2 Samuel 8:1-18
8 Ta patil, te David la stsal ta jkʼaxel te filisteoetik sok la spojbey ta skʼab te filisteoetik te skʼinal Meteg-Amá.
2 Jaʼnix jich la stsal te moabitaetik, la yakʼ te ya smejtsʼan sbaik ta lum sok la spʼistiklan ta jlijkʼ chʼajan: te machʼatik ochik te banti chaʼmajk’ chʼajan la yichʼ pʼisele la yichʼik milel, yan te machʼatik ochik te banti jmajkʼnax la yichʼ pʼisel ta chʼajane kuxul jil stukelik. Jaʼ j-abatetik yuʼun David kʼot te moabitaetik sok la stoj spatanik.
3 Te David la stsal te Hadadézer snichʼan Rehob te ajwalil yuʼun Zobá te k’alal yak ta lokʼel bael-a yuʼun ya skʼan sujtel tal te banti swentainoj-a, jaʼ te mukʼul jaʼ Éufrates.
4 Te David la stsak bael 1,700 ta tul winiketik te kajajtik ta scaballoik sok 20 mil ta tul te yakik ta beele. Jaʼnix jich koxo la yijkitay te caballoetik te snitojik te carretaetik, jaʼnax 100 ta kojt te ma jichuk la spastiklanbeye.
5 Te kʼalal talik te sirioetik te ayik ta Damasco ta skoltayel te Hadadézer te ajwalil yuʼun Zobá, te David la smiltiklan 22 mil ta tul sirioetik.
6 Jich yuʼun, te David la yakʼ soldadoetik ta Siria te wentainbil yuʼun te Damasco, jaʼ j-abatetik yuʼun David kʼot te sirioetik sok la stoj spatanik. Te Jehová la skoltay te David yuʼun la yaʼiy tsalaw chikan te banti bajte.
7 Te David jaʼnix jich la spojbey te j-abatetik yuʼun te Hadadézer te sepsepmajkilaletik te pastiklanbil ta oro, sok la yichʼtiklan bael ta Jerusalén.
8 Te ajwalil David la yichʼ bael bayal cobre te ay ta Bétah sok ta Berotái, jaʼ mukʼul lumetik te swentainoj te Hadadézer.
9 Tey-abi, te Toi te ajwalil yuʼun Hamat la yaʼiy stojol te la stsal spisil te soldadoetik yuʼun te Hadadézer te David.
10 Jaʼ yuʼun, te Toi la stikun bael ta stojol te ajwalil David te snichʼan te Joram sbiil swenta ya sjojkʼoybey teme lek ay sok ta yutsilkʼoptayel te bitʼil la yakʼbey guerra te Hadadézer sok te la stsale (melel te Toi bayal buelta akʼbot guerra yuʼun te Hadadézer). Te Joram la yichʼbey bael te David te bintik pastiklanbil ta plata, ta oro sok ta cobre.
11 Jich yuʼun, te ajwalil David la schʼultes te biluketik ta swenta Jehová, jich te bitʼil la schʼultes te plata sok te oro te la spojbey tal te yantik lumetik te och ta skʼabe:
12 jaʼ te bintik la yichʼ tal ta Siria, ta Moab, te bintik la spojbey tal te ammonitaetik, te filisteoetik sok te amalequitaetik soknix te biluketik te la spojbeyik tal te Hadadézer snichʼan Rehob te ajwalil yuʼun Zobá.
13 Jaʼnix jich, te David kʼax mukʼ skʼoplal kʼot te sbiil te kʼalal la smil 18 mil ta tul edomitaetik ta spamlej te Atsʼam sbiile.
14 Te David la yakʼ soldadoetik ta Edom. Ta spamal Edom la yakʼ soldadoetik, jich ochik ta j-abatetik yuʼun David spisil te edomitaetik. Te Jehová la skoltay te David yuʼun la yaʼiy tsalaw chikan te banti bajte.
15 Te David jich la swentain spisil te lum Israel sok toj te bitʼil la schajpan spisil te lume.
16 Te Joab te yal Zeruyá jaʼ swentainoj-a te soldadoetik. Te Jehosafat snichʼan Ahilud jaʼ te machʼa ya stsʼibay te bin ya xkʼot ta pasel.
17 Te Sadoc snichʼan Ahitub sok te Ahimélec snichʼan Abiatar jaʼ sacerdoteetik. Te Seraya jaʼ secretario-a.
18 Te Benaya snichʼan Jehoiadá jaʼ swentainoj-a te keretitaetik sok te peletitaetik. Te snichʼnab te David la yichʼ mukʼ yaʼtelik.*
Notaetik
^ Ta hebreo: «sacerdoteetik».
