Carta ta stojol te Galataetik 5:1-26
5 Te Cristo la yakʼotik ta libre yuʼun jich libre ya xkʼootik. Jaʼ yuʼun, junukme awoʼtanik sok mame xa awakʼxan abaik ta chukel ta yugo-teʼ* yuʼun te mosoinel.
2 Joʼon Pabloon, aʼiya awaʼiyik stojol te bin ya kalbeyexe, teme ya awichʼik circuncisión,* maʼyuk skʼoplal ya xkʼot awuʼunik te bin la spas te Cristo ta atojolike.
3 Ya kalbey yan buelta te machʼa ya yichʼ circuncisión* te yame skʼan ya schʼuun spasel spisil te bin ya yal te Leye.
4 Jaʼex te ya akuyik te toj ya awichʼik ilel yuʼun Dios ta swenta te ley, maba jun ayex sok te Cristo. La alokʼes abaik ta stojol te slekil yoʼtan te ma snujpʼuk ya kichʼtike.
5 Yan te joʼotik, ta swenta te chʼul espíritu,* yakotik ta smaliyel sok spisil koʼtantik te toj ya kichʼtik ilel yuʼun Dios ta swenta te schʼuunel koʼtantike.
6 Melel te machʼatik jun ayik sok te Cristo Jesús maʼyuk skʼoplal ya xkʼotik teme yichʼojik circuncisión* o teme maba yichʼojik circuncisione. Te bin ay skʼoplal jaʼ te bin-utʼil ya x-aʼtej te chʼuunel oʼtanil ta swenta te kʼuxul oʼtanile.
7 Kʼax lek yakex ta animal-a. ¿Machʼa la smakbeyex abeik yuʼun jich la akom abaik ta schʼuunel te smelelil kʼope?
8 Te machʼa jich snopojibal yuʼun ini maba talem ta stojol te machʼa yak yikʼbelexe.
9 Te jtebnax levadura ya spajubtes skʼolol te harinae.
10 Ay smuk’ul ko’tan ta atojolik, jaʼex te jun ayex sok te Kajwaltik, te maʼyuk yan bin ya anopik. Pero, chikan machʼauk-a te ya schebajtesbeyex awoʼtanike yame yichʼ te castigo te snujpʼ ya yichʼe.
11 Jich yuʼun, kermanotak, te yuʼunuk yakonto ta scholbeyel skʼoplal te circuncisione,* ¿bin yuʼun-nix-a te yakon ta kontrainele? Te yuʼunuk jich yakon ta spasele, ma jaʼukix kʼojchinojibal ya xkʼot te teʼ yuʼun wokolil* te jichuke.
12 Jaʼ lek te ayuk bitʼil jkʼaxeluk ya setʼik lokʼel te skʼunil sbakʼetalik* te winiketik te ya schebajtesbeyex awoʼtanike.
13 Kermanotak, te jaʼexe la awichʼik ikʼel yuʼun libre ya x-ayinex. Pero, te bitʼil libre ayex mame jichuk xa awilik te ya xjuʼ ya apasik te bin ya skʼan te abakʼetalike, jaʼ lek te talel kʼaxel ya awabatin abaik ta swenta te skʼuxul awoʼtanike.
14 Melel spisil te bin ya yal te Leye smakojbey skʼoplal* te mantalil ini: «Kʼuxukme xa awaʼiy ta awoʼtan te apatxujk jichnix te bin-utʼil kʼux ya awaʼiy aba te jaʼate».
15 Teme ma xa akom abaik ta atiʼbel abaik sok ta ajinel abaik, tsajtayame* abaik te manchuk jkʼaxel ya alajin abaik.
16 Jaʼ yuʼun, jich ya kalbeyex ini: jaʼme xa apasik te bin ya skʼan te chʼul espiritue,* jichme maba ya achʼuunik spasel te bin ya skʼan te abakʼetalike.
17 Melel te bin ya smulan spasel te bakʼete ya skontrain te chʼul espiritue.* Jichnix-euk te chʼul espiritue ya skontrain te bintik ya skʼan te bakʼete, te bin-utʼil ya skontrain sbaike, jich ma xjuʼ awuʼunik spasel te bin ya akʼan ya apasike.
18 Jich yuʼun, teme jaʼ ya awakʼ abaik ta tojobtesel yuʼun te chʼul espiritue* maba wentainbilex yuʼun te leye.
19 Jamal chikan ta ilel te yaʼtel te bakʼete, jich bitʼil te mulwej,* te bin ilobtik sba, maʼyuk kʼexlalil ta skʼaxuntayel mantal,*
20 yichʼel ta mukʼ lokʼombaetik, espiritismo,* kontrainwanej, sjachel kʼop, il-oʼtantaywanej, ilinba, tsaktamba kʼop, te maba jun ayex, xatomba,
21 bikʼtal oʼtantaywanej, yakubel, spasel kʼin te jkʼaxel ma stojiluk sok yantikxan te pajalik sok ini. Ya kalbeyex awaʼiyik, jich te bin-utʼil la kalbeyex awaʼiyik ta nailale, te machʼatik ya spasik ini maba ya yichʼik te Wentainel* yuʼun te Diose.
22 Yan stukel te sit te chʼul espíritu,* jaʼ te kʼuxul oʼtanil, tseʼel oʼtanil, lamalkʼinal, lamal oʼtanil, yutsil oʼtanil, lekil oʼtanil, chʼuunel oʼtanil
23 manso-oʼtanil, ya xjuʼ yuʼun skomel sba. Maʼyuk ley te ya skontrain spisil ini.
24 Te machʼatik jaʼ yuʼun te Cristo Jesús la sjijpanikix ta teʼ te bin ya skʼanik sok te bintik ya smulanik spasel te sbakʼetalike.
25 Teme kuxulotik ta swenta te chʼul espiritue,* mame jkom jbatik ta spasel ta lek te bin ya skʼan te chʼul espiritue.
26 Mame jaʼuknax ya jpastik te bin ya skʼan te koʼtantike, mame xjajchotik ta yaʼiyel tsaltamba sok mame jbikʼtal oʼtantay jbatik.
Notaetik
^ Jchʼix teʼ te ya skʼajtanik ta snejkʼelik yuʼun ya skuchik ijkatsil.
^ O «ya spas sbaik ta eunuco». Jich maba ya xjuʼ yuʼunik spasel te mantalil te ya skoltaybeyik skʼoplale. Ilawil ta glosario, Eunuco.
^ O jaʼniwan ya skʼan ya yal «te jun-nax smakojbey skʼoplal».
^ O «ilame».
