2 Samuel 6:1-23
6 Te David la stsobxan tal te soldadoetik yuʼun Israel te pʼijubenik ta lek ta yakʼel guerra, jaʼ 30 mil ta tul winiketik.
2 Jich yuʼun, te David sok spisil te swiniktak te jokinbil yuʼune bajtik ta Baale-Judá yuʼun teyto bajt yichʼik tal-a te skaxaul chapbilkʼop yuʼun te smelelil Dios,* jaʼ te banti ya yalbeyik sbiil te Jehová te jwolwanej yuʼun te soldadoetike,* jaʼ te machʼa nakal ta smukʼul naktajib ta sba* te querubinetik.
3 Swenta ya slokʼesik tal te skaxaul chapbilkʼop yuʼun te smelelil Dios* ta sna te Abinadab te ay ta chʼin wits, la skajanik ta yachʼil carreta. Te Uzá sok te Ahió, te snichʼnab Abinadab, jaʼ yichʼojik bael te yachʼil carretae.
4 Jich la slokʼesik bael te skaxaul chapbilkʼop yuʼun te smelelil Dios* ta sna te Abinadab te ay ta chʼin wits, te Ahió jaʼ nailajem bael ta stojol te skaxaul chapbilkʼop.
5 Te David sok spisil te lum Israel tseʼelnax yoʼtanik yakik ta stijel spisil ta chajp aʼtejibaletik yuʼun música ta stojol te Jehová, yakik ta stijel te bintik pasbil ta enebro-teʼ, arpaetik, aʼtejibaletik te ay scuerdail, panderetaetik, sistroetik sok te sepsep takʼin te stsintsun skʼope.
6 Pero, te kʼalal kʼotik ta Nacón te banti ya yichʼ majel te sit awal tsʼunubil, te Uzá la stsak te skaxaul chapbilkʼop yuʼun te smelelil Diose,* melel te toroetik jtebxanix ma balchʼuj koel yuʼunik.
7 Jich yuʼun, bayal ilin te Jehová ta stojol te Uzá. Te smelelil Diose* la smil te Uzá ta skaj te maba ichʼot ta mukʼ yuʼune, tey laj ta stsʼeel te skaxaul chapbilkʼop yuʼun te smelelil Diose.
8 Pero ilin* te David ta skaj te bayal ilin te Jehová ta stojol te Uzá, jaʼto ta ora ini Pérez-Uzá* sbiil te lugar-abi.
9 Ta kʼajkʼal-abi, te David bayal la xiʼ te Jehová sok jich la yal: «¿Bin-utʼil ya xjuʼ ya kichʼ tal te skaxaul chapbilkʼop yuʼun te Jehová?».
10 Te David maba la skʼan la yichʼ tal te skaxaul chapbilkʼop yuʼun te Jehová te banti ay ta nainel, jaʼ ta Mukʼul lum yuʼun David. Te bin la spase jaʼ te la yakʼ ta ichʼel bael ta sna te Obed-Edom te guitita-winik.
11 Te skaxaul chapbilkʼop yuʼun te Jehová jalaj oxeb u ta sna te Obed-Edom te guitita-winik. Te Jehová spisil-ora la yakʼbey bendición te Obed-Edom sok spisil te machʼatik ay yuʼun ta sna.
12 Jaʼ yuʼun, jich la yalbeyik yaʼiy te ajwalil David: «Te Jehová yakʼojbey bendición te sna te Obed-Edom sok spisil te bintik ay yuʼun, melel tey ay-a te skaxaul chapbilkʼop yuʼun te smelelil Diose».* Jich yuʼun, te David tseʼelnax yoʼtan bajt yichʼ tal te skaxaul chapbilkʼop yuʼun te smelelil Dios te ay ta sna te Obed-Edom swenta ya yichʼ moel ta Mukʼul lum yuʼun David.
13 Te k’alal beenik wakeb paso te machʼatik skʼechojik te skaxaul chapbilkʼop yuʼun te Jehová, la smil jkojt toro sok jkojt jujpʼen chambalam.
14 Te David sututet ta ajkʼot sok spisil yip ta stojol te Jehová sok slapoj jlijkʼ efod* te pasbil ta lino.
15 Te David sok spisil te lum Israel tseʼelnax yoʼtanik yakik ta aw te bitʼil la yichʼik moel te skaxaul chapbilkʼop yuʼun te Jehová sok yakik ta yokʼesinel xulubil.
16 Pero, te kʼalal och bael te skaxaul chapbilkʼop yuʼun te Jehová ta Mukʼul lum yuʼun David, te Mical, te yantsil nichʼan te Saúl, la yil koel ta ventana te sututet ta ajkʼot sok ta wilawetel te ajwalil David ta stojol te Jehová, jajch spʼaj ta yoʼtan.
17 Jich la yotsesik te skaxaul chapbilkʼop yuʼun te Jehová ta nailpakʼ te schajpanojix-a te David sok tey la yakʼik jilel-a. Jich yuʼun, te David la yakʼ ta stojol te Jehová chikʼbil majtaniletik sok milbil majtaniletik ta swenta lamalkʼinal.
18 Te kʼalal laj yoʼtan te David ta yakʼel te chikʼbil majtaniletik sok te milbil majtaniletik ta swenta lamalkʼinal, la yakʼbey bendición te lum Israel ta sbiil te Jehová te jwolwanej yuʼun te soldadoetike.*
19 Jaʼnix jich la yakʼbey jpejch rosca-pan, jpejch tenbil sit palmera sok jpejch tenbil takin tsʼusub spisil te lum Israel, spisil te ants winiketik sok la yakʼbey ta jujuntul te winiketik sok te antsetik, tey-abi ta jujuntul sujtik bael ta snaik.
20 Te k’alal sujt bael te David ta yakʼbeyel bendición te machʼatik ay yuʼune, te Mical, te yantsil nichʼan te Saúl, lokʼ ta stael te David sok jich la yalbey: «¡Bayal la sbolobtes skʼoplal te ajwalil yuʼun Israel te naxe! ¡La yakʼ ta ilel sbakʼetal ta stojol te j-abat antsetik yuʼun jich te bin-utʼil te machʼa ma snaʼ kʼinal te ya stʼanan sba ta komon sitil!».
21 Jich yuʼun, te David jich la yalbey te Mical: «Jaʼ ta stojol te Jehová te kʼin la jpase, melel joʼon la stsaon ma jaʼuk te atat sok te machʼatik ay yuʼune, jaʼ la yakʼon ta jwolwanej yuʼun te lum Israel, jaʼ te lum yuʼun te Jehová. Jaʼ yuʼun ya jpas kʼin ta stojol te Jehová
22 sok yame jpejkʼanxan jba kʼaxtoxan-a te bitʼil la jpasixe, aytoxan bin ya jpas yuʼun ya kakʼ ta ilel te maʼyuk jkʼoplale. Yan stukel te j-abat antsetik te la awalbey skʼoplale yame stoybonik jkʼoplal».
23 Te Mical, te yantsil nichʼan te Saúl, maba alaj jaʼto te kʼalal laje.
Notaetik
^ Jaʼ skʼoplal te chʼul-abatetik ta chʼulchan.
^ O jaʼniwan ya skʼan ya yal «yolil».
^ O «ma lek la yaʼiy sba».
^ Te ya skʼan ya yal «la skontrain te Uzá».
^ Jaʼ skʼoplal te chʼul-abatetik ta chʼulchan.
