2 Samuel 5:1-25
5 Ta patil talik spisil te stsʼumbal Israel ta yilel te David ta Hebrón sok jich la yalbeyik: «¡Liʼme ayotik ta atojol! Jun-naxme jchʼichʼeltik.
2 Melel te kʼalal kuxulto-a te Saúl te ajwalil kuʼuntik, jaʼat te machʼa la atojobtes bael ta guerra te israeletik. Te Jehová jich la yalbat: ‹Jaʼatme ya akanantay te lum Israel kuʼun sok jaʼme jwolwanej ya xkʼoat yuʼun te lum Israel›».
3 Jich yuʼun, spisil te jwolwanejetik yuʼun te Israel tal yilik te ajwalil te ay ta Hebrón, jich te ajwalil David la schap skʼop sok te jwolwanejetik yuʼun te Israel ta stojol te Jehová ta Hebrón. Tey-abi la smalbeyik aceite ta sjol te David, jich la yotsesik ta ajwalil ta Israel.
4 Ay 30 yaʼbilal-a te David te kʼalal och ta ajwalil sok wentainwan 40 jaʼbil.
5 Kʼalalto ta Hebrón la swentain jukeb jaʼbil sok wakeb u te Judá. Kʼalalto ta Jerusalén la swentain 33 jaʼbil spisil te lum Israel sok te Judá.
6 Te ajwalil sok te swiniktak bajtik ta Jerusalén ta yakʼbeyel guerra te jebuseoetik te nainemik ta kʼinal-abi. Pero, te jebuseoetik jich la slabanik te David: «¡Maʼyuk bin-ora ya x-ochat tal ta jkʼinalkotik! Jaʼnix jich ya xjuʼ ya snutsat sujtel-euk te koxoetik sok te machʼatik ma xyilik kʼinale». Melel jich la snop ta yoʼtanik: «Maʼyuk bin-ora ya x-och tal ta jkʼinaltik te David».
7 Pero, te David la yuʼunin te mukʼul lum Sion te joytaybil ta tsʼajkʼ, jaʼ Mukʼul lum yuʼun David ta ora ini.
8 Ta kʼajkʼal-abi, te David jich la yal: «¡Te machʼatik ya xbajt yakʼbeyik guerra te jebuseoetik, akʼa ochukik bael te banti pasbil be jaʼ ta yutil lum yuʼun tey ya smilik-a ‹te koxoetik› sok ‹te machʼatik ma xyilik kʼinal›, jaʼik te machʼatik ilaybilik kuʼune!». Jaʼ yuʼun, jich ya yichʼ alel: «Te koxoetik sok te machʼatik ma xyilik kʼinal maʼyuk bin-ora ya x-ochik ta na».
9 Jich yuʼun, te David tey jil ta nainel ta mukʼul lum te joytaybil ta tsʼajkʼ, jaʼ te la sbiilin Mukʼul lum yuʼun David. Te David jaʼnix jich la spas tsʼajkʼetik sok naetik ta chʼin wits* soknix ta yantik lugaretik yuʼun te mukʼul lume.
10 Jich te David bejbe* la stsakxan bayal yip sok jokinbil yuʼun te Jehová te Dios yuʼun te jwolwanej yuʼun te soldadoetik.*
11 Jich yuʼun, te Hiram te ajwalil yuʼun Tiro la stikun kʼop ta stojol te David. Jaʼnix jich la stikun cedro-teʼetik, la stikun carpinteroetik sok albañiletik yuʼun ya sjachik moel te tsʼajkʼetik. Jaʼnix jich jajch spasbeyik sna te David.
12 Te David kʼot ta yoʼtan te akʼbot yip yuʼun Jehová te wentainel yuʼun ta lum Israel. Jaʼnix jich, te Diose la stoyesbey skʼoplal te wentainel yuʼun te David ta swenta te Israel te lum yuʼune.
13 Te k’alal lokʼ tal ta Hebrón te David sok kʼot ta Jerusalén, la slexan yinamtak sok yantikxan antsetik tey-a. Jaʼik te machʼatik akʼbotxan skerem nichʼnab sok yantsil nichʼnab.
14 Te sbiil te snichʼnab te David te ayinik* ta Jerusalén jaʼik ini: te Samúa, Sobab, Natán, Salomón,
15 Ibhar, Elisúa, Néfeg, Jafía,
16 Elisamá, Eliadá sok te Elifélet.
17 Te kʼalal la yaʼiyik stojol te filisteoetik te la yotsesik ta ajwalil te David ta lum Israel, bajt sleik te David yuʼun ya yakʼbeyik guerra. Te kʼalal jich la yaʼiy stojol te David, ko bael ta lugar te banti ya snakʼ sbae.
18 Te kʼalal kʼotik te filisteoetik, la spuk sbaik ta spamlej yuʼun Refaím.
19 Te David jich la sjojkʼoybey te Jehová: «¿Yabal xmoon bael ta yakʼbeyel guerra te filisteoetike? ¿Yabal awakʼtiklanbon ta jkʼab?». Jich albot yuʼun te Jehová: «Yak, moan bael, melel yame kakʼbat ta akʼab te filisteoetike».
20 Jaʼ yuʼun bajt ta Baal-Perazim te David sok tey la stsaltiklan-a te filisteoetike. Jaʼ yuʼun, jich la yal: «Te Jehová la sjambon ochel jbe ta yolil te jkontratak jich te bin-utʼil ya xjin koel jun tsʼajkʼ ta swenta te yip te jaʼe». Jich yuʼun, Baal-Perazim* la yakʼbey sbiil te lugar-abi.
21 Te filisteoetik tey la yijkitayik-a te lokʼombaetik yuʼunike, jich te David sok te swiniktak la yichʼik bael.
22 Tey-abi chaʼmoik bael te filisteoetik sok la spuk sbaik ta spamlej yuʼun Refaím.
23 Te David la sjojkʼoybey te Jehová, pero jich albot yuʼun: «Mame tojuknax ya xmoat bael ta stojolik ta yakʼel guerra. Jaʼ lek baan joya tal ta spatik, ta yelaw te chʼin bacá-teʼetik yuʼun tey ya awakʼbey tal guerra-a.
24 Te kʼalal ya awaʼiy te xchajetik te chʼin bacá-teʼetik te jich yaʼiyel te ay machʼatik yakik ta tulan beele, oranaxme xa awakʼbey guerra, melel jaʼme nailajem ta atojol te Jehová yuʼun ya smiltiklan te soldadoetik yuʼun te filisteoetike».
25 Te David jich la spas te bitʼil albot ta mantal yuʼun te Jehová, la smiltiklan te filisteoetik ta Gueba kʼalalto ta Guézer.
Notaetik
^ O «Miló». Jaʼ jpʼal kʼop ta hebreo kʼop te ya skʼan ya yal «butʼbil».
^ Ta yantik variante «xkechkon».
^ Jaʼ skʼoplal te chʼul-abatetik ta chʼulchan.
^ Ta yantik variante «pʼejkajik», «tojkik».
^ Te ya skʼan ya yal «yajwal te machʼa ya sjam bael be».
