Schebal carta ta stojol te Timoteo 2:1-26
-
Akʼbeya ta stojol winiketik te pʼijubenik ta lek te bin la awaʼiy stojole (1-7)
-
Ya skʼan ya xkujch kuʼuntik te wokoliletik ta swenta te lek yachʼil kʼop (8-13)
-
Naʼame stuuntesel ta lek te skʼop Diose (14-19)
-
«Anan lokʼel ta stojol te bin ya skʼan te sbakʼetal te jchʼieletike» (20-22)
-
Te bin-utʼil ya skʼan ya kiltik te jkontrataktik (23-26)
2 Jich yuʼun, jnichʼan, mame xa akom aba ta yakʼbeyel yip awoʼtan ta swenta te slekil yoʼtan Dios te ma snujpʼuk ya kichʼtik te ay ta stojol te Cristo Jesús.
2 Akʼbeya ta stojol te winiketik te jun yoʼtanik te bin la awaʼiy ta jtojol sok te bayal testigoetik la yalbeyik skʼoplal-euke, jichme pʼijubenik ta lek ta snojptesel-a te yantik.
3 Jich bin-utʼil lekil soldado yuʼun Cristo Jesús, kujchukme awuʼun te wokoliletik te ya xkʼax ta atojole.
4 Maʼyuk jtuluk soldado te ya schʼik sba* ta manbajel o ta chonbajel* teme ya skʼan te lek ya x-ilot yuʼun te machʼa wentainbil yuʼune.
5 Jaʼnix jich ta swenta te machʼa ya yaʼiy tajimale, maba ya yichʼ akʼbeyel scorona teme ma jichuk ya xtajin te bin-utʼil ay te mantaliletik yuʼun te tajimale.
6 Te machʼa tulan ya x-aʼtej ta tsʼunbajel jaʼ nail ya sweʼbey sit te awal tsʼunubil yuʼune.
7 Spisilukme-ora xa anaʼulan ta awoʼtan te bin yak kalbelate; jaʼme ya yakʼbat anaʼbey swentail spisil te Kajwaltike.
8 Julukme ta awoʼtan te la yichʼ chaʼkuxajtesel te Jesucristo ta yolil te machʼatik lajemike sok te talem ta stsʼumbal David, jich te bin-utʼil ya yal te lek yachʼil kʼop te ya jcholbey skʼoplale,
9 te jaʼ ta swenta te yak ta kʼaxel jwokol sok te chukulon jich te bin-utʼil machʼa ay bin chopol* spasoj. Pero, te skʼop Diose maba chukul ta cadena stukel.
10 Jaʼ swentail te kujchem kuʼun spisil ta swenta te machʼatik tsabilik, yuʼun jich ya staik-euk te skolelik ta swenta te Cristo Jesús sok te yutsilalik ta sbajtelkʼinal.
11 Ya xjuʼ ya schʼuun koʼtantik te bin ya yichʼ alel ini: teme pajal ya xlajotik soke, jaʼnix jich pajal ya xkuxinotik sok;
12 teme ya xkujch kuʼuntik te jwokoltike, jaʼnix jich pajalme ya xwentainwanotik sok; teme ya jmuk ta koʼtantike, jaʼnix jich ya smukotik ta yoʼtan-euk;
13 teme ma junuk koʼtantik, jun-nanix yoʼtan stukel-a, melel ma xjuʼ ya smuk sba ta yoʼtan stukel.
14 Mame xkomat ta yaltiklanbeyel yaʼiyik ini sok altiklanbeya mantal ta stojol Dios te manchuk ya stsak sbaik ta swentanax kʼop aʼiyejetik te jkʼaxel maʼyuk swentaile, melel ya x-utsʼinbot yoʼtanik te machʼatik ya yaʼiyik stojole.
15 Pasa tulan te bantito kʼalal ya xjuʼ awuʼun swenta lek ya yilat te Diose, jich te bin-utʼil jtul j-aʼtel winik te maʼyuk bin ya xkʼexaw yuʼune, te ya snaʼ stuuntesel ta lek te skʼop Diose.*
16 Pero pʼaja te kʼopetik te ma xtuun te ya sbolobtesbey skʼoplal te bin chʼultesbile, melel ya yakʼ te kʼunkʼun ya yijkitayik ta yichʼel ta mukʼ te Diose,
17 te bintik ya yalike ya xpujk bael jich bin-utʼil kʼaʼel chamel te ya xmilawane. Jaʼ jich yakikix ta spasel te Himeneo sok te Fileto.
18 Te winiketik ini la yijkitayikix te smelelil kʼope, melel yakik ta yalel te kʼoemix ta pasel te chaʼkuxajele, te jich yakik ta slajinbeyel schʼuunel yoʼtanik te yantike.
19 Manchukme jich-abi, te bin yakʼojbey yiptajib te Diose ma xjuʼ ta jinel sok yichʼoj te sello ini: «Te Jehová* ya snaʼbey sba te machʼatik yuʼune», sok «Spisil te machʼa ya skʼanbey koltayel ta sbiil te Jehová* akʼa yijkitay te bin ma stojiluk ta pasele».
20 Ta jun mukʼul na ma jaʼuknax ay vasijaetik te pasbil ta oro sok ta plata, jaʼnix jich ay pasbil ta teʼ sok ta ajchʼal. Ay vasijaetik te ya xtuun sok ay vasijaetik te ma xtuune.
21 Jich yuʼun, te machʼatik namal* ya yakʼ sbaik ta stojol te vasijaetik te ma xtuune jich ya xkʼot te bin-utʼil aʼtejibal te ya xtuune, jun aʼtejibal te chʼultesbil, te ya xtuun yuʼun te yajwal sok chapal yuʼun ya spas spisil ta chajp lekil aʼteliletik.
22 Jaʼ yuʼun anan lokʼel ta stojol te bin ya skʼan te sbakʼetal te jchʼieletike, jaʼ xa ale te bin stojil ta pasel, te chʼuunel oʼtanil, te kʼuxul oʼtanil sok te lamalkʼinal soknix jaʼme xa ajokin te machʼatik ya skʼanbeyik koltayel te Kajwaltik te ma chopoluk* yoʼtanike.
23 Jaʼnix jich pʼajame te tsaktamba kʼop te ma xtuun sok te maʼyuk swentaile, melel anaʼoj te jaʼnax ya sjach kʼope.
24 Te j-abat yuʼun te Kajwaltik maba ya skʼan te ya sjach kʼop, ya skʼan te lekuk yoʼtan ta stojol spisil te yantike, te pʼijuben ta nojpteswanej, te ya snaʼ skomel sba te kʼalal ya yichʼ utsʼinel
25 sok te manso yoʼtan te kʼalal ya snojptes te machʼatik ma lek te stalelike. Melel yaniwan sujtesbotik yoʼtanik yuʼun Dios te yakuk xkʼot ta yoʼtanik ta lek te smelelil kʼope,
26 jich ya snaʼik kʼinal-a sok jichme ya xkolik lokʼel ta pejtsʼ yuʼun te Pukuje,* melel kuxulikto la yichʼik tsakel yuʼun swenta ya spasbeyik te skʼanojel yoʼtane.
Notaetik
^ Ta griego: «ya schuk sba».
^ O jaʼniwan ya skʼan ya yal «te bintik ya spas ta jujun kʼajkʼal».
^ O «ma lek».
^ Ta griego: «te smelelil kʼope».
^ O «jakal».
^ O «ma lekuk».
^ O «Diabloe».
