Schebal carta ta stojol te Timoteo 3:1-17
3 Sok yame skʼan ya anaʼ ini, te kʼalal nopolix-a* te slajibal kʼajkʼale, yame xtal te bintik chujkultik sba sok te tulan ta sitintayele.
2 Melel te ants winiketik jaʼnax kʼux ya yaʼiy sbaik ta stukelik; ya xbikʼtaj yoʼtanik yuʼun takʼin, ya stoy sbaik, mukʼ skʼoplal ya skuy sbaik, jbolkʼoptaywanejetik, ya skʼaxuntaybeyik smantal smeʼ statik, ma snaʼik yalel wokol sok ma junuk yoʼtanik,
3 maʼyuk skʼuxul yoʼtanik, maʼyuk acuerdo ta yoʼtanik, ya xleawanik ta kʼop, ma snaʼik skomel sbaik, kʼaxto ya x-utsʼinwanik, maʼyuk skʼoplal ta yoʼtanik te bin leke,
4 ya x-akʼawanik ta kʼabal, sok maʼyuk razón ta yoʼtanik, nojel ta toybail te yoʼtanike, jaʼ kʼux ta yoʼtanik te bintik mulantik sba ta balumilal ma jaʼuk kʼux ta yoʼtanik te Diose,
5 jich yilel te ya yichʼik ta mukʼ te Diose, pero ma jichuk yakik ta spasel. Mame xa ajokin te machʼatik jich stalelike.
6 Ta yolil-abi ya xlokʼ tal winiketik te ya x-ochik ta naetik sok schopolil yoʼtanik sok ya sloʼlayik te antsetik te maʼyuk yip yoʼtanik ta skaj te bayal smulik sok te oranax ya schʼuunik spasel te bin ya skʼan te bakʼetalile,
7 te spisil-ora yakik ta snopel te skʼop Diose, pero maʼyuk bin-ora ya xkʼot ta yoʼtanik ta lek te smelelil kʼope.
8 Jich bitʼil te Janes sok te Jambres te la skontrainik te Moisés, jaʼnix jich yakik ta skontrainel te smelelil kʼope. Jaʼik winiketik te kʼax bolobenix te snopojibal yuʼunike, maba lek ilbilikix yuʼun Dios ta skaj te maʼyukix schʼuunel yoʼtanik.
9 Pero ma xbajt mukʼubuk te yaʼtelike, melel spisil te yantik ya xbajt staik ta ilel te ma snaʼik kʼinale jich te bitʼil kʼot ta stojolik te chaʼtul winiketik-abi.
10 Pero, te jaʼate atʼunoj ta lek te nojptesel kuʼune, te bin-utʼil ay te kaʼtel, te bin jnopoj spasel ta jkuxlejal, te schʼuunel koʼtan, te slamalil koʼtan, te skʼuxul koʼtan sok te kujchem kuʼune,
11 sok anaʼoj te kontrainel sok te wokoliletik kʼax ta jtojole, jich bitʼil kʼax ta jtojol ta Antioquía, Iconio sok ta Listra. Kujch kuʼun spisil te kontrainel-abi, sok jaʼ la skoltayon ta spisil te Kajwaltike.
12 Ta melel, spisil te machʼatik ya skʼan ya yichʼik ta mukʼ Dios sok spisil yoʼtanik ta skuxlejalik te jun ayik sok te Cristo Jesús jaʼnix jich yame yichʼik kontrainel-euk.
13 Pero, te machʼatik chopolik* sok te jloʼlaywanejetik bejbe* yak ta toyel te sbolilike, ya xloʼlaywanik sok ya yichʼik loʼlayel-euk.
14 Yan te jaʼate ayukme ta awoʼtan te bin la anope sok te kʼot ta awoʼtan te jich la achʼuune, melel anaʼoj te machʼatik la yakʼbat anope
15 sok anaʼoj te bin ya yal te chʼul junetik ta awalalilto, te ya xjuʼ ya yakʼbat spʼijil awoʼtan yuʼun ya ata akolel ta swenta te schʼuunel awoʼtan ta stojol te Cristo Jesús.
16 Spisil te bin tsʼibaybil ta sJun Dios lokʼem tal ta yoʼtan te Diose, ya xtuun kuʼuntik ta swenta nojpteswanej, ta swenta komel, ta swenta te bintik ya skʼan tojobtesel sok ta yakʼel ta nopel te bin stojil ya yil te Diose,
17 yuʼun jich kʼax pʼijuben ya xkʼot te j-abat yuʼun Dios sok jich kʼax chapal ya xkʼot ta spasel spisil ta chajp lekil aʼteliletik.
