2 Samuel 4:1-12
4 Te kʼalal la yaʼiy stojol te Is-Bóset, te snichʼan Saúl, te laj ta Hebrón te Abner, laj yip la yaʼiy* sok bayal xiwik te israeletike.
2 Te snichʼan te Saúl ay chaʼtul swiniktak te jaʼik jwolwanejetik yuʼun te jpojbiluketik: Baaná sbiil te jtule, Recab sbiil te yane. Jaʼ snichʼnab te Rimón te beerotita-winik te talem ta stsʼumbal Benjamín. (Te Beerot jaʼnix jich ilbil te jaʼto skʼinal te stsʼumbal Benjamín.
3 Te beerotitaetik lokʼik bael ta anel ta Beerot bajtik ta Guitaim sok teyto ayik ta nainel-a jaʼto ta ora ini jich bitʼil jyanlumetik).
4 Te Jonatán, te snichʼan Saúl, ay jtul snichʼan te koxoe, Mefibóset sbiil. Te kʼalal joʼeb yaʼbilal-a te Mefibóset, tal kʼop ta Jezreel te jul yalik te laj te Saúl sok te Jonatán. Jaʼ yuʼun petot bael ta anel yuʼun te ants te chʼitesot yuʼune, pero te kʼalal yak ta anel-ae, yal koel yuʼun te alale jich koxo jil.
5 Te Recab sok te Baaná te snichʼnab Rimón te beerotita-winik bajtik ta sna te Is-Bóset te kʼalal mero kʼux-a te kʼajkʼale, yak ta skuxel yoʼtan te Is-Bóset jich te bitʼil kʼayem ta spasel ta olil kʼajkʼal.
6 Te Recab sok te Baaná te jun smeʼ statik ochik bael ta na te jich yilel te yakik ta sleel trigo, tey-abi la slowbeyik schʼujt ta espada te Is-Bóset. Ta patil lokʼik bael ta anel.
7 Te kʼalal ochik ta na, te Is-Bóset wayal ta swayib ta scuarto-a. La slowik ta espada sok la smilik, tey-abi la xotʼbeyik* lokʼel te sjol sok la yichʼbeyik bael. Sjunal ajkʼabal beenik ta sbelal Arabá.
8 Kʼotik ta Hebrón sok la yichʼik bael te sjol te Is-Bóset ta stojol te ajwalil David sok jich la yalbeyik: «Liʼ ay te sjol te Is-Bóset te snichʼan Saúl, te akontrae, jaʼ te machʼa kʼan smilate. Ta kʼajkʼal ini, ajwalil kuʼun, la yakʼbatix permiso te Jehová swenta ya awakʼbey spakol te Saúl sok te stsʼumbale».
9 Pero, te David jich la yalbey te Recab sok te Baaná te jun smeʼ statik, te jaʼ snichʼnab te Rimón te beerotita-winik: «Jamal ya kal ta stojol Jehová te kuxul Dios —jaʼ te machʼa la skoltayon lokʼel ta spisil te jwokol—,
10 te winik te tal yalbon ‹Laj te Saúl›, te xchie, soknix te la skuy te lek te bin tal yalbone, te smajtan te la kakʼbeye, jaʼ te la jtsak sok la jmil ta Ziclag.
11 ¿Mabal kʼaxemukto jich ya jpasbey te chopol winiketik* te la smilik jtul winik te maʼyuk smul te wayal ta swayib ta sna-ae? ¿Mabal yakuk skʼan ya kakʼbeyex castigo sok te ya jtupʼbeyex akʼoplalik ta kʼinal ta skaj te la amalbeyik te schʼichʼele?».
12 Te David la spas ta mantal te swiniktak yuʼun ya smilik. La xotʼbeyik* te skʼabik sok te yokik, jaʼnix jich la sjijpanik ta stsʼeel estanque* te ay ta Hebrón. Yan stukel te sjol te Is-Bóset la yichʼbeyik bael sok la smukbeyik ta smukenal te Abner ta Hebrón.
Notaetik
^ Ta hebreo: «laj yip te skʼabe».
^ Ta yantik variante «skʼokbeyik».
^ Ta yantik variante «winiketik te ma lekuk stalelik».
^ Ta yantik variante «skʼokbeyik».
^ Jaʼ jun mukʼul yawil jaʼ.
