2 Samuel 7:1-29
7 Te kʼalal ayix ta nainel ta sna-a te ajwalil David sok te akʼbotix skux yoʼtan yuʼun te Jehová ta swenta te skontratak te ay ta sjoyobale,
2 te ajwalil jich la yalbey te j-alwanej Natán: «Te joʼone liʼ ayon ta nainel ta jun na te pasbil ta cedro-teʼ, yan stukel te skaxaul chapbilkʼop yuʼun te smelelil Dios* ay ta jun nailpakʼ».
3 Te Natán jich la yalbey te ajwalil: «Baan, pasa te bin ya skʼan awoʼtane, melel sjokinojat te Jehovae».
4 Ta ajkʼabalnix-abi, te Natán jich albot yuʼun te Jehová:
5 «Baan, albeya jich ini te David te j-abat kuʼun: ‹Jich ya yal te Jehová: «¿Jaʼatbal te machʼa snujpʼ ya spasbon jun na yuʼun ya xnainon tey-a?
6 Te kʼalal la jlokʼes tal ta Egipto te lum Israel jaʼto ta ora ini, maʼyuk nainemon ta jun na, jaʼnax nainemon ta nailpakʼ templo ta bayuknax.
7 Te jayeb tiempo la jokin te israeletik, ¿aybal bin-ora jich la kal?: ‹¿Bin yuʼun te maba apasojbonik jun na ta cedro-teʼ?›. ¿Aybal bin-ora jich la kalbey jtuluk te jwolwanej yuʼun te stsʼumbal Israel te jaʼik te machʼatik la kakʼbey skanantay te lum Israel kuʼune?»›.
8 Jichme xa awalbey te David te j-abat kuʼune: ‹Jich ya yal te Jehová te jwolwanej yuʼun te soldadoetik:* «Joʼon la jlokʼesat tal ta akiltik te banti ya akanantay-a te tuminchijetik swenta ya x-ochat ta jwolwanej yuʼun te lum Israel kuʼun.
9 Yame jokinat chikan banti ya xbaat. Yame awil te ya jlajin spisil te akontratake. Ya kakʼ te kʼax mukʼ akʼoplal ya xkʼoat jich bitʼil te winiketik te mukʼ skʼoplalik ta balumilal.
10 Ya kakʼbey jun lugar te lum Israel kuʼun. Tey ya kakʼ xnainik-a sok maʼyuk bin-ora ay machʼa ya x-utsʼinotik* yuʼun. Maba ya x-utsʼinotikxan yuʼun te machʼatik chopolik* jich bitʼil te nameye,
11 jaʼto tal te bin-ora la kakʼ juecetik ta lum Israel kuʼun. Ya kakʼbat akux awoʼtan ta stojol spisil te akontratake.
»›»Jaʼnix jich yalojbat te Jehová te ya x-och ta ajwalil te atsʼumbal, jichnix te bitʼil yaloj te Jehová.
12 Te kʼalal ya xkʼot yorail te ya xlajate sok te ya akux awoʼtan sok te antiguo ameʼ atate, joʼon ya kakʼ ta ajwalil jtul atsʼumbal, jaʼ te anichʼane, ya kakʼbey yichʼ yip te wentainel yuʼune.
13 Jaʼme te machʼa ya spasbon jun na ta swenta te jbiile, joʼon ya kakʼbey yichʼ yip te wentainel yuʼun ta sbajtelkʼinal.
14 Joʼon staton ya xkʼoon sok jaʼ jnichʼan ya xkʼot. Te kʼalal ay bin chopol* ya spas, yame jtojobtes* sok yame kakʼbey castigo jich te bin-utʼil ya spas te winiketike.
15 Te Saúl maba la kakʼbey yil te kʼuxul oʼtanil te ma x-ijkitaywan te kʼalal la jlokʼes ta yaʼtele. Yan stukel te anichʼane yame kakʼbey yil te kʼuxul oʼtanil te ma x-ijkitaywane.
16 Ta sbajtelkʼinal ya stsak yip te ana* sok te wentainel awuʼune; te wentainel awuʼune maʼyuk bin-ora ya xlaj skʼoplal»›».
17 Te Natán la yalbey te David spisil te bin albot yaʼiy sok spisil te bin akʼbot yile.
18 Tey-abi, te ajwalil David bajt sok la snajkan sba ta stojol te Jehová sok jich la yal: «Kajwal Jehová, Mukʼul Ajwalil, ¿mukʼbal jkʼoplal ta atojol? ¿Mukʼbal skʼoplal te jfamilia te bitʼil la awikʼon tal liʼi?
19 Ma jaʼuknax awakʼojbon-abi Kajwal Jehová, Mukʼul Ajwalil, jaʼnix jich ya awalbey skʼoplal te bin ya xkʼot ta pasel ta patil ta stojol te stsʼumbal te j-abat awuʼun ini; Kajwal Jehová, Mukʼul Ajwalil, jaʼ mantalil ta stojol spisil te ants winiketik te bin la awale.
20 Kajwal Jehová, Mukʼul Ajwalil, ¿binxan ya xjuʼ ya kalbat joʼon te j-abaton awuʼun? Melel ya anaʼbon jba ta lek.
21 Ta swenta te bin la awal sok te jich skʼanojel awoʼtane bayal bintik mukʼ skʼoplal apasoj sok la awakʼbey snaʼ te j-abat awuʼun ini.
22 Jaʼ yuʼun, kʼax mukʼ akʼoplal Kajwal Jehová, Mukʼul Ajwalil. Maʼyuk machʼa ya spajat sok maʼyuk yan Dios jich bitʼil te jaʼate; jaʼ jich ya yakʼ ta naʼel spisil te bin kaʼiyojtik stojole.
23 ¿Aybal yan nación ta swolol balumilal jich bitʼil te lum Israel awuʼune? Dios kuʼun, jaʼat la alokʼeslan tal swenta jaʼ lum ya xkʼot awuʼun; la awakʼ ta naʼel te abiil ta swenta te bintik mukʼ skʼoplal la apas sok te bintik yan-nax ta ilel la apas ta stojolike. Ta swenta te lum awuʼun te la alokʼes tal ta Egipto swenta awuʼun ya xkʼot, la atentiklan lokʼel te nacionetik sok te diosetik yuʼunike.
24 Ta sbajtelkʼinal la awakʼ te jaʼ awuʼun ya xkʼot te lum Israel. Jich yuʼun, Kajwal Jehová, jaʼ Dios kʼoat yuʼunik.
25 »Jaʼ yuʼun, Jehová Dios, sbajtelkʼinal akʼa jiluk te bin la awalbey ta jamal te j-abat awuʼun ini soknix te stsʼumbale; kʼotesa ta pasel te bin la awal ta jamale.
26 Mukʼukme skʼoplal ta sbajtelkʼinal te abiil swenta jich ya yalik te ants winiketik: ‹Te Jehová te jwolwanej yuʼun te soldadoetik* jaʼ Dios yuʼun te lum Israel›. Jich yuʼun, akʼa jalajuk ta atojol te stsʼumbal te j-abat awuʼun ini.
27 Melel jaʼat Jehová te jwolwanej yuʼun te soldadoetik,* te Dios yuʼun Israel, ay bin la awakʼbey snaʼ te j-abat awuʼun te kʼalal jich la awalbey: ‹Ya kakʼ te jaʼ ya x-och ta ajwalil te atsʼumbale›. Jaʼ yuʼun, jun yoʼtan ya skʼoponat te j-abat awuʼun ini.
28 Kajwal Jehová, Mukʼul Ajwalil, jaʼat te smelelil Diosat* sok smelelil te akʼope. Jaʼat la awalbey ta jamal te bintik lek ya awakʼbey te j-abat awuʼun ini.
29 Jaʼ yuʼun, awokoluk akʼbeya bendición te stsʼumbal te j-abat awuʼun ini sok akʼa jalajuk ta atojol ta sbajtelkʼinal. Melel jaʼat la awal ta jamal Kajwal Jehová, Mukʼul Ajwalil. Te bendición te la awakʼbone sbajteluk kʼinal ay ta stojol te stsʼumbal ajwaliletik yuʼun te jfamiliae».
Notaetik
^ Jaʼ skʼoplal te chʼul-abatetik ta chʼulchan.
^ Ta yantik variante «x-ilbajinotik».
^ Ta yantik variante «ma lekuk stalelik».
^ Ta yantik variante «ma lek».
^ Ta hebreo: «yame jtojobtes sok te xul o wajchʼ yuʼun te winiketike».
^ Jaʼ ya yalbey skʼoplal te stsʼumbal ajwaliletik.
^ Jaʼ skʼoplal te chʼul-abatetik ta chʼulchan.
^ Jaʼ skʼoplal te chʼul-abatetik ta chʼulchan.
