Carta ta stojol te Galataetik 1:1-24
1 Joʼon Pabloon, maba talem ta stojol ants winiketik ni jaʼuk talem ta stojol jtul winik te bin-utʼil jpuk-kʼopone, jaʼ ta swenta te Jesucristo sok te jTatik Dios te la schaʼkuxajtes tal te Jesucristo ta yolil te machʼatik lajemike,
2 joʼon sok spisil te hermanoetik te sjokinojone ya jtikunbeyexkotik te carta ini, jaʼex te ayex ta congregacionetik te ayik ta skʼinal Galacia:
3 Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.
4 Jaʼ la yakʼ sba ta lajel ta swenta te jmultik yuʼun jich ya skoltayotik lokʼel ta chopol balumilal ini te jich skʼanojel yoʼtan te jTatik Dios
5 te jaʼ ya yichʼ albeyel yutsil skʼoplal ta sbajtelkʼinal. Jichuk.
6 Chajpnax ya kil-a te oranax yakex ta namajel* ta stojol te machʼa la yikʼex ta swenta slekil yoʼtan te Cristo te ma snujpʼuk ya kichʼtik sok te yakex ta stʼunel yan lek yachʼil kʼop.
7 Ma yuʼunuk ay yantik lek yachʼil kʼop, jaʼnax te ay machʼatik ya skʼan ya schebajtesbeyex awoʼtanik sok te ya skʼan ya syanijtesik te lek yachʼil kʼop yuʼun te Cristoe.
8 Pero, teme ay machʼa ya scholbeyex awaʼiyik yan lek yachʼil kʼop, chikan teme joʼotik o jtul chʼul-abat ta chʼulchan te ma jichuk te bin-utʼil kalojbeyexkotike, akʼa yichʼ lajinel.
9 Ya kalbeyex-xan awaʼiyik te bin la kalixe: chikan machʼauk-a te ya scholbeyex awaʼiyik yan lek yachʼil kʼop te ma jichuk te bin-utʼil la achʼuunike, akʼa yichʼ lajinel.
10 ¿Jaʼbal ya jkʼan te lek jkʼoplal ta stojol te ants winiketik, o jaʼbal te Diose? ¿Yuʼunbal jaʼ yakon ta sleel te lek jkʼoplal ta stojol te ants winiketike? Te jaʼuk ya jkʼan te lek jkʼoplal ta stojol te ants winiketike, ma jaʼuk j-abaton yuʼun Cristo te jichuke.
11 Kermanotak, ya jkʼan te yakuk anaʼik te maba talem ta stojol ants winik te lek yachʼil kʼop la kalbeyex awaʼiyike,
12 melel maba ants winik la yakʼbon jnaʼ sok maba ants winik la yakʼbon jnop, jaʼ la yakʼbon jnop te Jesucristo.
13 Te jaʼexe la awaʼiyik stojol te bin yilel jtalel-a te kʼalal ayonto ta religión yuʼun-a te judioetike. La awaʼiyik stojol te bayal la jnutstiklan te congregación yuʼun Dios sok te jkʼaxel kʼan jlajine.
14 Jaʼnix jich yakon ta yakʼbeyel yipal ta religión yuʼun-a te judioetik kʼaxemtoxan-a te bin-utʼil bayal ta tul ta jnacion te pajal kaʼbilal soke, melel kʼaxemtoxan bayal skʼoplal ta koʼtan-a te costumbreetik yuʼun te jmeʼ jtate.
15 Pero, kʼalal te Dios —te jaʼnix la yakʼ ayinukon* sok te la yikʼon ta swenta te slekil yoʼtan te ma snujpʼuk ya kichʼtik— lek la yil
16 te ya stuunteson ta yakʼel ta naʼbeyel sba te sNichʼan yuʼun jich ya jcholbey yaʼiy te nacionetik te lek yachʼil kʼop ta swenta te sNichʼane, ma jaʼuk boon ta sjojkʼoybeyel ta oranax te machʼa chʼichʼbakʼete.
17 Jaʼnix jich maba moon bael ta Jerusalén ta stojol te machʼatik nail yichʼoj yaʼtelik ta jpuk-kʼopetik. Te bin la jpase jaʼ te boon ta Arabia, patil sujton tal ta Damasco.
18 Tey-abi, oxeb jaʼbil ta patil moon bael ta Jerusalén ta yulaʼtayel te Cefas,* jilon sok tey-a 15 kʼajkʼal.
19 Pero maʼyuk la kil te yantik jpuk-kʼopetik tey-ae; jaʼnax te Santiago, te yijtsʼin te Kajwaltike.
20 Jamal ya kalbeyex ta stojol Dios te ma jlotuk te bin ya jtsʼibaybeyexe.
21 Ta patil boon ta skʼinal Siria sok Cilicia.
22 Pero ma snaʼbonik jba-a te congregacionetik te ayik ta skʼinal Judea te jun ayik sok te Cristoe.
23 Jaʼnax jich yaʼiyojbonik jkʼoplal: «Te winik te ya snutsotik-ae ta ora ini yakix ta scholel te lek yachʼil kʼop ta swenta te chʼuunel oʼtanil te kʼan slajinbey skʼoplal-ae».
24 Jich jajch yalbeyik yutsil skʼoplal te Dios ta jwenta.
Notaetik
^ O «sjakel abaik», «sjakaltesel abaik».
^ O «p’ejk’ajukon», «tojkukon».
^ Jaʼ yan sbiil te Pedro.
