Carta ta stojol te Galataetik 4:1-31
4 Ya kalbeyex awaʼiyik ini, jich bitʼil te chʼin keremto te machʼa ya yichʼ jilel te bin albil skʼoplale, pajal skʼoplal sok jtul moso, manchukme jaʼ yajwal spisil te bintik aye,
2 melel ayto ta skʼab jwentainwanejetik sok jkanantaywanejetik jaʼto teme la sta yorail te chapal yuʼun te state.
3 Jaʼnix jichotik-euk, te k’alal chʼin keremotikto-ae, jaʼ mosoinbilotik yuʼun-a te bintik swenta balumilale.
4 Pero, kʼalal tsʼakaj te yorail te chapbil skʼoplale, te Dios la stikun tal te sNichʼan te ayin* ta stojol jtul ants sok te ayin ta swenta te ley,
5 yuʼun jich la sman sok la yakʼ ta libre te machʼatik wentainbilik yuʼun te leye, jich ya xjuʼ ya kichʼtik ikʼel te bin-utʼil yal snichʼnab Dios.
6 Jich te bitʼil alnichʼanexe, te Dios la stikun ta jtojoltik te chʼul espíritu* te ay ta stojol te sNichʼane, jaʼ ini jich ya yal: «¡Abba,* jTat!».
7 Jich yuʼun, maba mosoatix, jaʼ alnichʼanatix. Teme alnichʼanatixe, te Dios yame yakʼbat awichʼ te bintik ay yuʼun-euke.
8 Te kʼalal maba anaʼojbeyik sba-a te Diose, mosoinbilex yuʼun te bintik manix jaʼuk diosetik-ae.
9 Pero, te bitʼil ya anaʼbeyikix sba te Dios ta ora ini o, lekxan ya kaltik, te ya snaʼbatikix aba te Diose, ¿bin yuʼun te ya akʼan sujtex ta stojol te bintik maʼyuk yip sok te bintik swenta balumilal te maʼyuk skʼoplal sok te ya akʼanik te ya smosoinex yan bueltae?
10 Te jaʼexe yakex ta yichʼel ta mukʼ biluk kʼajkʼaletik, uiletik, biluk yajtalul te jaʼbiletik sok jaʼbiletik.
11 Ya jmel koʼtan awuʼunik teme tojolnax aʼtejon ta atojolike.
12 Kermanotak, ya jkʼanbeyex wokol te jichukex te bin-utʼil te joʼone, melel jaʼnix jich kʼoon-euk te bin-utʼil te jaʼexe. Maʼyuk la awutsʼinonik.
13 Melel anaʼojik te la jcholbeyex awaʼiyik te lek yachʼil kʼop ta sbabial buelta ta skaj te la stsakon chamele.
14 Manchukme la ata awokolik yuʼun te la stsakon chamele, maba la apʼajonik sok maba la awilayonik.* Jich kʼoon ta awoʼtanik te bin-utʼil chʼul-abat yuʼun Dios, jich bin-utʼil te Cristo Jesús.
15 ¿Banti ay te stseʼelil awoʼtanik ta nailale? Schʼuunoj koʼtan te yuʼunuk ya xjuʼ ta pasele, la alokʼes te asitik yuʼun la awakʼbonik te jichuke.
16 ¿Yuʼunbal kontra kʼoemonix awuʼunik ta skaj te ya kalbeyex te bin smelelile?
17 Te ants winiketik-abi yoʼtanukik te lekuk ya awilike, pero ma ta skajuk slekil yoʼtanik te jich yakik ta spasele. Te bin ya skʼanike, jaʼ te ya slokʼesex ta jtojol yuʼun jaʼ ya atʼunik bael.
18 Ma yuʼunuk chopol* te ay machʼa ya skʼan te lek ya awilike, jaʼnax teme yuʼun ya spasik sok slekil yoʼtanike, sok te manchuk jaʼuknax ya spasik-a te kʼalal jokinojexe.
19 Kal jnichʼnab, ya xchaʼkʼax jwokol awuʼunik jich bin-utʼil jtul ants te ya x-ayin* yale jaʼto kʼalal ya xchiknaj te stalel Cristo ta awoʼtanik.
20 Koʼtanuk te jokinojex ta ora ini sok te yanuk te bin-utʼil ya xkʼopojon ta atojolike, melel ma jnaʼ te bin-utʼil ayexe.
21 Albonik kaʼiy, jaʼex te ya akʼanik te ya swentainex te leye, ¿yuʼunbal maba ya awaʼiyik te bin ya yal te Leye?
22 Jaʼ jich te bin-utʼil tsʼibaybil te ayin* chaʼtul snichʼnab te Abrahane: te jtule jaʼ yuʼun te j-abat antse, te yane jaʼ yuʼun te ants te libre aye.
23 Te yal te j-abat ants ayin* jich bitʼil ya x-ayin biluk alal, yan stukel te yal te ants te libre aye ayin ta swenta te bin jamal yaloj te Diose.
24 Spisil ini ya xjuʼ ya yichʼ ilel jich bitʼil lokʼombakʼop ta jtojoltik, melel te antsetik ini jaʼ señail cheb chapbilkʼop. Te jun chapbilkʼop chiknaj ta wits Sinaí, la yalatay te machʼatik ya xkʼotik ta mosoil jich bitʼil te Agar.
25 Te Agar jaʼ señail te wits Sinaí, te wits te ay ta skʼinal Arabia, te jaʼ skʼoplal te Jerusalén ta ora ini, melel ay ta mosoinel sok te yalatake.
26 Pero, te Jerusalén te ay ta toyole libre ay stukel sok jaʼ jnantik.*
27 Melel jich tsʼibaybil: «Tseʼelukme awoʼtan, jaʼat ants te maba ya x-alajate. Awunan sok stseʼelil awoʼtan, jaʼat ants te maʼyuk awaʼiyojbey skʼuxul te alajele. Melel jaʼ bayalxan yalatak te ants te ijkitaybil te bin-utʼil te ants te ay smamalale».
28 Jich yuʼun, kermanotak, jaʼex yal snichʼnabex te bin jamal yaloj te Diose, jich te bin-utʼil te Isaac.
29 Pero, jich te bin-utʼil kʼot ta pasel ta namey te nichʼanil te ayin* jich bin-utʼil biluk alal jajch skontrain te machʼa ayin ta swenta chʼul espíritu,* jichnix yak ta kʼoel ta pasel ta ora ini.
30 Pero, ¿bin ya yal te sJun Diose? «Tena lokʼel te j-abat ants ini sok te yale. Melel te bin kechel ya yichʼ akʼbeyel te yal te ants te libre ay, jkʼaxel maba ya yakʼbey te yal te j-abat antse».
31 Jich yuʼun, kermanotak, ma jaʼuk yalotik te j-abat antse, jaʼ yalotik te ants te libre aye.
Notaetik
^ O «pʼejkʼaj», «tojk».
^ Jaʼ jpʼal kʼop ta hebreo kʼop o ta arameo kʼop te ya stuuntesik-a te alaletik te kʼalal ya xkʼopojik sok te statik, o spapaik.
^ O «atubatayonik».
^ O «ma lek».
^ O «xpʼejkʼaj», «xtojk».
^ O «pʼejkʼaj», «tojk».
^ O «pʼejkʼaj», «tojk».
^ O «jmeʼtik», «jmamatik».
^ O «pʼejkʼaj», «tojk».
