Génesis 15:1-21
15 Te kʼalal kʼoemix ta pasel spisil-abi, te Abrán la yil jun najalsitil* te banti jich albot yuʼun te Jehová: «Ma xiwat Abrán. Joʼon jkanantaywanejon* awuʼun. Kʼax mukʼ ya xkʼot te amajtane».
2 Pero, te Abrán jich la yal: «Kajwal Jehová, Mukʼul Ajwalil, ¿bin ya awakʼbon te bitʼil mato ayuk jnichʼnab? Spisil te bintik ay kuʼun jaʼ ya yichʼ jilel te Eliezer, te winik te talem ta Damasco».
3 Sok jich la yalxan: «Maba awakʼojbon jtul jnichʼan, jaʼ yuʼun te machʼa ya yichʼ jilel te bintik ay kuʼun, jaʼ jtul kabat te ayin* ta jna».
4 Pero, jich albot yuʼun te Jehová: «Maʼuk, te winik ini ma jaʼuk ya yichʼbat jilel te bintik ay awuʼune. Jaʼ ya yichʼbat jilel te mero anichʼane».
5 Jich la yikʼ lokʼel ta fuera sok jich la yalbey: «Awokoluk, toya moel asit ta chʼulchan sok ajtaya te ekʼetik... teme ya xjuʼ awuʼune». Tey-abi, jich la yal: «Jichme kʼax bayal ya xkʼot te atsʼumbale».
6 Te Abrán la yakʼ schʼuunel yoʼtan ta stojol te Jehová, jich toj ilot yuʼun.
7 La yalbeyxan: «Joʼon Jehovaon te la kikʼat lokʼel ta Ur ta skʼinal te caldeoetik yuʼun ya kakʼbat akʼinalin te kʼinal ini».
8 Pero, te Abrán jich la yal: «Kajwal Jehová, Mukʼul Ajwalil, ¿bin-utʼil ya jnaʼ te yuʼun-nix ya kichʼ-a te kʼinale?».
9 Te Dios jich la yal: «Ikʼbon tal jkojt meʼ wakax te oxeb yaʼbilal, jkojt meʼ tentsun te oxeb yaʼbilal, jkojt tat tuminchij te oxeb yaʼbilal, jkojt xpuliwok* sok jkojt jkolel stsumut».*
10 Jich te Abrán la yikʼ tal spisil te chambalametik sok la sjat-tiklan ta olil, pero ma la sjat stukel te jaʼmal mutetik. Ta patil chaʼchol la yakʼ te jujunjate.
11 Te jaʼmal mutetik te ya stiʼik lajem chambalametik jajchik ta koel ta sba te chambalametik te milbilik, pero te Abrán la stijtiklan bael.
12 Te kʼalal yakix ta malel-a te kʼajkʼale, mero kʼub swayel te Abrán sok potsot ta pimil ijkʼal kʼinal.
13 Te Dios jich la yalbey te Abrán: «Yame skʼan ya anaʼ te ya xnain te atsʼumbal ta yan kʼinal te ma jaʼuk yuʼun sok ya xmosoinotik yuʼun te ants winiketik tey-a sok ya yichʼik utsʼinel* 400 jaʼbil.
14 Pero ya kakʼbey castigo te nación te ya smosoin te atsʼumbale, ta patil ya xlokʼik tal sok bayal skʼulejalik.
15 Te kʼalal mamalatix-ae jun awoʼtan ya xlajat bael; ya awichʼ mukel sok te antiguo ameʼ atate.
16 Pero, ta schankajal atsʼumbal ya sujtik tal liʼi, melel mato yorailuk te ya yichʼik castigo te amorreoetike».
17 Te kʼalal malix kʼajkʼal-ae sok te ijkʼubenix-a te kʼinale, chiknaj jun horno te banti yak ta lokʼel tal chʼail, sok jun tuchbil kʼajkʼ kʼax ta yolil te chambalametik te jat-tiklanbil ta olil.
18 Ta yorail-abi la spas jun chapbilkʼop te Jehová sok te Abrán, kʼalal jich la yalbey: «Te kʼinal ini yame kakʼbey te atsʼumbale, ya xjajch tal ta mukʼul jaʼ yuʼun Egipto jaʼto kʼalal ta mukʼul jaʼ yuʼun Éufrates:
19 jaʼ te skʼinal quenitaetik, quenizitaetik, cadmonitaetik,
20 hititaetik, perizitaetik, refaimetik,
21 amorreoetik, cananeoetik, guirgaseoetik sok te skʼinal te jebuseoetike».
Notaetik
^ Ta hebreo: «jich kʼoemon te bin-utʼil majkilal awuʼun».
^ Ta yantik variante «pʼejkaj», «tojk».
^ O «tórtola».
^ O «paloma».
^ Ta yantik variante «ilbajinel».
