yak’ pʼoluk 100 buelta te machʼatik ayik ta lum sok jaʼukatnix ya awil, ajwalil kuʼun, pero ¿bin yuʼun te jich ya akʼan ya apase?».
4 Pero, jaʼ la yichʼxan ichʼel ta mukʼ te skʼop te ajwalil ma jaʼuk te skʼop te Joab sok te capitanetik yuʼun te soldadoetike. Jich yuʼun, te Joab sok te capitanetik yuʼun te soldadoetik lokʼik bael ta stojol te ajwalil yuʼun bajt spasik te censo ta lum Israel.
5 Kʼaxik bael ta jejch mukʼul jaʼ Jordán sok la spas scampamentoik ta Aroer te ay ta swaʼel* te mukʼul lum ta yolil te spamlej, jaʼnix jich bajtik ta stojol skʼinal Gat, ta patil ta Jazer.
6 Tey-abi bajtik ta Galaad sok ta skʼinal Tahtim-Hodsí, bajtikxan ta Dan-Jaán sok la yakʼik bael buelta ta stojol Sidón.
7 Ta patil bajtik ta Tiro te joytaybil ta tsʼajkʼ sok ta spisil te mukʼul lumetik yuʼun te heveoetik sok te cananeoetik. Ta patil kʼotik ta Négueb te ay ta skʼinal Judá ta lum Beer-Seba.
8 Te kʼalal kʼaxemix baluneb u sok 20 kʼajkʼal ta sbeentayel spamal te kʼinal, sujtik bael ta Jerusalén.
9 Te Joab kʼot yakʼbey te ajwalil te jayeb ta tul la yichʼik najkanbeyel sbiilik. Ta Israel ay 800 mil ta tul winiketik te chapalik sok yespadaik, ta Judá ay 500 mil ta tul winiketik.
10 Pero, te kʼalal lajix yoʼtan ta spasel-a te censo te David, ay bin ma lek albot yuʼun te yoʼtane, jaʼ yuʼun jich la yalbey te Jehová: «La jta bayal jmul ta swenta te bin la jpase. Jich yuʼun, awokoluk, Jehová, pasbon perdón yuʼun te jmule, melel te bin la jpase ya yakʼ ta ilel te ma jnaʼ kʼinale».
11 Te kʼalal jajch te David ta sakubelnax kʼinal, te Jehová jich la yalbey te j-alwanej Gad, jaʼ te winik te ya yil najalsitil* te ya yalbey yaʼiy te David:
12 «Baan, albeya jich te David: ‹Jich ya yal te Jehová: «Ay oxchajp te bin ya jkʼan ya jpas, tsaa te banti ya akʼane»›».
13 Jaʼ yuʼun, te Gad kʼot ta stojol te David sok jich la yalbey: «¿Banti ya akʼan? ¿Jabal te ya x-ayin wiʼnal jukeb jaʼbil ta akʼinal? ¿Jaʼbal te ya snutsat oxeb u te akontrae? O ¿jaʼbal te ya xtal tulan chamel* oxeb kʼajkʼal ta akʼinal? Jich yuʼun nopa ta lek swenta ya xbajt kalbey te machʼa la stikunon tale».
14 Te David jich la yalbey te Gat: «Kʼax tulan ya kaʼiy ini. Jaʼ ya jkʼan te ya x-ochotik ta skʼab te Jehová, melel kʼax bayal ya snaʼ yoʼbolil jbatik stukel. Pero maba ya jkʼan ya x-ochon ta skʼab ni jtuluk winik».
15 Jaʼ yuʼun, te Jehová la stikun tal tulan chamel* ta lum Israel, jajch ta sab jaʼto kʼalal tsʼakaj te yorail albile, lajik 70 mil ta tul ants winiketik te jajch tal ta skʼinal Dan jaʼto kʼalal ta Beer-Seba.
16 Te kʼalal la sjach skʼab te chʼul-abat ta stojol te Jerusalén yuʼun ya slajin, te Jehová kʼaxto la smel yoʼtan ta swenta te tulan wokolil ya yakʼ tale, jich yuʼun jich la yalbey te chʼul-abat te yak ta slajinel te lume: «¡Tikʼix-a! Kojtesaix te akʼabe». Te chʼul-abat yuʼun te Jehová nopol* ay te banti ya yichʼ majel te sit awal tsʼunubil yuʼun te Arauna te jebuseo-winik.
17 Kʼalal la yil te David te chʼul-abat te yak ta slajinel te lume, jich la yalbey te Jehová: «Joʼon te ay jmule, joʼon te la jpas te bin ma leke. Pero, te tuminchijetik ini, ¿aybal bin chopol* spasojik? Awokoluk, jaʼ akʼa yakʼbon castigo te akʼab sok te machʼatik ay yuʼun te jtate».
18 Jaʼ yuʼun, ta kʼajkʼal-abi te Gad bajt yil te David sok jich la yalbey: «Moan bael sok pasbeya jun skajtajib chikʼbil majtanil yuʼun te Jehová te banti ya yichʼ majel te sit awal tsʼunubil yuʼun te Arauna te jebuseo-winik».
19 Jich mo bael te David, jich la spas te bitʼil albot yuʼun te Gat sok jich te bitʼil pasot ta mantal yuʼun te Jehová.
20 Te kʼalal la yil koel te Arauna te yak ta talel te ajwalil sok te j-abatetik yuʼune, oranax lokʼ tal sok la spajkan sba k’alal ta lum ta stojol te ajwalile.
21 Jich la sjojkʼoy te Arauna: «Ajwalil kuʼun, ¿bin swentail te talat ta jtojol?». Jich la yal te David: «Tal jmanbat te akʼinal te banti ya amaj te sit awal tsʼunubil awuʼun swenta ya jpasbey jun skajtajib chikʼbil majtanil yuʼun te Jehová te jich ya xkejchaj-a te tulan wokolil te talem ta stojol te lume».
22 Pero, te Arauna jich la yalbey te David: «Ajwalil kuʼun, ichʼa te kʼinale sok akʼa te chikʼbil majtanil te jayeb ya akʼane. Liʼ ay te wakaxetik swenta ya awakʼ ta chikʼbil majtanil sok te teʼ te ya swuybey te spat te trigo soknix te yugo-teʼetik* yuʼun te wakaxetik swenta ya atuuntes ta siʼ.
23 Ya kakʼbat spisil ini, ajwalil kuʼun». Te Arauna jaʼnix jich la yalbey te David: «Akʼame yakʼbat bendición te Jehová te Dios awuʼune».
24 Pero, te ajwalil jich la yalbey te Arauna: «Maʼuk, yame jtojbat. Maba ya kakʼbey chikʼbil majtaniletik te Jehová te Dios kuʼun teme maba jmanoje». Jich yuʼun, te David la stoj 50 siclo* yuʼun plata te kʼinal te banti ya yichʼ majel te sit awal tsʼunubil sok te wakaxetike.
25 Jaʼ yuʼun, te David la spasbey jun skajtajib chikʼbil majtanil tey-a te Jehová, la yakʼbey chikʼbil majtaniletik sok milbil majtaniletik ta swenta lamalkʼinal. Jich yuʼun, te Jehová la yaʼiybey skʼop te machʼatik yakik ta skʼanel wokol yuʼun te lume, jich kejchaj te tulan wokolil ta stojol te lum Israel.
Notaetik
^ O «ta stojol sur».
^ Jaʼ chamel te oranax ya xpujk.
^ Jaʼ chamel te oranax ya xpujk.
^ Ta yantik variante «tijil».
^ Ta yantik variante «ma lek».
^ Jaʼ 570 gramo. Ilawil ta apéndice, B14.
