Carta ta stojol te Filemón 1:1-25
1 Joʼon Pabloon, te chukulon ta swenta te Cristo Jesús. Joʼon sok te kermanotik Timoteo ya jtikunbatkotik te carta ini, jaʼat kermanotik Filemón te kʼuxat ta koʼtantik sok te joy jbatik ta aʼtele,
2 jaʼnix jich ta stojol te kermanatik Apfia sok te kermanotik Arquipo te joy jbakotik ta aʼtel jich bin-utʼil soldado soknix ta stojol te kermanotaktik te ya stsob sbaik ta ana:
3 Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.
4 Spisil-ora ya kal wokol ta stojol te Dios kuʼun te kʼalal ya kalbat akʼoplal ta oracione,
5 melel kaʼiyoj te ay schʼuunel awoʼtan sok te kʼux ta awoʼtan te Kajwaltik Jesús sok spisil te machʼatik chʼultesbilike.
6 Ya jkʼopon Dios ta swenta te schʼuunel awoʼtan te pajal awakʼoj ta ilel sok te yantik, te jaʼuk ya yakʼbat awil te bintik lek ay kuʼuntik ta swenta te Cristo.
7 Kermano, la yakʼbon stseʼelil koʼtan sok bayal smukʼul koʼtan te kʼalal la kaʼiy te awakʼoj ta ilel skʼuxul awoʼtan, melel jaʼme ta atojol te la sta yip yoʼtan te machʼatik chʼultesbilike.
8 Jaʼ yuʼun, manchukme kichʼoj kaʼtel ta swenta te Cristo maba ya jpasat ta mantal yuʼun ya apas te bin stojil ta pasele,
9 jaʼ ya jkʼanbat wokol ta swenta skʼuxul awoʼtan, melel joʼon Pabloon te ayix kaʼbilal sok ta ora ini chukulon ta swenta te Cristo Jesús.
10 Ya jkʼanbat wokol ta stojol te jnichʼan Onésimo te jich kʼoon te bin-utʼil stat te liʼ ayon ta chukele.*
11 Ta nail ma xtuun awuʼun-a, pero ta ora ini ya xtuun kuʼuntik ta jchebaltik.
12 Ya jtikunbat sujtel ta atojol te machʼa mero kʼux ta koʼtane.
13 Koʼtanuk te yakuk sjokinon jilel yuʼun jaʼ ya spas te aʼtelil te ay ta awenta spasele sok te yakuk x-abatin ta jtojol te bitʼil chukulon ta swenta te lek yachʼil kʼope.
14 Pero, maʼyuk bin ya jkʼan ya jpas teme ma jichuk awoʼtane, yuʼun jich ma sujbil ya awaʼiy aba ta spasel te lekil aʼtelil ini, jaʼ lek te jaʼuknix ya xlokʼ ta awoʼtan spasele.
15 Jaʼniwan swentail te la yijkitayat jun tiempo, yuʼun jich ya sjokinatix spisil-ora-a,
16 pero ma jichukix bitʼil jtul moso, jich ya sujtix ta atojol te bitʼil jtul kermanotik te kʼux ta koʼtantike. Te joʼone mero kʼux ta koʼtan, pero kʼaxemtoxan kʼux ta awoʼtan te jaʼate, melel jun-nax ya xkʼoex ta yan buelta sok jun-nax ya xkʼoex ta stojol te Kajwaltike.
17 Jaʼ yuʼun, teme yuʼun-nix awamigoon-ae, ikʼa ta atojol sok slekil awoʼtan te kʼalal ya xkʼot ta atojole, jich te bin-utʼil ya awikʼon te joʼone.
18 Teme ay bin ma lek la spasbat o teme ay sbet awuʼun, joʼonme ya jtojbat.
19 Joʼon Pabloon, joʼon-nix ya jtsʼibaybat te carta ini: joʼonme ya jtojbat (mame jaʼuk ya kalbat te ay abet kuʼun-euke, jaʼ te akuxlejale).
20 Jich, kermano, awokoluk pasa ta swenta te Kajwaltik, akʼbon yip koʼtan ta swenta te Cristo.
21 Jnaʼoj ta lek te ya apas te bin ya kalbate, jaʼ yuʼun ya jtsʼibaybat ini, melel ya jnaʼ te kʼaxtoxan jich ya apas-a te bitʼil ya jkʼanbate.
22 Jaʼnix jich chajpanbon junuk lugar te banti ya xjuʼ ya xjilone, melel yame xkʼot kilex te kʼalal ya kichʼ akʼel ta libre ta swenta te oración awuʼunike.
23 Te Epafras te joy ta chukel ta swenta te Cristo Jesús ya stikunbat spatjibal awoʼtan.
24 Jaʼnix jich ya stikunbat spatjibal awoʼtan te Marcos, te Aristarco, te Demas sok te Lucas te joʼtak ta aʼtele.
25 Ayukme ta atojolik te slekil yoʼtan te Kajwaltik Jesucristo te ma snujpʼuk ya kichʼtik ta swenta te slekil awoʼtan ya awakʼik ta ilele.
Notaetik
^ Ta griego: «chukulon ta cadena».
