2 Samuel 9:1-13
-
Te David la yakʼbey yil te Mefibóset te kʼuxul oʼtanil te ma x-ijkitaywan (1-13)
9 Te David jich la yal: «¿Aytobal machʼa kuxul ta sna te Saúl yuʼun ya kakʼbey yil te kʼuxul oʼtanil te ma x-ijkitaywan ta skaj te Jonatán?».
2 Ay jtul j-abat ta sna te Saúl te Zibá sbiil, la stikunik ta ikʼel. Jich jojkʼoybot yuʼun te ajwalil David: «¿Jaʼatbal te Zibá?». Jich la sjakʼ: «Joʼon te j-abaton awuʼune».
3 Jich la yalxan te ajwalil: «¿Aytobal machʼa kuxul ta sna te Saúl yuʼun ya kakʼbey yil te kʼuxul oʼtanil te ma x-ijkitaywan te talem ta stojol Dios?». Te Zibá jich la yalbey te ajwalil: «Ayto jilem jtul snichʼan te Jonatán, jaʼ koxo, ma xtuun schebal te yoke».
4 Jich jojkʼoybot yuʼun te ajwalil: «¿Banti ay?». Jich la sjakʼ te Zibá: «Ay ta sna Makir, snichʼan Amiel te ay ta Lo-Debar».
5 Jaʼ yuʼun, te ajwalil David ta oranax la stikun tal ta ikʼel ta sna Makir, snichʼan Amiel te ay ta Lo-Debar.
6 Te kʼalal jul te Mefibóset —te snichʼan Jonatán, snichʼan Saúl—, och bael te banti ay te David. Jich la spajkan sba kʼalal ta lum ta oranax sok la snijan sba ta stojol. Jich albot yuʼun te David: «¡Mefibóset!». Jich la sjakʼ te Mefibóset: «Liʼme ay te j-abat awuʼune».
7 Jich albot yuʼun te David: «Mame xiwat, melel yame kakʼbat awil te kʼuxul oʼtanil te ma x-ijkitaywan ta skaj te atat te Jonatane. Yame jsujtesbat spisil te skʼinal te Saúl te amamuch* sok spisilme-ora ya xweʼat ta jmesa».
8 Jaʼ yuʼun, te Mefibóset la schaʼnijan sba ta stojol te David sok jich la yalbey: «¿Machʼa-a te j-abat awuʼun ini te ya awichʼ ta wenta, melel jaʼ jichon te bin-utʼil chamen tsʼiʼ?».
9 Tey-abi, te ajwalil la stikun ta ikʼel te Zibá, te j-abat yuʼun te Saúl, sok jich la yalbey: «Spisil te bintik ay yuʼun te Saúl sok spisil te machʼatik ay yuʼun ta sna jaʼ ya kakʼbey ta skʼab te smam* te awajwale.
10 Jaʼ yuʼun, te jaʼat sok te anichʼnab soknix te j-abatetik awuʼun jaʼexme ya awaʼiyik tsʼunbajel sok ya atsobeyik tal sit te awal tsʼunubil yuʼun jich ay sweʼelik te machʼatik swentainoj te smam* te awajwal. Yan stukel te Mefibóset te smam te awajwale spisilme-ora ya xweʼ ta jmesa».
Te Zibá ay 15 ta tul snichʼnab sok ay 20 ta tul j-abatetik yuʼun.
11 Tey-abi, te Zibá jich la yalbey te ajwalil: «Yame spas spisil te bin la awalbey ta mantal te j-abat awuʼun ini, ajwalil kuʼun». Jaʼto tal-abi, te Mefibóset spisil-ora weʼ ta smesa te David* jich te bitʼil jtul snichʼan te ajwalil.
12 Te Mefibóset jaʼnix jich ay jtul schʼin kerem te Micá sbiil. Spisil te machʼatik ay ta sna te Zibá jaʼ j-abatetik kʼot yuʼun te Mefibóset.
13 Te Mefibóset nain ta Jerusalén, melel spisil-ora weʼ ta smesa te ajwalil. Te Mefibóset jaʼ koxo, ma xtuun schebal te yoke.
Notaetik
^ Ta yantik variante «amukʼul tat», «amam».
^ Ta yantik variante «yil-al kerem».
^ Ta yantik variante «yil-al kerem».
^ O jaʼniwan ya skʼan ya yal «ta jmesa».
