Carta ta stojol te Galataetik 2:1-21
2 Jich yuʼun, 14 jaʼbil ta patil, chaʼmoon bael ta Jerusalén sok te Bernabé, jaʼnix jich la kikʼ bael te Tito yuʼun ya sjokinon.
2 Moon bael tey-a ta skaj te ay bin la kichʼ akʼbeyel jna’ sok la jcholbey yaʼiy te hermanoetik te lek yachʼil kʼop te yakon ta spukel ta yolil te jyanlumetike. Pero, jaʼnax la kalbey yaʼiyik te winiketik te ichʼbilik ta mukʼe, jich la jpas ini yuʼun maba ya jkʼan te tojolnax yakon ta animal ni jaʼuk te tojolnax animajone.
3 Pero, ni jaʼuk te Tito te sjokinojon baele, maba la sujik te ya yichʼ circuncisión,* manchukme griego-a.
4 Te kʼop ini jaʼ la sjachik te lotil hermanoetik te muken ochik ta yilel ta lek te bin-utʼil libre ayotik ta skaj te jun ayotik sok te Cristo Jesús, yuʼun jich jkʼaxel ya skʼan ya smosoinotik.
5 Pero, jkʼaxel maba la jchʼuunkotik te bin la yalik sok maba la kakʼ swentainotik, yuʼun jich ya x-ayin ta atojolik te lek yachʼil kʼope.
6 Pero, te winiketik te mukʼ skʼoplal ilbilike —maʼyuk skʼoplal ta koʼtan te bin yaʼtel yichʼojike, melel te Dios ma jaʼuk mukʼ skʼoplal ta yoʼtan te bin sbanax ya yile—, te winiketik-abi te ichʼbilik ta mukʼe maʼyuk bin yachʼil la yakʼbonik jnaʼ.
7 La yilik te kichʼoj akʼbeyel kaʼtel ta yalbeyel te lek yachʼil kʼop te machʼatik ma yichʼojik circuncisión,* jichnix te bin-utʼil te Pedro te la yichʼ akʼbeyel yaʼtel ta scholbeyel te lek yachʼil kʼop te machʼatik yichʼojik circuncisión,
8 melel te machʼa akʼbot yaʼtel ta jpuk-kʼop te Pedro ta yolil te machʼatik yichʼojik circuncisión,* jaʼnix jich la yakʼbon kaʼtel-euk ta jpuk-kʼop ta yolil te jyanlumetik.
9 La schʼuunik te yuʼun-nix kichʼojtik-a te slekil yoʼtan Dios te ma snujpʼuk ya kichʼtike. Te Santiago, te Cefas* sok te Juan, te jich ilbilik te bitʼil yoyal* te congregación, la yakʼbonkotik te swaʼel kʼabik joʼon sok te Bernabé te jaʼ señail te joy jbatik ta aʼtel yuʼun jich boonkotik ta stojol te jyanlumetik, yan stukelik bajtik ta stojol te machʼatik yichʼojik circuncisión.*
10 Jaʼnax la yalbotik te yakuk xjul ta koʼtantik skoltayel te pobreetike, jaʼ te bin kakʼojbey yipal ta spasel-euke.
11 Pero, te kʼalal tal ta Antioquía te Cefase,* la jsitintay jba ta kʼop sok, melel chikan ta ilel-a te ma stojiluk te bin yak ta spasele.
12 Melel te kʼalal mato xjulik-a te winiketik te tikunbil yuʼun te Santiagoe, te Cefas* ya sjokin ta weʼel-a te jyanlumetike, pero maba jich la spasix-a te kʼalal kʼotik te winiketik-abi, la spit sba lokʼel ta stojol te jyanlumetik yuʼun la xiʼ te machʼatik yichʼojik circuncisione.*
13 Jaʼnix jich, te yantik judioetik la skʼayinbeyik te chaʼlam yoʼtan* te Cefase,* jichnix-euk te Bernabé la skʼayin-euk te bitʼil chaʼlam yoʼtanike.
14 Jich yuʼun, te kʼalal la kil te maba jich yakik ta spasel te bin ya yal te smelelil lek yachʼil kʼope, jich la kalbey ta komonsitil te Cefas:* «Jaʼat te judioat, jich yakat ta kuxinel te bin-utʼil te jyanlumetik, te ma jichuk yakat ta kuxinel te bitʼil te judioetike, ¿bin yuʼun ya asuj te jyanlumetik te jichuk ya xkuxinik te bin-utʼil costumbreetik yuʼun te judioetike?».
15 Te bitʼil judiootik ta kayinabtikto,* maba jmulawilotik jich bitʼil te jyanlumetike,
16 jnaʼojtik te ma jaʼuk toj ya yichʼ ilel yuʼun Dios jtul winik te ya schʼuun spasel te bin ya yal te leye, jaʼ toj ya yichʼ ilel ta swenta te schʼuunel yoʼtan ta stojol te Jesucristoe. Jaʼ yuʼun kakʼojtik schʼuunel koʼtantik ta stojol te Cristo Jesús yuʼun jich toj ya yilotik te Dios ta swenta te schʼuunel koʼtantik ta stojol te Cristo, ma jaʼuk ta swenta te ya jchʼuuntik spasel te bin ya yal te leye, melel maʼyuk machʼa toj ya yichʼ ilel yuʼun Dios ta swenta te ya schʼuun spasel te bin ya yal te leye.
17 Jich yuʼun, teme yakotik ta spasel tulan yuʼun toj ya kichʼtik ilel yuʼun Dios ta swenta te Cristo, pero te yato kichʼtik ilel jich bitʼil jmulawiletik, ¿yuʼunbal ya skʼan ya yal te jaʼ ya stijbon koʼtan te Cristo ta spasel mulil? ¡Ma jichuk stukel-abi!
18 Teme ya jchaʼpas te bin la jin ta nailale, jich ya kakʼ ta ilel te ya jkʼaxuntay te bin ya yal te leye.
19 Jich yuʼun, ta swenta te la jchʼuun spasel te bin ya yal te ley, lajemonix ta swenta te ley yuʼun jich ya xkuxinon ta stojol te Diose.
20 Pajal jipilon ta teʼ sok te Cristoe. Ma joʼukonix te kuxulone, jaʼ kuxulix ta jtojol te Cristo te jun ayon soke. Te bitʼil kuxulonto ta kʼinal sok te jbakʼetale kuxulon ta swenta te schʼuunel koʼtan ta stojol te sNichʼan te Diose, jaʼ te machʼa kʼux la yaʼiyon ta yoʼtan sok te la yakʼ sba ta lajel ta jtojole.
21 Te joʼone maba ya jpʼaj te slekil yoʼtan Dios te ma snujpʼuk ya kichʼtike, melel te jaʼuk toj ya kichʼtik ilel yuʼun ta swenta te leye, tojolnax laj te Cristo te jichuke.
Notaetik
^ Jaʼ yan sbiil te Pedro.
^ O «yiptajib».
^ Jaʼ yan sbiil te Pedro.
^ Jaʼ yan sbiil te Pedro.
^ O «cheb yoʼtan».
^ Jaʼ yan sbiil te Pedro.
^ Jaʼ yan sbiil te Pedro.
^ O «jp’ejk’ajibtikto», «jtojkibtikto».
